Read lubukusu Bal. 4 Bible Online

Bal. 4 - lubukusu bible

Bal. 4

¹Wele Omunyali Owa Bioosi aboolela Musa ali,

²“Boolela babaandu ba Isiraeli oli, omundu yesi yesi ne akhola bubwoni nibwo akheteekile tawe khu siindu siosi siosi nisio Wele Omunyali Owa Bioosi akaania, akhoya akhola kano:

³“Ne aaba ne ali Omusaayi Omukhulu Lukali owachukhwakho kamafura, niye okholile bubwoni mala asaalila babaandu kumusaango, akhoya aane euunwa ekhalimo bubi khu Wele Omunyali Owa Bioosi nga siianwa sirusiao bubwoni.

⁴Akhoya areera euunwa amuliango kwe Liiema lie kumuse ebweeni wa Wele Omunyali Owa Bioosi, ne khura kumukhono kwewe khu murwe kwe uunwa, mala eerere euunwa chana ebweeni wa Wele Omunyali Owa Bioosi.

⁵Nio Omusaayi Omukhulu Lukali owachukhwakho kamafura alabukulakho kamalasile ke uunwa chana mala akareere a Liiema lie kumuse.

⁶Ne Omusaayi Omukhulu Lukali alaronga lulwala lwewe mu malasile mala akaanye khukhwola saba ebweeni wa Wele Omunyali Owa Bioosi, ebweeni we ngubo ekhiinganga Abuundu Atakatifu.

⁷Ne omusaayi akhoya are kamalasile khu njika che khu alutare eye biiunya bulayi chili ebweeni wa Wele Omunyali Owa Bioosi, mu Liiema lie kumuse. Ne kamalasile ke uunwa karamire acha khukachukha asibale sia alutare eye siianwa sie khukhwosia eeli amuliango kwe Liiema lie kumuse.

⁸Ne akhoya arusiekho kiminaawa kioosi kie uunwa eye siianwa sie bubwoni, kiminaawa kie khumala ne kie munda kioosi.

⁹Ne lundi abukule chimbiko chombi ne kiminaawa kikiachifuunikha ne lubeka lulayi lwe siini alala ne chimbiko.

¹⁰Akhoya akhola bulayi bwene nga kiminaawa kirusibwangakho khukhwama khu uunwa eye siianwa sie kumuleembe. Ne Omusaayi akhoya abioselie khu alutare eye biianwa bie khukhwosia.

¹¹Ne omusaayi akhoya abukule lisieelo liayo, chinyama chosi, kumurwe, bileenge biayo, ne bie munda alala ne kamalasile kaayo.

¹²Akhoya asute bioosi abirusie enje we kambi abiiyile abuundu amiliiu. Akhoya abioselie khu mulilo niyo bachukhanga likokhe.

¹³“Kaaba bali babaandu boosi bakhola bubwoni nibwo bakhetekile tawe mala bubwoni obwo se bwamanyikhaane ne babaandu babaandi tawe, bwe khufunaka lilala khu malaka niko Wele Omunyali Owa Bioosi akania, aba bali ne kumusaango.

¹⁴Ne nga becha khumanya bubwoni nibwo bakholile, bakhoya baane euunwa endoro nga siianwa sie bubwoni mala bakireere ebweeni we Liiema lie kumuse.

¹⁵Ne babemeelesi be kumuse bare kamakhono kaabwe khu murwe kwayo ebweeni wa Wele Omunyali Owa Bioosi.

¹⁶Nio Omusaayi omuchukhekho kamafura alabukulakho kamalasile ke uunwa mala akareere mu liiema lie kumuse.

¹⁷Ne omusaayi acha khuroonga lulwala lwewe mu malasile mala akaanye khukhwola kamakhabi saba ebweeni wa Wele Omunyali Owa Bioosi, ebweeni we ngubo ekhiinga Abuundu Atakatifu.

¹⁸Ne akhoya are kamalasile kakaandi khu njika che khu alutare eli mu liiema lie kumuse ebweeni wa Wele Omunyali Owa Bioosi. Ne kamalasile karamire alakachukha asibale sia alutare eye siianwa sie khukhwosia eeli amuliango kwe Liiema lie kumuse.

¹⁹Ne alenyosiakho kiminaawa kie uunwa kioosi mala akioselie khu alutare.

²⁰Alakhola ario khu uunwa yino bulayi bwene nga ne akhola khu uunwa eye siianwa sirusiao bubwoni. Ne mungila yino, Omusaayi alaana embosio khulwe bubwoni bwabwe nio Wele ababeele.

²¹Ne omusaayi alasuta euunwa akirusie enje we kambi, mala akiosie nga ne oosia euunwa eye khunyoa. Esino siianwa sirusiao bubwoni bwe babaandu.

²²“Omuruki nakhola bubwoni nibwo Wele Omunyali Owa Bioosi akaania, nakhetekile tawe, aba ali ne kumusaango.

²³Ne nga bubwoni bwewe ne bumanyikha, akhoya areere endurume ekhalimo bubi tawe.

²⁴Omuruki alarakho kumukhono kwewe khu murwe kwe mbusi mala akiirire abuundu niyo bakhonyelaanga biianwa bie khukhwosia ebweeni wa Wele Omunyali Owa Bioosi. Esino sili siianwa sirusiao bubwoni.

²⁵Nio omusaayi alabukulakho kamalasile ke siianwa sirusiao bubwoni khu lwala lwewe mala akaakhe khu njika cha alutare eye siianwa sie khukhwosia. Ne karamire koosi omusaayi akachukhe asibale owa alutare eye siianwa sie khukhwosia.

²⁶Akhoya osie kiminaawa kie mbusi kioosi khu alutare, nga ne osiaanga kiminaawa kie chimbosio che kumuleembe. Mungila yino omusaayi alaana embosio khulwe bubwoni bwewe, ne Wele alamubeela.

²⁷ “Omundu yesi yesi nakholile bubwoni nibwo Wele Omunyali Owa Bioosi akaania nakhetekile tawe, aba ali ne kumusaango.

²⁸Ne kakhali nga omundu ne amanya bubwoni bwewe nibwo akholile akhoya areere siianwa sie mbusi ekhasi ekhalimo bubi tawe.

²⁹Ne akhoya are kumukhono kwewe khu murwe khwe siianwa sirusiao bubwoni mala asiirire abuundu niio bereranga biianwa bie khukhwosia.

³⁰Ne omusaayi alaroonga lulwala lwewe mu malasile mala akaakhe khu njika cha alutare eye biianwa bie khukhwosia, mala achukhe karamire asibale sia alutare.

³¹Nio omusaayi, alakhalaka kiminaawa kiayo kioosi nga kiminaawa ne kikhalakangwa khukhwama khu biianwa bie kumuleembe. Omusaayi oyo alakioselia khu alutare khulwe kumuuya kumulayi kusiimisia Wele Omunyali Owa Bioosi. Ne alaana embosio khulwe bubwoni bwewe mala alabeelwa.

³²“Ne omundu yuno aaba ne areera limeeme nga siianwa siewe khulwe bubwoni, likhoya libe lisubeeni lilayi likhalimo bubi tawe.

³³Akhoya are kumukhono kwewe khu murwe kwe siianwa sirusiao bubwoni, mala alirire abuundu niio bakhonyelaanga biianwa bie khukhwosia.

³⁴Ne omusaayi alaroonga lulwala lwewe mu malasile ke biianwa birusiao bubwoni, mala akaakhe khu njika cha alutare eye biianwa bie khukhwosia, achukhe karamire asibale sia alutare.

³⁵Nio omusaayi arusiemo kiminaawa kie limeeme nga kiminaawa ne kikhalakwa khukhwama khu biianwa bie kumuleembe. Ne omusaayi alakioselia khu alutare, khu biianwa bie khukhwosia khu Wele Omunyali Owa Bioosi. Omusaayi alaana embosio khulwe bubwoni bwewe nibwo akholile, ne alabeelwa.”