Read lubukusu Bal. 3 Bible Online

Bal. 3 - lubukusu bible

Bal. 3

¹“Kaaba bali siianwa sio mundu sili embosio eye kumuleembe, ne asiaamia mwituuli lie chikhaafu chewe, euunwa namwe emasoti, ekhoya ebe endayi ekhalimo bubi ebweeni wa Wele Omunyali Owa Bioosi tawe.

²Omundu oyo alara kumukhono kwewe khu murwe kwe siianwa siewe mala asirere amuliango kwe Liiema lie kumuse. Ne ba okhwa Aruni basaayi, balaanyaka kamalasile babotookhelesie chimbeka chine choosi cha alutare.

³Ne khukhwama khu siianwa sie mbosio sie kumuleembe, akhoya aane embosio eye kumulilo khu Wele Omunyali Owa Bioosi. Akhoya aane kiminawa kie munda kiosi,

⁴chimbiko chombi ne kiminaawa kichilikho, asi we yatibini, ne alenyosiakho chimbiko alala ne ndurwe.

⁵Nio basaayi ba okhwa Aruni balabioselia khu alutare sitube ne biianwa bie khukhwosia, biili khu mulilo. Eli embosio eanilwa khu mulilo. Ne kumuuya kwayo kusiimisia Wele Omunyali Owa Bioosi.

⁶“Kaaba bali siianwa siewe sie mbosio eye kumuleembe khu Wele Omunyali Owa Bioosi sili sisiaayo khukhwama mwituuli, siseecha namwe siikhasi, sikhoya siatambamo bubi.

⁷Ne aaba naana limeeme nga siianwa siewe, akhoya aliaana ebweeni wa Wele Omunyali Owa Bioosi.

⁸Ne akhoya arekho kumukhono kwewe khu murwe kwe siianwa siewe mala asireere ebweeni we liiema lie kumuse. Ne ba okhwa Aruni balaanyaka kamalasile babotookhelesie chimbeka chine choosi cha alutare.

⁹Nio khukhwama khu siianwa sie kumuleembe, akhoya aane embosio eye kumulilo khu Wele Omunyali Owa Bioosi. Akhoya aane kiminaawa kialio, kumusieembe kumumuufu, kiminawa kiili siimbi khu mukoongo, ne kiminawa kioosi kikiafuunikha bie munda bioosi.

¹⁰Ne lundi alaana chimbiko chombi, alala ne kiminaawa kichilikho. Alenyosiakho chimbiko alala ne lubeka lulayi lwe siini.

¹¹Ne omusaayi alabioselia khu alutare nga siakhulia siaanilwe ne kumulilo khu Wele Omunyali Owa Bioosi.

¹²“Ne kaaba bali siianwa siewe sili embusi, akhoya akiaana ebweeni wa Wele Omunyali Owa Bioosi.

¹³Akhoya arekho kumukhono kwewe khu murwe kwayo mala akiirire ebweeni we Liiema lie kumuse. Ne ba okhwa Aruni balaanyaka kamalasile babotookhelesie chimbeka chine chosi cha alutare.

¹⁴Ne alasiaana nga siianwa siewe, sie kumulilo khu Wele Omunyali Owa Bioosi. Akhoya aane kiminaawa kie munda kiosi,

¹⁵ne chimbiko chombi ne kiminaawa kiacho kiosi ne lubeka lulayi lwe siini, nisio alenyosiakho alala ne chimbiko.

¹⁶Omusaayi alabioselia bioosi khu alutare nga siakhulia siaanilwe khu mulilo ne siuunya bulayi khusiimisia Wele Omunyali Owa Bioosi. Kiminaawa kioosi kili kia Wele Omunyali Owa Bioosi.

¹⁷Lino likhabe lilaka khu selukho chenywe choosi, ne abuundu osi osi niio mulimenya: mukhaliakho kiminaawa namwe kamalasile tawe.”