Read lubukusu Bal. 6 Bible Online

Bal. 6 - lubukusu bible

Bal. 6

¹ Wele Omunyali Owa Bioosi aboolela Musa ali,

²“Omundu yesi yesi nakhola bubwoni khu Wele Omunyali Owa Bioosi khulwe khulekha khuruunga owasie sitonyi sie kumusiingo, namwe khulwe bunuuli namwe khulwe khukhupia siibi owasie

³namwe abe ne anyoolile sisiindu siitibile mala echube ne aboola ali se asiboonekho tawe.

⁴Omundu nakhola bubwoni mala amanye ali, ali ne kumusaango, khukhwola aruunge buli sindu nisio anyoola mu bunuuli namwe nisio anyoola mu khupia okundi siibi, namwe kumusiingo nikwo anyoola khu wasie namwe nisio angala.

⁵Akhoya akalusieo mu bwichufu sisiindu siosi siosi nisio echubilakho mu bubeeyi. Ne akhoya atasekho sitonyi silala khu biraano, mala aelesie omwene siindu esio khu ndaalo yewe eye siianwa sirusiao kumusaango.

⁶Akhoya areere khu musaayi nga siianwa siewe sirusiao kumusaango khu Wele Omunyali Owa Bioosi, limiiku likhalimo bubi tawe khukhwama mu lituuli liewe. Ne bukusi bwalio bukhoya bwaba bumanyikhaane bwa ng'ali.

⁷Mungila yino, omusaayi alaana embosio emalao bubwoni bwo mundu oyo ebweeni wa Wele Omunyali Owa Bioosi, mala alabeelwa sisiindu siosi siosi khu biindu nibio aaba ne akhola mala kwaba kumusaango.”

⁸Wele Omunyali Owa Bioosi aboolela Musa ali,

⁹“Boolela Aruni ne babaana bewe oli, Lino nilio lilaka lie siianwa sie khukhwosia. Siianwa sie khukhwosia siikhoya sibe khu alutare siilo sioosi ne kumulilo kuburukhe khu khwola nga busia.

¹⁰Ne omusaayi akhoya afware chingubo chewe cha katani mukari ne khungaaki. Akhoya ayole likokhe lie siianwa sie khukhwosia nisio kumulilo kwosiisie khu alutare mala are andulo we alutare.

¹¹Namalile ario, efuule chingubo chewe cha katani, mala efware chingubo chichiindi nio asute likokhe khukhwama ao aliyile enje we kambi abuundu amiliiu.

¹²Kumulilo khu alutare kukhoya kwachiililila khuburukha ne kukhasimakho tawe. Buli kumutikhinyi omusaayi alaambia chiikhu ne khurakho siianwa sie khukhwosia khu alutare mu khuloondekhana. Nio oseliakho kiminaawa kie siianwa sie kumuleembe.

¹³Buli lwosi kumulilo kukhoya kuchiililile khuburukha khu alutare ne kukhasimakho tawe.

¹⁴“Ne lino lili lilaka lie khuaana biianwa bie biakhulia: Ba okhwa Aruni balabiaana khu Wele Omunyali Owa Bioosi ebweeni wa alutare.

¹⁵Ne omusaayi alakhwayakho mu fuusi bufu bunosie bwe siianwa sie biakhulia ne kamafura kabwo ne biiunya bulayi biili khu siianwa sie biakhulia mala abioselie khu alutare nga sitonyi sie likhebulila, Kumuuya kumulayi kusiimisia Wele Omunyali Owa Bioosi.

¹⁶Ne Aruni ne babaana bewe balalia bisikaale. Balabilia nga kumukaati kukhalimo limela tawe Abuundu Atakatifu. Babiliile khu luuya lwe liiema lie kumuse.

¹⁷Bakhapilamo limela mu mikaati tawe. Nabaeleesie nga sikelo siabwe sie biianwa biase bikholebwa ne kumulilo. Sili sisiindu sitakatifu lukali nga siianwa sirusiao bubwoni lundi ne siianwa sie kumusaango.

¹⁸Buli mundu we siseecha mu baana ba Aruni anyala aliakho. Sikhoya siaba sikelo sie siianwa siabwe sie khukhwosia sia buli lwosi khukhwama khu Wele Omunyali Owa Bioosi mu selukho choosi. Ne yesi yesi otilakho alaba omutakatifu.”

¹⁹Wele Omunyali Owa Bioosi aboolela Musa ali,

²⁰“Esino sili siianwa nisio Aruni ne babaana bewe balarusilia Wele Omunyali Owa Bioosi khu ndaalo niyo Aruni aliaulilwakho. Bakhoya barere silala khwi khumi sie sikelo sie bufu bunosie nga siianwa sie biakhulia sia buli lwosi. Enusu kumutikhinyi lundi enusu ekolooba.

²¹Bulang'oonwa ne kamafura khu siikhalangilo, bureerwa ne butubaanisibwe bulayi, bwarerebwemo kimikaati nga siianwa sie biakhulia mala mu buaane khulwe kumuuya kumulayi kusiimisia Wele Omunyali Owa Bioosi.

²²Omusaayi mulala mu be lisaaye lia Aruni, niye bachukhilekho kamafura oli nga Omusaayi Omukhulu Lukali, alabiaana khu Wele Omunyali Owa Bioosi nga lilaka lia buli lwosi. Bikhosebwe mu bwichufu.

²³Buli siianwa sie biakhulia sio musaayi sikhoya siosibwe simuufu, se siliibwa tawe.”

²⁴Wele Omunyali Owa Bioosi aboolela Musa ali,

²⁵“Boolela Aruni ne babaana bewe oli, lino nilio lilaka lie biianwa birusiao bubwoni. Abuundu niio biianwa bie khukhwosia biirirwa, biianwa birusiao bubwoni bioosi bilererwao ebweeni wa Wele Omunyali Owa Bioosi. Bino bili biianwa bitakatifu lukali.

²⁶Omusaayi oaana khulwe bubwoni, akhoya aliile abuundu atakatifu, khu luuya lwe Liiema lie kumuse.

²⁷Siosi siosi sisitiila khu nyama yayo silaba sitakatifu. Ne kamalasile kayo kosi kaaba ne kaanyiikhe khu ngubo, engubo eyo elasiingibwa Abuundu Atakatifu.

²⁸Ne eningilo eteekhile enyama eyo ekhoya yarwe. Ne yaaba ne tekheelwe mu ningilo eye kumukasa, ekhoya earakarwe mala esiingwe ne kameechi.

²⁹Buli mundu we siseecha mu basaayi anyala aliakho siianwa esio. Sili sitakatifu lukali.

³⁰Ne kakhali siianwa sie bubwoni nisio kamalasile kasio kosi kosi kareerwa mu liiema lie kumuse khuosia abuundu atakatifu, se siilibwa tawe. Sikhoya siosibwa busa.”