Read lubukusu Bal. 20 Bible Online

Bal. 20 - lubukusu bible

Bal. 20

¹Wele Omunyali Owa Bioosi aboolela Musa ali,

²“Boolela babaandu ba Isiraeli oli, omundu yesi yesi mu baandu ba Isiraeli, namwe omukwa yesi yesi omenyile mu Isiraeli, oaana babaana bewe khusaaya Moleki, aleerwa, babaandu be sibala esio bakhamupe kamabaale.

³Ne ese samwene ndamufutarira mala murusie khukhwama mu baandu bewe, sikila aelesie Moleki mulala khu baana bewe. Mungila yino onake abuundu ase atakatifu ne lisina liase litakatifu.

⁴Ne kaaba bali babaandu be sibala esio basila busa omundu oyo ne alikho naana mulala khu baana bewe khu Moleki, mala se bamwiira tawe,

⁵nono ese ndamufutarira niye nenju yewe yoosi, mala mbarusie khukhwama mu baandu babwe. Ndamurusiamo niye nende abo boosi basaaya Moleki.

⁶“Omundu yesi yesi nayiima buyeeti khu balakusi, ne khu bamakoombe, ndamufutarira mala murusie khukhwama mu baandu bewe.

⁷Khwako yetakaasa mwabene mala mube batakatifu, sikila ese ndi Wele Omunyali Owa Bioosi, Wele wenywe.

⁸Ria kamalaka kase mala mukaliinde. Ese ndi Wele Omunyali Owa Bioosi, omukhola enywe khuba batakatifu.”

⁹ Omwana yesi yesi olaama raraawe nanwe maawe aleerwa, sikila aba alaamile raraawe namwe maawe. Khwako alasuta sifuki siewe omwene.

¹⁰ “Omundu yesi yesi ne akhola bueeyi no mukhasi wa bene, boombi, niye no mukhasi oyo balerwa.

¹¹ Omundu okona no mukhasi owa raraawe, aba asimbule sichula sia raraawe. Ne abo boombi, niye no mukhasi oyo, balerwa. Babeene balasuta sifuki siabwe.

¹² Omundu okona nende mukho mwana wewe, boombi berwa. Aba bakholile ke luuswa, ne sifuki siabwe sili khu beene.

¹³ Omundu nakhola sifwaabi no museecha wasie, boombi bakholile sisiindu sie luuswa. Ne boombi bakhoya berwe ne sifuki siabwe sibe khu beene.

¹⁴ Omundu ne ayila omukhaana mala lundi ayile masalaawe, luli luuswa. Boosi balosebwa nio luuswa luno lurureo.

¹⁵ Omundu ne akhola sifwaabi ne saang'i, aleerwa. Ne esaang'i yosi eleerwa.

¹⁶Omukhasi nakhola sifwaabi ne saang'i, niye aleerwa ne saang'i yosi eleerwa. Omukhasi oyo alasuta sifuki siewe, ne esaang'i eyo elasuta sifuki siayo.

¹⁷ “Omundu nayila wandaaye omukhaana we mumwabwe, namwe we khuluyia mala nakhola sifwaabi naye chili chisoni. Balarusibwa mu baana basiaabwe. Omwene alasuta luuswa lwewe

¹⁸ Omundu naba ne omukhasi oli mu ndaalo chewe chimbi, boombi batimanisibwa barure enje we kholo eya Isiraeli. Sikila baafunake kamalaka ke khukhweliinda mu bumiliiu.

¹⁹ “Okhakhola sifwaabi ne sengeo namwe wandaaye owa maao tawe. Sikila abo bali balebe bowo. Mwembi aba mwakholile luuswa.

²⁰Omundu nakhola sifwaabi ne mukha khochaawe namwe mukha raraawe wandaaye owa raraawe. Bombi balasuta luuswa lwabwe mala bafwe bukuumba.

²¹ Omundu ne akona nende mukha wandaaye, sili sifwaabi. Aba aambisie wandaaye chisoni. Bombi balafwa bukuumba.

²²“Khwako, liinda kamalaka kase koosi, nio sibala nisio ndikho muyilamo siikhamuloba tawe.

²³Mukhakhola kimiima kie babaandu nibo ndikho ndusia ebweeni wenywe tawe. Sikila bakhola kamabi kano koosi, mala nabaleka.

²⁴Ne kakhali ese namusuubiisie ndi, ‘Mukhabukule sibala siabwe, ne khamuelesie enywe sibala nisio kamabeele ne bubuukhi biseleetekhanga, sibe sisienywe. Ese ndi Wele Omunyali Owa Bioosi, Wele wenywe, owamwaula khukhwama khu kholo chichiindi.

²⁵Khwako mukhoya mukabukhasie chisaang'i ne chinyuni nicho balia nende nicho bakhalia tawe. Mukhalia chisaang'i ne chinyuni chinyaalu namwe sisiindu siosi simoola tawe. Naboolile ndi chili chinyaalu ne khuchilia lilamukhola enywe khuba bakhali batakaase tawe.

²⁶Mukhoya mwaba batakatifu khwise sikila ese Wele Omunyali Owa Bioosi ndi Omutakatifu. Namwabukhasie enywe khukhwama khukholo chichiindi nio mube babaandu base.

²⁷“ ‘Omundu yesi yesi owe siikhasi namwe owe siseecha oli omulakusi namwe omulosi akhoya erwa. Bakhoya berwa ne kamabaale ne sifuki siabwe siliba khu beene.’ ”