Read lubukusu Bal. 21 Bible Online

Bal. 21 - lubukusu bible

Bal. 21

¹Wele Omunyali Owa Bioosi aboolela Musa ali, “Boolela basaayi, ba okhwa Aruni oli, ‘Omusaayi yesi yesi akhatiila khu mufu tawe, busa aba okhali omutakaase tawe,

²nakhali omulebe wewe owe aembi, maawe namwe raraawe, omusoleeli wewe, omukhaana wewe, namwe wandaaye omusoleeli.

³Ne lundi akhaba wandaaye omukhaana okhacha munju omenyile naye tawe.

⁴Akhekhola okhali omutakaase khulwe lifwa lie bakhwe bewe tawe.

⁵ “ ‘Basaayi bakhabeka lichuune liabwe namwe bunwanwa bwabwe namwe basalake kimibili kiabwe tawe.

⁶Bakhoya babe batakatifu lundi bakhonaka lisina lia Wele wabwe tawe. Sikila baananga biianwa bibiosie khu Wele Omunyali Owa Bioosi, siakhulia sia Wele wabwe, khwako bakhoya babe batakatifu.

⁷Basaayi bakhayila bakhasi bataamba, namwe omukhaana okhali ne yabwana tawe. Ne lundi bakhayila bakhasi babalekhana ne baseecha babaandi tawe. Sikila basaayi bali batakatifu khu Wele wabwe.

⁸Babaandu bakhoya babukule omusaayi nga omutakatifu, sikila aananga biakhulia khu Wele wabwe. Akhoya aaba omutakatifu khwinywe. Sikila Ese Wele Omunyali Owa Bioosi ndi Omutakatifu, mala kholanga babaandu base baba batakatifu.

⁹Omukhaana wo musaayi naba omutaamba, aambia raraawe chisoni. Akhoya osibwa aafwa.

¹⁰“ ‘Omusaayi Omukhulu Lukali mu basie, owachukhwakho kamafura khu murwe kwewe, mala owareebwa alubeka khufwara chingubo che busaayi, akhalekha khuchanua lichuune liewe, namwe wetabula chingubo chewe tawe.

¹¹Sakhoya engila niio kumulaambo kuli namwe alobe khuba omutakaase akhaba ne ali raraawe namwe maawe ofwiile tawe,

¹²Akharura Abuundu Atakatifu namwe onakake Abuundu Atakatifu a Wele wewe tawe. Sikila atakaaswa khulwe khu chukhwakho kamafura ka Wele wewe. Ese ndi Wele Omunyali Owa Bioosi.

¹³Akhoya ayile omukhaana we yabwana.

¹⁴Akhareera namulekhwa namwe owalekhana no museecha wewe, namwe omukhasi owabechanga omutaamba tawe. Akhoya akhwe omukhaana we yabwana yeng'ene khukhwama mu kholo yewe omwene.

¹⁵Akhola ario niio alekhe babaana bewe babe batakaase. Sikila Ese ndi Wele Omunyali Owa Bioosi omutakaasa.’ ”

¹⁶Wele Omunyali Owa Bioosi aboolela Musa ali,

¹⁷“Boolela Aruni oli, Se alibao mulala khube lisaaye liowo mu ndaalo chichiicha oli ne buleme bwosi bwosi oliaana biakhulia khu Wele tawe.

¹⁸Omundu oli ne buleme bwosi bwosi akhaana siianwa tawe. Omundu nga: omubofu, omuleme, owe chimbala mu bweeni, namwe owatooya,

¹⁹lundi omundu owalemala siikhandakilo, namwe kumukhono,

²⁰omundu owe siruumba namwe omwiimbi, owe ndesi ne kamasiu, owe siikhuya, owe chingooso, namwe omuchili.

²¹Omundu yesi yesi owe lisaaye lio musaayi Aruni oli ne buleme se akhoyela aana siakhulia nga siianwa sia Wele Omunyali Owa Bioosi sie kumulilo tawe.

²²Omundu nga oyo ario anyala alia khu siakhulia siase. Anyala alia khu siakhulia sitakatifu lukali ne khu biindu bili bitakatifu.

²³Ne sikila ali ne buleme se akhoyela echa siimbi apasia endakatifu, namwe ache khu alutare tawe. Akhola ario onaka Abuundu Atakatifu. Sikila ese ndi Wele Omunyali Owa Bioosi owabikhola bitakatifu.”

²⁴Nono kano niko Musa aboolela Aruni, ne babaana bewe be seecha ne Baisiraeli boosi.