Read lubukusu Bal. 26 Bible Online

Bal. 26 - lubukusu bible

Bal. 26

¹ “Mukhekholela biwele, namwe mwemisia bifwaani bie kamabaale mala mwabisikamila tawe. Sikila ese ndi Wele Omunyali Owa Bioosi, Wele wenywe.

²Liinda chisabato chase mala murie abuundu ase atakatifu. Sikila ese ndi Wele Omunyali Owa Bioosi.

³ “Mwaaba ne mulamenya khuloondekhana ne kamalaka kase ne khukaria,

⁴ndamureerera efula mu siise sisienyekha. Ne kamaloba kalarusia bibiaamo bikali ne kimirongooro kilaama kamatuunda.

⁵Khuula khwenywe khwe biakhulia khukhachiililile, khukhwola likesa lie kimisabibu, ne likesa lie kimisabibu khukhwola biise bie khumiicha. Mukhabe ne buli siindu nisio mwenya khulia, mala mukhamenye mu muleembe mu sibala sienywe.

⁶“Khamuelesie kumuleembe mu sibala sienywe, mala mukone busa ne mukheendekhelele omundu yesi yesi tawe. Ndarusiao mu sibala sienywe chisaang'i che mundaa chindafu, ne liie se likhabemo lundi tawe.

⁷Mukhatimianie basiku benywe, ne khubeerera mwiie.

⁸Babaandu baraano benywe bakhatimanie basiku emia ndala, ne babaandu benywe emia ndala bakhatimanie basiku chielefu ekhumi.

⁹Ne mukhaule basiku benywe ne khuberera mwiie. Khamubiite chikhabi mala muelesie babaana bakali, mala ndinde endakaano niyo nakhola nanywe.

¹⁰Mukhabe musilia biakhulia bienywe nibio mwabuunga, mukhabuungulule nio mubuunge biiyaya.

¹¹Ekhamenye ne nanywe ne se khamubiile tawe.

¹² Khabe ne nanywe, ne lundi ese khabe Wele wenywe ne enywe mukhabe babaandu base.

¹³Ese ndi, Wele Omunyali Owa Bioosi, Wele wenywe, owamurusia mu sibala sia Misiri, nio mulekhe khuba lundi nasioobi babwe tawe. Namurusiisiekho bunyali bubwamubaakho mala namukholile mukeende ne muli balekhuule.”

¹⁴Wele Omunyali Owa Bioosi aloma ali, “Ne kakhali mwaba ne mu khandekeresia ne khuloonda kamalaka kano tawe,

¹⁵mwaba ne muloba khuria kamalaka kase ne khukalekelesia, aba mwafunaake endakaano yase ne nanywe.

¹⁶Khamuelesie kumunaanio kuno: Ndamusiindusia ne literema ne bulwaale bukhaona tawe. Ndamureerera kumurengo kuulamubofusia ne khusasia bulamu bwenywe. Mukhamiiche, ne kakhali se mulanyoolamo sisiindu tawe. Sikila basiku benywe bakhamukhile mala balie nibio mwamiicha.

¹⁷Ndamufutarira nio mukhilwe ne basiku benywe. Ne abo babamubiila balamwamiia, ne mulaba bari lukali, mala mulatima busa omundu nakhamutimaanie tawe.

¹⁸“Ne enyuma wa kano koosi mwaba ne musili khukhundia tawe, ndatasa kumunaanio kwenywe khukhwola kamakhabi saba sikila bubwoni bwenywe.

¹⁹Ndarusiao sileka sienywe siboofu sie khukhwelola, ne ndakhola likulu libe liliomu para nga sichuuma ne sibala sienywe siloma mala siaandalale nga siibia.

²⁰Kimilimo kienywe kioosi se kilamukholelakho sioosi tawe. Sikila kamaloba kenywe kalaba ka busa, yakhaba kimirongooro kienywe kie kamatuunda se kilaama tawe.

²¹“Ne mwaba ne muchiililila khukhumbingania ne khuloba khukhundia, lundi aba ndatasa kumunaanio kwenywe khukhwola saba khuloondekhana ne bubwoni bwenywe.

²²Ndalekhuula chisaang'i che mundaa chindafu khwinywe mala chilera babaana benywe, ne chikhaafu chenywe. Chilamuramia batiiti busa bari nio kimiila kienywe kilaba busa mundu kho tawe.

²³“Ne mwaba bali, enyuma we siiukuumo sino sioosi, musichiililila khukhundekelesia,

²⁴aba sesi ndamuloba mala muelesie kumunaanio khukhwola saba khulwe bubwoni bwenywe.

²⁵Khamureerere liie, khulwe khufunaka endakaano yefwe. Ne mwaba ne mwebuusia mu chingoba chenywe khulwe khukhwekhiinga busiku, ndaruma bulwaale bukhaona tawe akari wenywe mala khukhwola mweane khu basiku benywe.

²⁶Ne khakhole siakhulia sitambeo. Ne bakhasi ekhumi bakhamutekhelenge biakhulia khwiika lilala. Ne bakhamue biakhulia bienywe mu bikelo. Mukhalie ne se mukheekure tawe.

²⁷“Ne mwaba ne mumbiingania ne khulekha khukhumbulila akhaba kano ne kali kario,

²⁸Aba mu lirima liase sesi ndamuloba. Ne samwene ndamua kumunaanio kumukali khukhwola kamakhabi saba, khulwe bubwoni bwenywe.

²⁹Mukhalie babaana benywe basoleeli ne bakhaana.

³⁰Ndasambula abuundu enywe e khusaaya ne khutechula alutare chenywe che biiunya bulayi ne khumwaata kimilaambo kienywe khu bifwaani bienywe bibiafwa khale ebio, lundi ndamubiila.

³¹Khakaluukhasie chingoba chenywe chibe kamakubili, mala sambuule abuundu enywe e khusaaya. Ne lundi ndaloba khung'ayilisia biiunya bulayi bienywe.

³²Khonakile elala sibala sienywe, mala basiku bakhasingisie bakhauke khusibona.

³³Khamusalanisie mu bibala bikeni, mala muloondiekho liie. Chingoba chenywe chiicha khutechulwa ne kamaloba kenywe kalaba busa.

³⁴Ne muli mu sibala sie basiku, sibala sienywe siikhekhale busa siikharie chindaalo che khukonela.

³⁵Nga ne silaba ne sikonela sirio, silakonela khukonela nisio siikhaanyoolangakho mu sabato chenywe nga mwamenyangamo tawe.

³⁶“Ne khwinywe ba barama, khabakhole babe bari lukali, ne baulila embeo neucha kamasaafu ne belukha. Bakhelukhe nga nibo balikho batimania mwiie. Ne bakhakwe busa akhaba omusiku ne akhabatimania tawe.

³⁷Bakhetuyanekho oli ne belukha liie, akhaba omundu nakhaliio obatimania tawe. Se mukhabekho ne kamaani ke khukhwima ebweeni we basiku benywe tawe.

³⁸Mukhafwiile mu sibala sie basiku benywe mala musiikhwe ebweeneyo.

³⁹Batiiti khwinywe baakhabe balamu mu sibala sie basiku benywe, mukhanaanisibweyo busa sikila bubwoni bwenywe mwabene ne bubwoni bwe bakuuka benywe.

⁴⁰“Ne kakhali baba ne beyama bubwoni bwabwe, ne bubwoni bwe bakuuka babwe, ne sileka nisio baakholela,

⁴¹bubwakila nababiila mala nabayila mu sibala sie basiku babwe, ne aaba babaandu be sileka bano ne beboombia mala bafukiilila kumunaanio sikila bubwoni bwabwe,

⁴² aba khakhebulile endakaano yase ne Yakobo, ne Isaaka ne Aburahamu, ne lundi kha khebulile sibala.

⁴³Ne kakhali bakhaanjukhe kamaloba mala kabe busa mundu mo tawe. Ne khukhwola banyoole kumunaanio sikila bubwoni khulwe khulekelesia kamalaka kase.

⁴⁴Ne kakhaba kario, nga ne basiili bario mu sibala sie basiku babwe, se ndabalekha namwe se ndababiila namwe mbabunisilie elala namwe funake endakaano yase ne nabo tawe. Sikila Ese ndi Wele Omunyali Owa Bioosi, Wele wabwe.

⁴⁵Ne kakhali khulwabwe, ndakhebulila endakaano niyo nakhola ne bakuuka babwe nibo narusia mu sibala sia Misiri ebweeni we chikholo chichiindi nio mbe Wele wabwe. Ese ndi Wele Omunyali Owa Bioosi.”

⁴⁶Kano kali kamalaka niko Wele Omunyali Owa Bioosi akhola akari wewe ne Baisiraeli khu sikulu sia Sinai khubirira khu Musa.