Read lubukusu Bal. 25 Bible Online

Bal. 25 - lubukusu bible

Bal. 25

¹ Wele Omunyali Owa Bioosi aboolela Musa khu sikulu sia Sinai ali,

²“Boolela babaandu ba Isiraeli kano: ‘Nga ne mwingila mu sibala nisio nja khumuelesia, mulaliinda esabato ya Wele Omunyali Owa Bioosi, kimikuunda kienywe kikonele buli mwiiko kukhola saba.

³Mulamiicha biakhulia, khuremula kamaruuti kenywe ke kamatuunda ne khukesa bibiaamo khulwe kimiiko sita.

⁴Ne kakhali kumwiiko kukhola saba, kulaba kumwiiko nikwo kimikuunda kikonelakho elala. Kumwiiko kwe sabato ya Wele Omunyali Owa Bioosi. Mukhamiicha biakhulia mu mikuunda namwe mwaremula kamaruuti kenywe tawe.

⁵Mukhakesa sisiamo nisio mukhaamiicha tawe. Lundi mukhabuta chisabibu khu mirongooro nikio mwalekha khuremula tawe. Kuli kumwiiko kwe kamaloba khukonela elala.

⁶Siosi sisiama mu maloba ne kakhaalimwa khu mwiiko okwo tawe, silaba siakhulia sienywe, nasioobi benywe be siikhasi nende be siseecha nende nibo mwaandika, ne baakwa ba bamenya ne naywe.

⁷Siosi sikhabe siakhulia sie bibiaayo bienywe, ne chisaang'i che mundaa mu mikuunda kienywe. Buli sisiindu siikhamele sisiene.’ ”

⁸“Bala kimiiko saba khukhwola saba kibe kimiiko kamakhumi kane na tisa.

⁹Nono khupa ekhoombi khu ndaalo ekhola ekhumi eye kumwesi kwa saba. Ne khu ndaalo eye khurusia bubwoni, ruma omundu akhupe ekhoombi mu sibala sioosi.

¹⁰Okhakhole kumwiiko kwe kamakhumi karaano kube kumutakatifu lekha babaandu be mu sibala siowo boosi babe balekhuule. Kumwiiko kuno kukhabe kwe khukobosiayo nibio mwabukula. Sikila buli mulala khwinywe alakobosebwa kimiaandu kiewe lundi alakobola ewabwe.

¹¹Kumwiiko kwe kamakhumi karaano kukhabe khwinywe kumwiiko kwe khu khwikhoya. Se mukhamiche biakhulia mu mikuunda kienywe namwe mukese biakhulia bibiamela busa bibieene tawe, namwe mukhabuta chisabibu mu maruuti niko mukharemulila tawe.

¹²Sikila lili likhebulila. Kumwiiko kwoosi kulaba kumutakatifu khwinywe. Ne mulalia biimela bie mu mikuunda bibieene.

¹³“Mu mwiiko kuno kwe likhebulila buli mulala khwinywe alakobosebwa kimiiandu kiewe nikio akusia.

¹⁴Ne waaba nokusia owasio sisiindu, namwe nomukulakho, mukhabeana tawe.

¹⁵Nokula kumukuunda khukhwama khu wasio, olabala kimiiko khukhwama khu mwiiko kwe likhebulila lie kimiiko kie kamakhumi karaano. Bukusi nibwo akhukholela bulaloondekhana ne kimiiko kiramire kie likesa.

¹⁶Kimiiko kiaba ne kili kimikali bukusi bulaba angaaki ne kiaba ne kili kimiiko mitiiti busa kiri, bukusi bulaba asi. Sikila siilikho sikusibwa sili siakhulia sisiamela busa sisiene.

¹⁷Mukhabeana tawe, ne kakhali murie Wele wenywe. Sikila ese ndi Wele Omunyali Owa Bioosi, Wele wenywe.

¹⁸“Khwako ria kamalaka kase koosi ne khukaliinda nio mumenye mu muleembe mu sibala.

¹⁹Sibala siikhabemo bibiaamo biasio mala mulie mwikure, ne khumenyamo mu muleembe.

²⁰Ne kaaba bali omundu anyala areeba ali siakhulia sina nisio khukhalie mu mwiiko kwa saba, kaaba bali se khubiaala namwe khukesa bibiaamo tawe?

²¹Khabiite kamaloba kenywe mu mwiiko kwa sita, nio kaame biakhulia bie kimiiko kitaru.

²²Nga mumiicha kimikuunda kienywe mu mwiiko kwa munaane mukhabe musilia nibio mwakesa khale. Mukhalie nibio mwamiicha khale khukhwola nga ne mukesa biakhulia nibio mumiichile kumwiiko kwa tisa.

²³“Mukhakusilia elala kamaloba kenywe tawe, sikila kamaloba se kali kakenywe tawe, kali kakaase. Enywe muli busa nga baakwa lundi bauuyi.

²⁴“Kamaloba koosi kaali kakenywe ne kakusibwe khukhwola omweneko omutaayi oyo akakule.

²⁵Mulala khwinywe nakwa omutaambi mala akusiekho kamaloba kewe, omulebe wewe owa siimbi anyala akakula khukakobosia.

²⁶Ne omundu ne akhali ne omulebe onyala akakula kakobola tawe, anyala atambulukha mala akakula khu kakobosia.

²⁷Akhoya abala kimiiko khukhwama ne akakusia mala atase chirupia omundu owakula. Nio nakholile ario, akobole khu maloba kewe.

²⁸Ne kakhali aaba nakhali ne chirupia che khukula kamaloba kewe kakobole tawe, kalasikala asi wo mundu wakakula khukhwola khu mwiiko kwe likhebulila. Khu mwiiko kwe likhebulila okwo kalakobolela omweneko.

²⁹“Kaaba bali omundu akusia enju mu lukoba lusire, anyala akisikula akikobosie mu mwiiko kwe khunyoa kumumuufu ne kukhawa tawe, khukhwama khu siise sie khukusibwa.

³⁰Ne aaba omwene nakhakisikula yakobola kumwiiko ne kukhawa tawe, aba elarama khu mundu owakikula nende be lisaaye liewe. Ne se likobosibwayo mu mwiiko kwe likhebulila tawe.

³¹Ne chinju che mu birekere chikhali mu lukoba tawe, chilakholwa busa nga kimikuunda. Chinyala chakulwa, mala chakobosebwa omwene mu mwiiko kwe likhebulila.

³²Kakhaba kario, Balawi bali ne bunyali mu siise siosi siosi khukula ne khukhwekoboselia chinju chiili mu chingoba chabwe.

³³Omundu okula enju khukhwama khu Mulawi mungoba chino, mala khukulwa yakobolayo tawe, ekhoya ekobosebweyo mu mwiiko kwe likhebulila. Sikila chinju nicho Balawi bali nacho mu chingoba chabwe, chili kimiaandu kiabwe mu baandu ba Isiraeli.

³⁴Ne kakhali kamaayilwe kakabotookhelelanga chingoba chabwe se kakusibwa tawe. Sikila kili kimiaandu kiabwe khulwa mindali na mindali.

³⁵ Aaba mulala khwinywe nakwa omutaambi mala se anyala weliinda tawe, mukhoya mu muelesie nibio enya. Muyeete nga muyetaanga omundu omukwa, nio anyale khuchiililila khumenya nanywe.

³⁶Okharakho bukhala bwosi bwosi khu siindu nisio omwekopiisie tawe, ne kakhali ria Wele, mala lekha Omuisiraeli wasienywe amenye siimbi nanywe.

³⁷ Mukhamukhola aruunga bukhala khu rupia nicho mumwekopisie tawe, lundi mukhakhola bukhala khu siakhulia nisio mu mukusia tawe.

³⁸Ese ndi Wele Omunyali Owa Bioosi, Wele wenywe, owamurusia mu sibala sia Misiri ne khu muelesia sibala sia Kanaani, ne mbe Wele wenywe.

³⁹ “Kaaba bali wandaayo yesi yesi akwa omutaambi mala eaane omwene khwiwe, okhamukhola aakhola kimilimo nga nasioobi tawe.

⁴⁰Alamenya nanywe nga omundu omuandike lundi nga omukwa khukhwola khu mwiiko kwe likhebulila.

⁴¹Ne niye ne babaana bewe balakhulekha mala akobole khu be nju yewe ne khu miaandu kie bakuuka bewe.

⁴²Sikila bali bakholi base nibo narusia mu sibala sia Misiri. Bakhakusibwa nga banasioobi tawe.

⁴³Okhaba omurafu khu niye tawe, ne kakhali ria Wele wowo.

⁴⁴Mwaba ne mwenya nasioobi be siseecha nende be siikhasi, munyala mwabakula khukhwama mu kholo chichamubotookhelela.

⁴⁵Ne lundi munyala mwakula banasioobi mu baana be baakwa bamumenyilemo. Babaana nga abo banyala bakwa kimiaandu kienywe.

⁴⁶Ne munyala mwabalekhela babaana benywe nga kimiaandu nikio banyoolile khwinywe. Munyala mwabakhola banasioobi benywe. Ne kakhali mukhaba barafu khu Baisiraeli basienywe tawe.

⁴⁷“Kaaba bali omukwa owamenya nawe aindiaala, ne wandaayo akwa omutaambi mala ekusia nga nasioobi khu mukwa oyo namwe khu mundu we munju yewe,

⁴⁸enyuma we khukusibwa omutaambi oyo akhoyelwa akulwe mala abe omulekhuule. Mulala khu balebe bewe akhoya amuonia.

⁴⁹Raraawe omuro namwe omwana owa raraawe okundi namwe khu balebe bewe ba siimbi anyala amusikula mala amukobosia. Namwe omwene nakelao aba omuiinda, anyala esikula omwene.

⁵⁰Akhoya afukiilisiane ne noyo owamukula, mala babale kimiiko khukhwamila khu siise nisio ekusiliakho omwene khukhwola kumwiiko kwe likhebulila. Bukusi bwe khumulekhuula buloondekhana ne kimiiko nikio omundu oyo akholile.

⁵¹Kiaba ne kiramire kimiiko kimikali khuloondekhana ne nabo alakobosiayo khukhwama mu bukusi nibwo aruungwa khulwe khusikulwa khwewe.

⁵²Kiaba ne kiramire kimiiko mitiiti busa kiri khukhwola khu Mwiiko kwe likhebulila, bauliilisiane naye khuloondekhana ne kimiiko kie bukholi busikaale khu niye, mala aruunge khuloondekhana ne khusikulwa khwewe.

⁵³Akhoya aliindwa nga yaba owaandikwa khulwe khufukiilisiana khwe kumwiiko mulala. Ne omwami wewe akhaba omurafu khu niye tawe.

⁵⁴“Ne aba nakhalekhuliilwe mungila yino tawe, aba niye ne babaana bewe bakhalekhuulwe mu mwiiko kuloondakho khu kwe likhebulila.

⁵⁵Sikila ba Isiraeli bali khwise nga bakholi. Bali bakholi base nibo nakula khukhwama mu sibala sia Misiri. Ese ndi Wele Omunyali Owa Bioosi, Wele wenywe.”