Read lubukusu Bal. 23 Bible Online

Bal. 23 - lubukusu bible

Bal. 23

¹Wele Omunyali Owa Bioosi aboolela Musa ali,

²“Boolela babaandu Baisiraeli oli, chindaalo chicharoborwa che libuusiana litakatifu ne naikara eya Wele Omunyali Owa Bioosi, nicho chino:

³ Muli ne chindaalo sita mu nicho munyala mwakholelamo kimilimo kienywe, ne kakhali khebulila endaalo ekhola saba, eli e sabato, eli endaalo eye khuuluukha. Khu ndaalo ng'eneyi mukhakhola kimilimo tawe, ne kakhali yebuusia alala khusaaya. Esabato eli ya Wele Omunyali Owa Bioosi, osi osi niio mumenyile.

⁴Chino chili chi naikara chindobore cha Wele Omunyali Owa Bioosi, libuusia litakatifu, nicho mukhekesie mu biise bibiaroborwa.

⁵ “Likhebulila lie Pasaka eya Wele Omunyali Owa Bioosi lili khu ndaalo eye likhumi na chine eye kumwesi kwa lulala ekolooba.

⁶ Naikara eye kumukaati kukhalimo limela erakikha khu ndaalo eye likhumi na kharaano. Ne khulwe chindaalo saba, mulalia kumukaati kukhalimo limela tawe.

⁷Khu ndaalo eye khunyoa yino mulaba ne libuusiana litakatifu. Ne se mukholakho kumulimo kumuandalafu tawe.

⁸Mulaana khu Wele Omunyali Owa Bioosi siianwa sie khukhwosia khulwe chindaalo saba. Khu ndaalo eya saba libao libuusiana litakatifu. Ne khu ndaalo eyo se mukholakho kumulimo kumuandalafu tawe.”

⁹Ne Wele Omunyali Owa Bioosi aboolela Musa ali,

¹⁰“Boolela babaandu ba Isiraeli oli, ‘Nga ne mwingila mu sibala nisio ndikho muelesia, ne mukesile, mukhoya muyilile omusaayi sinywa sie likesa lienywe lie khunyoa.

¹¹Omusaayi alaana sinywa esio ebweeni wa Wele Omunyali Owa Bioosi, nio mufukiililwe. Omusaayi alaana sinywa khu ndaalo eloondela e sabato.

¹²Khu ndaalo niyo oanilakho sinywa sie likesa olaanilakho lundi limiiku lie kumwiiko mulala, lilayi likhalikho bubi tawe, nga siianwa sie khukhwosia khu Wele Omunyali Owa Bioosi.

¹³Ne lundi okhoya oaane bufu butiiti mu ndubi butubaasibwe ne kamafura nga siianwa sie kumulimo siunya bulayi khu Wele Omunyali Owa Bioosi. Lundi mukhoya muaane endali endiiti eli nga siianwa sie khunywa.

¹⁴Mukhaliaakho kumukaati namwe biakhulia bikhalange, namwe biibisi khukhwola khu ndaalo niyo mureerera biianwa bino khu Wele Omunyali Owa Bioosi. Lilaka lino licha khubao khu selukho choosi che lisaaye lienywe, khulwa mindali.

¹⁵ “ ‘Mubale kamachuuma saba kamamuufu khukhwamila khu ndaalo eloondela e sabato, khu ndaalo niyo muanilakho sinywa sie siianwa sie khusuta ebweeni wa Wele Omunyali Owa Bioosi.

¹⁶Khu ndaalo eye kamakhumi karaano, khu ndaalo eloondela esabato eya saba, aana khu Wele Omunyali Owa Bioosi siianwa sie biakhulia biyaaya.

¹⁷Mulareera kimikaati kibili khukhwama niio mwamenya mala kiaanwe khu Wele Omunyali Owa Bioosi. Kimikaati kino kikholwa khukhwama khu bufu bubwola enusu eye ndubi bukhalimo limela tawe.

¹⁸Ne alala ne kumukaati mukhaane kamameeme saba ke kumwiiko mulala kakhalikho ne bubi tawe, euunwa enjoka ndala ne kamamiiku kabili, bilaanwa khu Wele Omunyali Owa Bioosi nga biianwa bie khukhwosia, alala ne biianwa bie biakhulia ne biianwa bie khunywa, ne kumuuya kumulayi kusimisia Wele Omunyali Owa Bioosi.

¹⁹Ne lundi mulaana endurume nga siianwa sirusiao bubwoni, ne kamamiiku kamaana kabili ke kumwiiko mulala nga embosio eye kumuleembe.

²⁰Ne omusaayi alabiaana ne kumukaati kwe bibiaamo bie bweeni nga biianwa bie khusuta ebweeni wa Wele Omunyali Owa Bioosi, ne kamameeme kabili, bilaba bitakatifu khu Wele Omunyali Owa Bioosi khulwe basaayi.

²¹Khu ndaalo eyo mukhakhola kimilimo kienywe kia busiele tawe, nekhali mulebuusia alala khulwe lisaaya.Lilaka lino licha khuba khu selukho choosi che lisaaye lienywe.

²² Nga ne mukesa biakhulia bienywe, mukhakesa biakhulia bie khundulo mu mikuunda kenywe tawe, ne lundi mukhakobolamo mwakesa biramireo tawe. Lekhela bibienebio bataambi ne baakwa. Ese ndi Wele Omunyali Owa Bioosi, Wele wenywe.’ ”

²³Wele Omunyali Owa Bioosi aboolela Musa ali,

²⁴“Boolela babaandu ba Isiraeli oli, mu mweesi kwa saba, khu ndaalo eye khunyoa eye kumwesi, mukhakikhole endaalo eye khuuluukhila elala, endaalo eye khukhebulila khukhwicha alala ne khusaaya nga chikhoombi ne chipa.

²⁵Mukhakhola kimilimo kienywe kia busiele tawe, muaane siianwa sie khukhwosia khu Wele Omunyali Owa Bioosi.”

²⁶ Wele Omunyali Owa Bioosi aboolela Musa ali,

²⁷“Khu ndaalo eye khumi eye kumwesi kwa saba, eli endaalo eye khurusiao bubwoni. Ekhabe khwinywe endaalo eye libuusiana litakatifu. Ne lundi endaalo ng'eneyi mukhaliakho siindu tawe, yebuusia alala khu saaya mala muaane siianwa sie biakhulia khu Wele Omunyali Owa Bioosi.

²⁸Mukhakhola kimilimo kiosi kiosi khu ndaalo eyo tawe. Sikila eli endaalo eye khukhola kimilukha khurusiao bubwoni ebweeni wa Wele Omunyali Owa Bioosi.

²⁹Omundu yesi yesi oliakho siindu siosi siosi khu ndaalo eyo se alabalikha khuba omundu owa Wele mu baandu bewe.

³⁰Ne omundu yesi yesi okhola kumulimo kwosi kwosi khu ndaalo eyo, Wele Omunyali Owa Bioosi omwene akhamwire.

³¹Lilaka lino lili khulwe babaandu be lisaaye lienywe boosi khulwa mindali niio bamenyile osi osi.

³²Khu khwama nga enyanga ekwa endaalo eya tisa eye kumwesi khu khwola nga ekwa endaalo eye likhumi bukula endaalo yino khuba emboofu eye khuuluukha. Siise sino mbao siilibwa tawe.”

³³ Wele Omunyali Owa Bioosi aboolela Musa ali,

³⁴“Boolela babaandu ba Isiraeli oli, ‘Naikara eye Bisali eya Wele Omunyali Owa Bioosi elarakikha khu ndaalo eye khumi na chiraano eye kumwesi kwa saba mala echiililile khulwe chindaalo saba.

³⁵Khu ndaalo eye khunyoa mu ndaalo chino, mulebuusia alala khulwe lisaaya. Ne mukhakhola kumulimo kumuandalafu tawe.

³⁶Khulwe chindaalo saba, mulaana biianwa bie khukhwosia khu Wele Omunyali Owa Bioosi. Ne khu ndaalo ekhola munaane mulecha alala lundi khulwe lisaaya mala muaane siianwa sie khukhwosia khu Wele Omunyali Owa Bioosi. Eli endaalo eye lisaaya, ne mukhakholakho kumulimo kumuandalafu tawe.

³⁷“ ‘Chino chili naikara chindobore cha Wele Omunyali Owa Bioosi, nicho mukhakhole nga libuusiana litakatifu, khulwe khureera biianwa bie kumulilo khu Wele Omunyali Owa Bioosi, ne khuaana biianwa bie biakhulia, biianwa bie khukhwosia, chimbosio ne biianwa bie khunywa. Buli sibira siekholekhe khu ndaalo yasio.

³⁸Naikara chino chili busa khutasa khwicho che chisabato cha Wele Omunyali Owa Bioosi, ne khu biianwa bienywe, nende nibio mweana khurusilia Wele Omunyali Owa Bioosi.

³⁹“ ‘Khu ndaalo eye likhumi na chiraano eye kumwesi kwa saba nga ne muba ne mukesile biakhulia bienywe, mukhole lisaaya lia Wele Omunyali Owa Bioosi khulwe chindaalo saba. Ne mukhoya mwauluukha khu ndaalo eye khunyoa nende endaalo ekhola munaane.

⁴⁰Khu ndaalo eye khunyoa, mulabuta kamatuunda malala kamalayi khukhila koosi khukhwama khu mirongooro kienywe kie kamatuunda. Ne lundi mulabuta chisakia che kamakheendu ne chisakia che kamasaafu kamakali. Mulekhoya ebweeni wa Wele Omunyali Owa Bioosi, Wele wenywe khulwe chindaalo saba.

⁴¹Mukhakhebulilenge naikara eya Wele Omunyali Owa Bioosi khu ndaalo saba buli mwiiko. Lilaka lino lilaliindwa ne lisaaye lienywe khulwa mindali. Mukhakholenge khu mwesi kwa saba.

⁴²Babaandu ba Isiraeli boosi balamenya mu bisali khulwe chindaalo saba.

⁴³Kano kalakhola be lisaaye lienywe bamanye bali ese nakhola babaandu ba Isiraeli bamenya mu bisali nga ne nabarusia mu sibala sie Misiri. Ese ndi Wele Omunyali Owa Bioosi, Wele wenywe.

⁴⁴“ ‘Nio mungila yino Musa aana kamalaka khuloondekhana ne chindaalo chindobore che chi naikara cha Wele Omunyali Owa Bioosi.’ ”