Read lubukusu Bal. 5 Bible Online

Bal. 5 - lubukusu bible

Bal. 5

¹Omundu yesi yesi aaba nalaangwa mu muse khuaana buloli khu niko abona namwe aulila, mala aloba, aba ali ne kumusaango.

²Omundu yesi yesi aaba natiila khu siindu siikhali sitakaase nga esaang'i efu, aba yesi salaba omutakaase tawe. Lundi alaba ne kumusaango khukhwama khu siise nisio amanyila ali etiilile khu siindu esio.

³Omundu aaba natiila khu siindu simayaanu sio mundu, siakhaba sialukano siina nakhamanyile tawe, ne nga namanya nisio akholile, alaba ne kumusaango.

⁴Omundu yesi yesi ne echuba khangu ne akhakanakaane tawe, khukhola liosi liosi, liliechuba liosi liosi lia khangu nilio babaandu bechubaanga, nakhamanyile tawe, nga namanya nilio akholile, aba ali ne kumusaango.

⁵Omundu yesi yesi ne ali ne kumusaango mu kano akhoya eyame bubwoni bwewe.

⁶Akhoya areere siianwa sie bubwoni khu Wele Omunyali Owa Bioosi. Akhoya areere limeeme lisubeeni, namwe embusi ekhasi, khukhwama mwituuli liewe nga siianwa sirusiao bubwoni. Omusaayi alamalao bubwoni bwewe.

⁷Ne kakhali omundu aaba nakhali ne limeeme tawe, akhoya areere kamauusi kamabaya kabili, namwe kamabongobongo kabili khulwe bubwoni nibwo akhola. Lilala lilaba khulwe siianwa sirusiao bubwoni, ne liliindi khulwe siianwa sie khukhwosia.

⁸Akhoya akareere khu musaayi, mala omusaayi anyoe aane liuusi lie siianwa sirusiao bubwoni. Ne lundi omusaayi aborore likosi lie liuusi ne akhakusula kumurwe kwalio kwenyokhakho tawe.

⁹Akhoya aanye kamalasile malala ke siianwa sirusiao bubwoni mu ndulo mwa alutare ne karamire akachukhe asibale sia alutare. Esino sili siianwa simaalao bubwoni.

¹⁰Nio omusaayi alaana liuusi liliindi, nga siianwa sie khukhwosia khuloondekhana ne lilaka. Ne mu ngila yino, Omusaayi alamalao bubwoni nibwo omundu oyo akhola ne alabeelwa.

¹¹Ne omundu aaba nakhali ne kamauusi kabili kamabaya namwe kamabongobongo tawe, akhoya areere sikelo sie khumi sie bufu bunosie bubwoola endubi ndala, khulwe siianwa sirusiao bubwoni nibwo akholile. Akhaburakho kamafura namwe bibiindu biiunya bulayi tawe, sikila buli siianwa sirusiao bubwoni.

¹²Akhoya abureere khu musaayi, ne omusaayi abukhwayekho efuusi nga sitonyi sie khukhebulilwa, mala abwoselie khu alutare, khu ngaaki khwe biianwa biaanilwa khu Wele Omunyali Owa Bioosi. Sino sili siianwa sirusiao bubwoni.

¹³Khwako omusaayi alamalao bubwoni nibwo akholile mu ngila yino, omusaayi alabeela bubwoni nibwo omundu oyo akholile mala omundu oyo alabeelwa. Bufu buurama buli bwo musaayi, bulayi bwene nga biianwa bie biakhulia biramanga ne bibechanga bio musaayi.

¹⁴Wele Omunyali Owa Bioosi aboolela Musa ali,

¹⁵“Omundu yesi yesi nakhola bubwoni nibwo akheteekile tawe, khu siindu siosi siosi sitakatifu khu Wele Omunyali Owa Bioosi, akhoya areere siianwa sie kumusaango khu Wele Omunyali Owa Bioosi, limiiku likhalimo bubi tawe, khukhwama mu lituuli lie bibiaayo biewe. Bukusi bwalio bube mu bitonyi bie efwesa khuloondekhana ne bikelo bie bukusi bwe abuundu atakatifu. Sili siianwa sie kumusaango.

¹⁶Omundu oyo akhoya aruunge khulwe bumayaanu nibwo akholile khu siindu sitakatifu. Akhoya atasekho silala khu biraano bie bukusi bwasio mala aelesie omusaayi. Nio omusaayi alaana embosio khulwe bubwoni bwewe mala omundu oyo alabeelwa.

¹⁷“Omundu yesi yesi nakhola bubwoni, khu siindu siosi siosi nisio Wele Omunyali Owa Bioosi akaania, akhaba nakhetekile tawe, aba ali ne kumusaango, mala omwene okumala.

¹⁸Akhoya arereere omusaayi limiiku likhalimo bubi tawe khukhwama mu lituuli lie bibiaayo biewe. Bukusi bwalio buloondekhana ne sikelo sie siianwa simala bubwoni. Omusaayi alaana embosio emaalao bubwoni nibwo omundu oyo akholile nakhamanyile tawe, mala alabeelwa.

¹⁹Sili siianwa simala bubwoni. Sikila ali ne bubwoni ebweeni wa Wele Omunyali Owa Bioosi.”