Read lubukusu Bal. 7 Bible Online

Bal. 7 - lubukusu bible

Bal. 7

¹Lino lili lilaka lie siianwa sie kumusaango. Lili litakatifu lukali.

²Abuundu niio bakhonyela siianwa sie khukhwosia, bakhoya bakhonyelao siianwa sie kumusaango. Ne kamalasile kayo kakhoya kaanywe kabotookhelele alutare.

³Ne kiminaawa kiayo kioosi kinyosebwekho mala kiaanwe khu alutare kiminaawa kie kumusieembe, ne kiminaawa kie munda.

⁴Lundi chimbiko chombi, ne kiminaawa kichilikho ne siini. Alabukula bioosi alala ne chimbiko.

⁵Omusaayi alabioselia khu alutare nga siianwa sie kumulilo khu Wele Omunyali Owa Bioosi. Esino sili siianwa sie khurusiao bubwoni.

⁶Buli omusaayi owe siseecha yesi yesi anyala waliakho, ne akhoya waliila Abuundu Atakatifu. Sili siianwa sitakatifu lukali.

⁷Siianwa sie kumusaango sili nga siianwa sirusiao bubwoni. Lilaka liako lili lilala. Omusaayi oaana embosio akhoya aloonde lilaka lino.

⁸Ne omusaayi oaana siianwa sie khukhwosia sio omundu yesi yesi, akhoya abukule lisielo lie siianwa sie khukhwosia nisio aanile sibe sisiewe.

⁹Ne buli siianwa sie biakhulia nisio boselie khu mayika ne kikiindi kiosi nikio bapiile khu sifuria, kilaba kio musaayi oanile embosio.

¹⁰Ne buli siianwa sie biakhulia bitubasibwe ne kamafura namwe bibiomu bilaba bie babaana ba Aruni. Lundi bikhoya bikabwe khu buli mulala mu khwakana.

¹¹Elino lino lili lilaka lie embosio eye siianwa sie kumuleembe nisio omundu anyala aanila Wele Omunyali Owa Bioosi.

¹²Aaba nabiaana khulwe khukhupa orio, akhoya aane siianwa sie khusiima sie kimikaati kikhalimo kamamela tawe, kitubasibwemo kamafura, mandasi kakhalimo limela tawe, kabakhilwekho kamafura, ne chikeki kie bufu bunosie kitubasibwemo kamafura.

¹³Khu biianwa biewe bie kumuleembe bie khu khupa orio, akhoya areera siianwa siewe ne kimikaati kilimo kamamela.

¹⁴Akhoya aane khu buli mulala kimikaati ekio, nga siianwa siboofu khu Wele Omunyali Owa Bioosi. Siianwa sibe sio musaayi oanya kamalasile ke biianwa bie kumuleembe khu alutare.

¹⁵Ne enyama eye mbosio eye biianwa bie kumuleembe khulwe khukhupa orio, ekhoya eliibwe khu ndaalo eng'ene. Se akhoya yarama yoola kumutikhinyi tawe.

¹⁶Ne aaba bali omundu aana embosio yewe eli eye khukhwechuba namwe siianwa sie lilienya liewe, embosio eyo ekhoya yaliibwa khu ndaalo niyo eanilekho. Ne bisikale binyala bialiibwa kumutikhinyi.

¹⁷Ne enyama eye mbosio eramirekho khukhwola khu ndaalo ekhola khataru ekhoya yosibwa.

¹⁸Enyama yosi yosi eye mbosio eye siianwa siewe sie kumuleembe ne eliibwa khu ndaalo ekhola khataru, okiaana safukiililwa tawe, namwe se ebalikhwakho khu niye tawe. Elaba enyaalu. Ne yesi yesi okilia alaba ne kumusaango.

¹⁹“Enyama eyitiila khu siindu siosi siosi siikhali sitakaase tawe se laliibwa tawe, ekhoya yosibwa busa. Boosi bali bakwalaafu banyala balia enyama.

²⁰Ne kakhali omundu yesi yesi olia enyama eye siianwa sie kumuleembe sia Wele Omunyali Owa Bioosi nakhetakaasile tawe, omundu oyo alarusibwa mu baandu bewe.

²¹Ne lundi omundu yesi yesi natiila khu siindu siikhali sitakaase tawe, akhaba ne buli bunyaalu bwo mundu, namwe esaang'i ekhali endakase tawe namwe sisiindu siosi siosi siikhali sitakaase, ne mala alie khu siianwa sie kumuleembe kwa Wele Omunyali Owa Bioosi, omundu oyo alarusibwa mu baandu bewe.”

²²Wele Omunyali Owa Bioosi aboolela Musa ali,

²³“Boolela babaandu ba Isiraeli oli, se muliakho kiminaawa kie khaafu, kie likheese namwe kie mbusi tawe.

²⁴Kiminaawa kie sisiaayo sifwiile busa sisiene, ne kiminaawa kiesio nisio esaang'i eye mundaa yiriire, kinyala kiakhola kimilimo kikiindi kiosi ne kakhali se mukhoyele mwakilia tawe.

²⁵Ne omundu yesi yesi olia kiminaawa kie sisiaayo, sie khukhwosia siaanilwe khu Wele Omunyali Owa Bioosi, alarusibwa mu baandu bewe.

²⁶ Litasa khwilio, mu limenya lienywe liosi se mulia kamalasile kosi kosi tawe, akhaba ne kali ke nyuni namwe ke saang'i.

²⁷Ne omundu yesi yesi olia kamalasile alarusibwa mu baandu bewe.”

²⁸Wele Omunyali Owa Bioosi aboolela Musa ali,

²⁹“Boolela babaandu ba Isiraeli oli, omundu yesi yesi oreera siianwa siewe sie kumuleembe khu Wele Omunyali Owa Bioosi, alareera nga embosio khu Wele Omunyali Owa Bioosi khukhwama khu siianwa siewe sie kumuleembe.

³⁰Akhoya omwene areere ne kumukhono kwewe biianwa bibiosibwe khu Wele Omunyali Owa Bioosi. Akhoya areere kiminaawa ne sitindimilo mala abiiane nga siiaanwa siboofu khu Wele Omunyali Owa Bioosi.

³¹Omusaayi alosia kiminaawa khu alutare ne sitindimilo silaba sia Aruni ne babaana bewe.

³²Ne sie lubeka luseecha alaelesia omusaayi nga siianwa khukhwama khu mbosio yewe eye siianwa siewe sie khuosia sie kumuleembe.

³³Ne oyo mu ba okhwa Aruni orusia kamalasile ke siianwa sie kumuleembe ne kiminaawa, abukula sietakho sie lubeka luseecha sibe nga kumukabwa kwewe.

³⁴Nabukula sitindimilo ne sinama sietakho khukhwama mu baandu ba Isiraeli, nga siianwa siabwe sie kumuleembe mala abielesie omusaayi Aruni ne babaana bewe nga sikelo siabwe sia buli lwosi khukhwama khu baandu ba Isiraeli.

³⁵Sino sili sikelo sia Aruni ne babaana bewe khukhwama khu biianwa khu Wele Omunyali Owa Bioosi bibiosibwa. Baelesibwa kumukabwa kuno khukhwamila khu ndaalo niyo bareerwakho kumukhono babe basaayi ba Wele Omunyali Owa Bioosi.

³⁶Wele Omunyali Owa Bioosi alaka Baisiraeli babaelesie sikelo sino, khukhwamila khu ndaalo niyo bareerwakho kumukhono. Sino sili sikelo sie siakhulia khu selukho chabwe choosi.”

³⁷Lino lilaka lie siianwa sie khukhwosibwa, sie biakhulia, sie khurusiao bubwoni, sie kamabi, sie khukhweyaula ne siianwa sie kumuleembe.

³⁸Wele Omunyali Owa Bioosi aelesia Musa kamalaka kano khu sikulu sia Sinai, khu ndaalo niyo alakilisiliakho Baisiraeli mu sichiimi khureera biianwa biabwe khu Wele Omunyali Owa Bioosi.