Read lubukusu Bal. 8 Bible Online

Bal. 8 - lubukusu bible

Bal. 8

¹Wele Omunyali Owa Bioosi aboolela Musa ali,

²“Bukula Aruni alala ne babaana bewe ne chingubo che basaayi, ne kamafura ke khubaakha ne uunwa eye siianwa sie khurusiao bubwoni, kamamiiku kabili, ne sikono sie kimikaati kikhalimo limela tawe.

³Lundi buusia alala sipupu sie babaandu boosi emuliango we Liiema lie kumuse.”

⁴Musa akhola nga Wele Omunyali Owa Bioosi ne amulaka, mala babaandu babuusiana emuliango we liiema lie kumuse.

⁵Nio Musa aboolela sipupu sie babaandu esio ali, “Sino sili sisiindu nisio Wele Omunyali Owa Bioosi alakilisie siikholwe.”

⁶Nio Musa areera Aruni ne babaana bewe abasiinga.

⁷Afwara Aruni likooti ne khumuboa kumusiipi, lundi amufwara ekutuusi, mala amuboa engubo eye khusaayilamo.

⁸Lundi amuraakho engubo eye khu sifuba. Ne khumurakho urimu ne tumimu.

⁹Lundi amufwara sileemba khu murwe, ne khu sileemba chana ebweeni, araakho esahabu, ekuutwa endakatifu nga Wele Omunyali Owa Bioosi ne alakiilisia Musa.

¹⁰Nio Musa abukula kamafura ke khuakha mala aakha liiema lie kumuse ne nebio bioosi bilimo mala abikwalaasia biaba bitakatifu.

¹¹Ne kakaandi akaanyaka khu alutare khukhwola kamakhabi saba. Ne khuchukha kamafura khu alutare ne khu biindu bioosi birumikhwangakho, ne sibuumba ne mwalo wasio, khubikhola bibe bitakatifu.

¹²Ne achukha kamafura ke khukhwamiia khu murwe kwa Aruni mala amuakha khu mukhola abe omutakatifu.

¹³Lundi Musa areera ba okhwa Aruni mala abafwara kamakooti ababoa kimisiipi ne khubafwara chikuutwa che chingubo nga Wele Omunyali Owa Bioosi ne alakiilisia Musa.

¹⁴Nio areera euunwa eye siianwa sirusiao bubwoni mala Aruni ne babaana bewe baara kamakhono kabwe khu murwe kwe uunwa eye siianwa sirusiao bubwoni.

¹⁵Nio Musa akikhonya, mala abukula kamalasile, arongamo lulwala lwewe ne khu kaakha khunjika che khu alutare, achibotookhelela ne khu kwalaasia alutare. Lundi aachukha kamalasile asi wa alutare, nio akhola alutare yaba endakatifu ne khu kikwalaasia.

¹⁶Musa abukula kiminaawa kie munda kiosi ne siini ne chimbiko chombi ne kiminaawa kiacho mala Musa abioselia khu alutare.

¹⁷Ne kakhali abukula bitonyi bie uunwa bibiarama alala ne lisielo liayo, chinyama ne kamasisie mala abioselia enje we kambi nga Wele Omunyali Owa Bioosi aba ne aalaka Musa.

¹⁸Nio arusia limiiku lie siianwa sie khukhwosia. Ne Aruni ne babaana bewe bara kamakhono kabwe khu murwe kwe limiiku.

¹⁹Mala Musa aalikhonya ne khuanyaka kamalasile abotookhelesie alutare.

²⁰Ne nga limiiku ne liasachwa, Musa osia kumurwe ne chinyama nicho basachile ne kiminaawa.

²¹Ne nga bie munda ne bileenge ne biasiingwa, Musa osia limiiku limuufu khu alutare, nga siianwa sie khukhwosia, kumuuya kusiimisia, siianwa sie khukhwosibwa khu Wele Omunyali Owa Bioosi nga omwene ne alaka Musa.

²²Nio Musa arusia limiiku liliindi khulwe khukhwaulwa khwa Aruni ne babaana bewe. Aruni ne babaana bewe bara kamakhono kabwe khumurwe kwe limiiku elio.

²³Nio Musa aalikhonya, mala abukulakho kamalasile kalio aara khu khuru khwa Aruni khu seecha ne khu lwala luboofu lwe kumukhono kwewe kumuseecha ne khu lwala luboofu lwe sikele siewe siseecha.

²⁴Ba okhwa Aruni bareerwa mala Musa aabara kamalasile khu khuru khu seecha ne khunjala chabwe chimboofu cha buli mukhono kumuseecha ne khunjala chabwe chimboofu che bikele biseecha, mala Musa aanyaka kamalasile abotookhelesia alutare.

²⁵Nio abukula kiminaawa ne kumusieembe kulikho kiminaawa, ne kiminaawa kie munda kie khwisombo, ne siini, ne chimbiko chombi, ne kiminaawa chakio nende sietakho siseecha.

²⁶Ne khukhwama mu ndubi eye kimikaati kikhalimo limela tawe, kikiaba ebweeni wa Wele Omunyali Owa Bioosi, abukulamo kumukaati mulala kukhalimo limela tawe, ne kumukaati mulala kwe kamafura, ne mandasi, mala abira khu minaawa khu ngaki ne khu sietakho siseecha.

²⁷Nio abukula bino bioosi aelesia Aruni ne babaana bewe, mala abireera nga siianwa sie khuaana ebweeni wa Wele Omunyali Owa Bioosi.

²⁸Nio Musa abibukula khukhwama mukhono mwabwe mala abioselia khu alutare ne siianwa sie khukhwosia nga siianwa sie khukhwaula. Kumuuya kumulayi kusiimisia, siianwa sie khukhwosibwa khu Wele Omunyali Owa Bioosi.

²⁹Ne Musa abukula sitindimilo mala asireera nga siianwa ebweeni wa Wele Omunyali Owa Bioosi. Siaba sikelo sia Musa sie limiiku lie khukhwaulwa, nga Wele Omunyali Owa Bioosi ne alaka Musa.

³⁰Nio Musa abukula malala khu mafura ke khuaakha ne kamalasile kakaba khu alutare mala aara khu Aruni ne khu ngubo chewe, lundi akhaba khu ba okhwa Aruni ne khu ngubo chabwe. Nio akhola Aruni ne chingubo chewe aba omutakatifu, akhaba babaana bewe ne chingubo chabwe bosi baba batakatifu alala ne naye.

³¹Nio Musa aboolela Aruni ne babaana bewe ali, “Tekhela chinyama amuliango kwe liiema lie kumuse, mala mulileo ne kimikaati kiili mu ndubi eye biianwa bie khukhwaulwa, nibio nakhulakiilisia ne mboola ndi, ‘Aruni ne babaana bewe bakhoya balie.’

³²Ne enyama erama ne kimikaati yosibwe ne kumulilo.

³³Ne khulwe chindaalo saba se mularura amuliango kwe liiema lie kumuse elio tawe, nabwila nga chindaalo che khukhwaulwa ne chiliwa. Sikila khuchukhwakho kamafura lilabukula chindaalo saba.

³⁴Kakholekhe endaalo eya luno, kaalakwa ne Wele Omunyali Owa Bioosi kakholwe khumurusiakho enywe bubwoni.

³⁵Mukharame amuliango kwe liiema lie kumuse kumuusi ne silo, khulwe chindaalo saba, ne mukhola niko Wele Omunyali Owa Bioosi alakiilisia, mukhakhola murio mwafwa tawe kamenako niko naboolelwa.”

³⁶Nio Aruni ne babaana bewe bakhola bibiindu bioosi nibio Wele Omunyali Owa Bioosi alaka khubirira khu Musa.