Read lubukusu Bal. 24 Bible Online

Bal. 24 - lubukusu bible

Bal. 24

¹Wele Omunyali Owa Bioosi aboolela Musa ali,

²“Aana kamalaka khu baandu ba Isiraeli bareere kamafura ka miseituni kaali kamakwalaafu lukali khulwe chitaa. Kamafura kano kali ke chitaa nio chichiililile khuburukha.

³Aruni akhoya aambia chitaa chiburukhe khukhwama ekolooba khukhwola kumutikhinyi mwieema lie kumuse ebweeni wa Wele Omunyali Owa Bioosi. Achira ebweeni we Lisanduku lie ndakaano. Lilaka lino likhabeo khulwa mindali.

⁴Aruni alara chitaa khu siteetwe sie sahabu yong'ene mala khukhwola abone ali chiburukha busiele ebweeni wa Wele Omunyali Owa Bioosi.

⁵ “Ne bukula bufu bunosie mala mung'oonemo kimikaati ekhumi na kibili kumukaati kukhoya kubukule bufu butiiti buri.

⁶Ra kimikaati mu nyilili chibili. Ra kimikaati sita khu buli lunyilili khu mesa yafunikhwa ne sahabu yong'ene.

⁷Ra khu buli lunyilili biiunya bulayi, bube nga simanyisio sie siakhulia sie khukhwosia siaanilwe khu Wele Omunyali Owa Bioosi ne kumulilo.

⁸Buli e sabato Aruni arechenge kimikaati ebweeni wa Wele Omunyali Owa Bioosi buli lwosi khulwe babaandu Baisiraeli nga endakaano eya mindali.

⁹ Siakhulia sili sia Aruni nende be lisaaye liewe, ne balasilila Abuundu Atakatifu, sikila sino sili sitonyi sie siakhulia sitakatifu lukali sie khukhwosia khu Wele Omunyali Owa Bioosi khulwe basaayi.”

¹⁰Abao omundu mulala owaba ne raraawe Omumisiri ne maawe Omuisiraeli niye balanga bali Shelomiti, omukhaana owa Tibiri khukhwama mu kholo eya Dani. Arura khukeenda mu baandu Baisiraeli. Kamaaya kenyokha akari wo mundu yuno no Muisiraeli mu kambi.

¹¹Omundu yuno akhoma lisina lia Wele Omunyali Owa Bioosi mu silaamo. Nio bamubukula bamuyila khu Musa.

¹²Bara omundu oyo mu buliindi, mala balindiilila Wele Omunyali Owa Bioosi ababoolele nisio bakhoyela khukhola omundu oyo.

¹³Nio Wele Omunyali Owa Bioosi aboolela Musa ali,

¹⁴“Rusia enje we kambi omundu owakhoma Wele. Ne buli omundu owaulila ne akhoma are kamakhono kewe khu murwe kwo mundu oyo, khurusia buloli bali ali ne kumusaango. Nio libuusiana lie babaandu boosi limupe kamabaale afwe.

¹⁵Nono boolela babaandu ba Isiraeli oli, buli mundu yesi yesi oolaama Wele wewe, akhoya asute bubwoni bwewe.

¹⁶Ne omundu yesi yesi okhoma Wele Omunyali Owa Bioosi, aleerwa. Libuusiana lioosi limupe kamabaale. Abele omukwa namwe omuisiraeli okhoma Wele Omunyali Owa Bioosi, akhoya eerwe.

¹⁷ “Omundu yesi yesi owira owasie, aleerwa.

¹⁸Ne omundu yesi yesi owira sisiaayo sio mundu okundi, amukalusilieo sisiindi silamu.

¹⁹“Omundu yesi yesi nalemasia okundi, nisio akholile esio ne sisiene, silakholwa khu niye.

²⁰ Aaba nafuna omundu sikuumba, aba silala khu bikuumba biewe silafunwa. Aaba ne aara emoni eyo wasie, yesi emoni yewe ndala elaarwa. Ne aba napongola liliino, yesi liliewe lilapongolwa. Yesi yesi oumisia okundi, yesi alaoumisibwa ario.

²¹Yesi yesi owira sisiaayo sio kundi akhoya khukobosiao sisiindi, ne kakhali omundu yesi yesi owira owasie, akhoya yesi eerwa.

²² Lilaka lino lili khu baakwa bamumenyilemo ne mwabene. Ese ndi Wele Omunyali Owa Bioosi, Wele wenywe.”

²³Nga Musa ne amala khuboolela babaandu ba Isiraeli kano, babukula omundu chana bamurusia enje we kambi mala bamupa kamabaale bamwiira. Mungila yino babaandu ba Isiraeli bakhola niko Wele Omunyali Owa Bioosi alaka Musa.