Read lubukusu Bal. 27 Bible Online

Bal. 27 - lubukusu bible

Bal. 27

¹Wele Omunyali Owa Bioosi aboolela Musa ali,

²“Boolela babaandu Baisiraeli oli, ‘Ne abao osuubisia khuaana omundu khu Wele Omunyali Owa Bioosi, kumuruungo kuno kukhoya khuaanwa.

³Bukusi bwo omundu we siseecha khukhwamila kimiiko kamakhumi kabili khukhwola kamakhumi sita alaba bukusi bwe bitonyi kamakhumi karaano bie fwesa khuloondekhana ne bukusi bwe Abuundu Atakatifu.

⁴Ne nali omukhasi alaba bukusi bwe bitonyi kamakhumi kataru bie fwesa.

⁵Ne omundu owamila kimiiko kiraano khukhwola kimiiko kamakhumi kabili alaba bukusi bwe bitonyi kamakhumi kabili ke efwesa, nali owe siseecha, namwe bitonyi likhumi nali owe siikhasi.

⁶Ne omwana omutoro omusoleeli khukhwamila kumwesi mulala khukhwola kimiiko kiraano, alaba bukusi bwe bitonyi bie efwesa biraano, khulwo mwana omutoro omukhaana, khukhwamila kumwesi mulala khukhwola kimiiko kiraano, alaba bukusi bwe bitonyi bie fwesa bitaru.

⁷Ne omundu we siseecha nali khukhwamila kimiiko kamakhumi sita khucha angaaki alaba bukusi bwe bitonyi ekhumi na biraano bie efwesa, ne omuloosi owe kimiiko kamakhumi sita khucha angaaki alaba bukusi bwe bitonyi ekhumi bie fwesa.’ ”

⁸“Ne omundu oweaana nali omutaambi lukali, ne se anyala aruunga bukusi bubwarebwao tawe, alareera omundu oyo khu musaayi mala omusaayi alakhalakakho bukusi khuloondekhana nende nisio omundu oyo anyala khuruunga.

⁹“Sisiaayo nisio babaandu baana nga siianwa khu Wele Omunyali Owa Bioosi, siianwa nga esio sirio silaba sitakatifu.

¹⁰Ne omundu oaana akharusiao sisiaayo silayi nisio arobore mala areo sisiindi sibi tawe. Ne aba nakhola ario, bibiaayo bioombi bilaba bitakatifu.

¹¹Ne aba naana esaang'i enyaalu ekhafukiililwa nga siianwa khu Wele Omunyali Owa Bioosi tawe, esaang'i eyo ekhoya yailwa khu musaayi.

¹²Omusaayi alarao bukusi bwayo khuloondekhana ne bulayi bwayo namwe bubi bwayo. Ne bukusi nibwo omusaayi arao bulaba busa burio.

¹³Aaba omweneyo ne enya khukisikula, akhoya atasekho silala khu biraano sie bukusi bwayo.

¹⁴“Kaaba bali omundu aana enju yewe khu Wele Omunyali Owa Bioosi, omusaayi arakho bukusi khuloondekhana ne bulayi bwayo namwe bubi bulimo. Ne bukusi nibwo omusaayi arakho, bulaba busa burio.

¹⁵Ne omundu oaana enju ne enya khukisikula, akhoya aruunge bukusi bwayo mala atasekho sitonyi silala khu biraano sie bukusi bwayo, nio enju eyo ebe eyeewe.

¹⁶“Omundu aba naana sitonyi sie kamaloba kewe ke kumukabwa khu Wele Omunyali Owa Bioosi, bukusi bwasio bularebwakho khuloondekhana ne sikelo sie bumiicho nibwo sibukula. Bilaba bitonyi bie efwesa kamakhumi karaano khulwe chikiilo kamakhumi kabili che eshayiri.

¹⁷Kaaba bali omundu aana kamaloba mu mwiiko kwe likhebulila, bukusi buliio bulaba busa burio.

¹⁸Ne kakhali aaba naana kamaloba kewe enyuma we kumwiiko kwe likhebulila, omusaayi alebaasia bukusi nibwo arakho, khuloondekhana ne kimiiko kiramire khukhwola khu Mwiiko kuloondakho kwe likhebulila. Ne bukusi bulekhisibwakho.

¹⁹Kaaba bali omundu oaana kamaloba enya khukasikula, akhoya aruunge bukusi bwako, mala atasekho sitonyi silala khu biraano sie bukusi obwo ne kamaloba kalaba kakewe lundi.

²⁰Ne kakhali aaba ne akhasikula kumukuunda kwewe tawe, namwe nakukusiisie khu mundu okundi, se kusikulwa lundi tawe.

²¹Ne kakhali kumukuunda ne kuaanwa mu ndaalo che likhebulila kumukuunda okwo kukhabe kumutakatifu kukwaanwa khu Wele Omunyali Owa Bioosi. Ne kulaba kwe basaayi.

²²“Kaaba bali omundu aana khu Wele Omunyali Owa Bioosi kumukuunda nikwo akulile, kukhali kwe kumukabwa tawe,

²³omusaayi alarakho bukusi bwakwo khuloondekhana ne kimiiko kiramire khukhwola khu Mwiiko kwe likhebulila. Ne omundu oyo akhoya aruunga bukusi khu ndaalo eyo neng'ene, nga sisiindu sili sitakatifu khu Wele Omunyali Owa Bioosi.

²⁴Khu Mwiiko kwe likhebulila, kumukuunda okwo kulakalusibwa omwene omubula wakwo, omubula wakwo khukhwama khu be lisaaye liewe.

²⁵“Bukusi bwoosi bularebwao khuloondekhane ne bukusi bubwafukiililwa ne Abuundu Atakatifu.

²⁶“Ne omundu akhaana sisiaayo sibele tawe, sikila sili khale sia Wele Omunyali Owa Bioosi, ebeele ekhaafu namwe likheese sikila bili bia Wele Omunyali Owa Bioosi.

²⁷Ne ekhaafu eyo namwe sisiaayo siaaba ne sili sinyaalu aba alabikula khulwe bukusi bubwareebwao, ne khutasakho silala khu biraano sie bukusi bwayo. Yaba ne bikhasikulwa tawe, binyala biakusibwa khu mundu okundi khulwe bukusi bubwarebwao.

²⁸ “Se aliio omundu onyala akusia, namwe akula sisiindu siosi siosi sisiianwa khu Wele Omunyali Owa Bioosi tawe, abele omundu namwe sisiaayo namwe kamaloba ke luuya. Sikila buli siianwa sili sitakatifu lukali khu Wele Omunyali Owa Bioosi.

²⁹Omundu yesi yesi oaanwa khubunisibwa se anyala asikulwa tawe, akhoya erwe.

³⁰ “Silala khu khumi, sie likesa lie bibiaamo bie kamaloba, yakhaba neli engaanu khukhwama mu mukuunda namwe kamatuunda khukhwama khu mirongooro bili bitakatifu khu Wele Omunyali Owa Bioosi.

³¹Ne aaba omundu ne enya khusikula silala khu khumi siewe, akhoya atasekho silala khu biraano.

³²Ne buli sitonyi sie likhumi sie chikhaafu ne kamakheese, biili asi wo mwayi, silaba sitakatifu khu Wele Omunyali Owa Bioosi.

³³Omwene biaayo akharoboramo bilayi namwe biibi tawe. Namwe akhakaluukhasia akobosiao sisiindi tawe. Ne aakhola ario, aba bibiaayo bioombi bilaba bitakatifu. Ne aba se bilasikulwa tawe.

³⁴“Kano kali kamalaka niko Wele Omunyali Owa Bioosi aelesia Musa khu sikulu sia Sinai khulwe babaandu ba Isiraeli.”