Read lubukusu Bal. 22 Bible Online

Bal. 22 - lubukusu bible

Bal. 22

¹Wele Omunyali Owa Bioosi aboolela Musa ali,

²“Boolela Aruni ne babaana bewe oli, bakhonakaka bibiindu bitakatifu nibio babaandu Baisiraeli bambanila tawe. Bakhola bario bonaka lisina liase litakatifu. Ese ndi Wele Omunyali Owa Bioosi.

³Baboolele oli, ‘Omundu yesi yesi owe lisaaye liowo lioosi, nakhali omutakaase tawe, ne echa siimbi ne biianwa bitakatifu nibio babaandu ba Isiraeli baanile khu Wele Omunyali Owa Bioosi, se alichakho lundi ebweeni wase tawe. Ese ndi Wele Omunyali Owa Bioosi.

⁴“ ‘Omundu yesi yesi we lisaaye lia Aruni oli ne bulwaale bwe kamakele namwe oronya kamayila, kamafuki namwe kameechi, se anyala alia khu biindu bitakatifu tawe khukhwola nga nalaba omutakaase. Lundi omusaayi anyala khuba okhali omutakaase tawe aba natiila khu siindu siosi siosi siikhali sitakaase tawe, nga khu mufu, namwe kaamani ko museecha.

⁵Lundi yesi yesi otiila khu simoola sinyaalu namwe khu mundu yesi yesi omukhola aba okhali omutakaase tawe, se alaba omutakaase tawe.

⁶Omundu otiila khu siindu nga esio alaba okhali omutakaase tawe khukhwola ekolooba, ne lundi se aliakho bibiindu bitakatifu ne akhesiingile tawe.

⁷Nga enyanga nekwa, naba omutakaase. Ne enyuma wako anyala alia khu biindu bitakatifu, sikila bili biakhulia biewe.

⁸Se akhoya alia enyama eye sisiaayo sifwiile busa, namwe eye sisiaayo sisirirwe ne saang'i eye mundaa tawe, elamukhola abe okhali omutakaase tawe. Ese ndi Wele Omunyali Owa Bioosi.

⁹“ ‘Khwako basaayi boosi balaliinda kamalaka kase. Ne bakhakhola bario tawe balaba ne kumusaango mala bafwa. Ese ndi Wele Omunyali Owa Bioosi obakhola babe batakatifu.

¹⁰“ ‘Omundu wenje akhaliakho sisiindu sitakatifu tawe. Omundu omenyile no musaayi namwe omukholi akhaliakho sisiindu sitakatifu tawe.

¹¹Ne kakhali omusaayi aaba nakula nasioobi nga kimiaandu kiewe khulwe chirupia, nasioobi oyo anyala asiliakho. Ne abo basaalwa munju mwewe, banyala balia khu siakhulia nisio omusaayi anyoolanga.

¹²Omukhaana wo musaayi orerwa no mundu okhali omusaayi tawe se alia khu siianwa siosi siosi sitakatifu tawe.

¹³Ne aaba omukhaana wo musaayi nali namulekhwa namwe naba okhali ne babaana tawe, mala owakobola khumenya mungo mwa raraawe, nga aba nasili omwana anyala alia khu siakhulia sia raraawe. Ne omundu okundi akhaliakho tawe.

¹⁴“ ‘Kaaba bali omundu yesi yesi alia khu siindu sitakatifu nakheluungikhe khukhola ario tawe, akhoya aruunge omusaayi kumuruungo kwasio mu bwichufu nga sili, mala atasekho kamakhumi kabili khu mia ke bukusi bwe siakhulia nisio alile.

¹⁵Basaayi bakhakhola biianwa bitakatifu bie Baisiraeli nibio baana khu Wele Omunyali Owa Bioosi bialoba khuba bitakatifu tawe.

¹⁶Ne mubalekha ne babilia, bibareerere kumunaanio. Ese ndi Wele Omunyali Owa Bioosi obakhola khuba batakatifu.’ ”

¹⁷Wele Omunyali Owa Bioosi aboolela Musa ali,

¹⁸“Boolela Aruni ne babaana bewe, ne babaandu ba Isiraeli boosi oli, Omuisiraeli yesi yesi namwe omukwa yesi yesi omenyile mu Isiraeli anyala enya khuaana siianwa siewe, sibele kumuruungo, namwe endakaano, namwe siianwa sie khukhwerusia, namwe siianwa sie khukhwosia khu Wele Omunyali Owa Bioosi se sikhoya siabamo bubi bwosi bwosi tawe.

¹⁹Ne kaaba bali bifukiililwa akhoya aane, sibe siseecha, siikhalimo libi namwe silekwa tawe, khukhwama khu uunwa, kamakheese ne chimbusi.

²⁰ Mukhaana sisiaayo siosi siosi silikho bubi bwosi bwosi tawe, sikila se silafukiililwa khulwe enywe tawe.

²¹Ne omundu yesi yesi naana embosio eye kumuleembe khu Wele Omunyali Owa Bioosi, yakhaba ne khuli khutabusia niko echuba namwe nga siianwa sie khukhwerusia, khukhwama mwituuli lie chikhaafu namwe kamakheese, nio sifukiililwe. Sikhabakho ne bubi tawe.

²²Mukhaana khu Wele Omunyali Owa Bioosi bibiaayo bioosi bioosi bili bibofu, namwe bileme namwe bireme namwe biicha kamayila, bie kamasolosi namwe biili ne kamabambu namwe chingooso tawe. Mukharusia bibiaayo birio khu alutare nga siianwa sie khukhwosia khu Wele Omunyali Owa Bioosi tawe.

²³Ne nga siianwa sie khukhwirusia, onyala waana euunwa namwe limeeme lilialemala. Ne kakhali se sifukiililwa nga siianwa sie khukhwechuba tawe.

²⁴Okhaana khu Wele Omunyali Owa Bioosi sisiaayo siosi siosi nisio balata namwe sisiauumiia mungila yosi yosi tawe. Lino se lifukiililwa mu sibala sienywe tawe.

²⁵“Ne lundi nga siakhulia sia Wele wenywe, mukhaana sisiaayo siosi siosi nisio mwanyoola khu mundu omukwa tawe. Bibiaayo nga bibienebio se bifukiililwa tawe sikila bilimo buleme.”

²⁶Wele Omunyali Owa Bioosi aboolela Musa ali,

²⁷“Euunwa namwe likheese namwe embusi ne saalilwe, ekhoya erame ne maawe chindaalo saba. Ne khurakikhira khu ndaalo eya munaane enyala yafukiililwa nga siianwa sie kumulilo khu Wele Omunyali Owa Bioosi.

²⁸Mukheera maawe eye moosi namwe eye limeeme ne eng'ana yayo khu ndaalo ndala tawe.

²⁹Ne muaana embosio eye kumuleembe khu Wele Omunyali Owa Bioosi, loonda kamalaka ke khuaana biianwa nio mufukiililwe.

³⁰Embosio ng'eneyo ekhoya yaliibwa khu ndaalo eyo neng'ene, ne mukhakiramia yola muchuli tawe. Ese ndi Wele Omunyali Owa Bioosi.

³¹“Nono khemurie kamalaka kase, Ese ndi Wele Omunyali Owa Bioosi.

³²Mukhonaka lisina liase litakatifu tawe. Ne kakhali khoya nariibwa ne babaandu ba Isiraeli boosi. Ese ndi Wele Omunyali Owa Bioosi omukhola enywe khuba batakatifu.

³³Niise owamurusia mu sibala sia Misiri khuba Wele wenywe. Ese ndi Wele Omunyali Owa Bioosi.”