Read lubukusu Bal. 9 Bible Online

Bal. 9 - lubukusu bible

Bal. 9

¹Khu ndaalo ekhola munaane Musa alanga Aruni ne babaana bewe ne babemeelesi be Baisiraeli.

²Aboolela Aruni ali, “Bukula euunwa esilikho eng'ana eye siianwa siirusiao bubwoni, ne limiiku lie siianwa sie khukhwosia, bibiaayo bioombi biikhalimo siindu sibi tawe, oane khu Wele Omunyali Owa Bioosi.

³Ne oboolele babaandu ba Isiraeli oli, ‘Bukula endurume eye siianwa sirusiao bubwoni, emoosi ne limeeme. Bikhoya biaba bie bukhulu bwe kumwiiko mulala, biikhalimo ne bubi bwosi bwosi tawe, khulwe siianwa sie khukhwosia.

⁴Lundi bukula euunwa ne limiiku khulwe biianwa bie kumuleembe, biaane nga embosio ebweeni wa Wele Omunyali Owa Bioosi, ne biianwa bie siakhulia bitubasibwe ne kamafura, sikila luno Wele Omunyali Owa Bioosi alamubonekhela enywe.’ ”

⁵Nio bareera ebweeni we liiema lie kumuse nibio Musa alaka, mala babaandu besenda siimbi bebusia boosi ebweeni wa Wele Omunyali Owa Bioosi.

⁶Musa ababoolela ali, “Sino sili sisiindu nisio Wele Omunyali Owa Bioosi amulaka mukhole, nio luyali lwa Wele Omunyali Owa Bioosi lumubonekhele.”

⁷ Nio Musa aboolela Aruni ali, “Yesenda siimbi khu alutare mala oane siianwa siowo sirusiao bubwoni ne siianwa sie khukhwosia mala weosie lundi oosie babaandu babaandi, nga Wele Omunyali Owa Bioosi ne alaka.”

⁸Nio Aruni eseenda siimbi khu alutare mala eera euunwa eng'ana nga siianwa sirusiao bubwoni bwewe.

⁹Babaana ba Aruni bamureerera kamalasile arongemo lulwala lwewe mala aakhe kamalasile khunjika che khu alutare, ne khuchukha kasikale koosi asibale sia alutare.

¹⁰Ne kakhali ooselia kiminaawa, chimbiko ne lubeka lulayi lwe siini khu alutare, nga Wele Omunyali Owa Bioosi ne alaka Musa.

¹¹Ne kakhali enyama ne lisielo aabioselie enje we kambi.

¹²Nio eera siianwa siewe sie khukhwosia. Babaana ba Aruni bamureerera kamalasile, mala aakaanyaka nabotookhelesia alutare.

¹³Bamwakaanisia siianwa sie khukhwosia, kumurwe ne bitonyi bie bibiindi, mala abioselia khu alutare.

¹⁴Asiinga bie munda ne bileenge mala abioselia alala ne biianwa bie khukhwosia khu alutare.

¹⁵Oli amala ario arusia siianwa sie babaandu babaandi, lundi abukula embusi yaba ne eanilwe khulwe bubwoni bwe babaandu mala akiira. Akireera nga siianwa sirusiao bubwoni mungila niyo aanilamo lwe bweeni.

¹⁶Lundi aareera siianwa sie khukhwosia, mala aasiaana khuloondekhana ne kamalaka.

¹⁷Arusia siianwa sie biakhulia mala afumbarakho bufu mu fuusi, mala abwoselia khu alutare. Sino siatasikha khu siianwa sie khukhwosia sia buli mutikhinyi.

¹⁸ Eera eeyi ne limiiku nga embosio eye siianwa sie kumuleembe khulwe babaandu. Babaana bewe bamureerera kamalasile mala aakaanyaka nabotookhelesia alutare.

¹⁹Aruni abuusia kiminaawa kie eeyi nende kie limiiku, kumusieembe ne kiminaawa kie bie munda, chimbiko ne kiminaawa kie khu sini,

²⁰ba okhwa Aruni baara khu ngaaki khwe bitindimilo bie bibiaayo mala Aruni abioselia khu alutare.

²¹Aana bitindimilo ne sietakho siseecha nga siianwa siboofu khu Wele Omunyali Owa Bioosi khulwe basaayi nga Musa ne alaka.

²² Aruni asuta kamakhono kewe angaaki alosia niio babaandu bali mala ababiita chikhabi. Namalile khuaana siianwa sirusiao bubwoni, sie khukhwosia, nende sie kumuleembe, ekha asi.

²³Musa ne Aruni bacha bengila mu liiema lie kumuse, ne nga barura enje, babiita babaandu chikhabi, ne luyali lwa Wele Omunyali Owa Bioosi lwabonekha mu baandu boosi.

²⁴Ne kumulilo kwama khu Wele Omunyali Owa Bioosi mala kwosia biianwa bie khukhwosia ne kiminaawa bibiaba khu alutare. Nga babaandu boosi ne babona bario, bayokela, mala benama bubweeni bwabwe bwetiila asi.