Read lubukusu Yer. 10 Bible Online

Yer. 10 - lubukusu bible

Yer. 10

¹Ee, baandu ba Isiraeli, ulila elomo niyo Wele Omunyali Owa Bioosi amuboolela.

²Wele Omunyali Owa Bioosi aloma ali, “Mukhaloonda engila eye chikholo, namwe mwanaanisibwa khulwe bimanyisio bie mungaaki tawe. Sikila chikholo chinaanisibwa sikila nibio.

³Sikila kimiima kie babaandu kili kie bubeeyi, kumurongooro kwe mu musiru kuremwa, mala kubeechwa ne eaywa no mubeechi.

⁴Babaandu bakurona ne fwesa ne sahabu, bakukhoma kimisumari ne nyundo, kuluma ne se kusabukhamo tawe.

⁵Bifwaani biabwe bili nga bifwaani biriikhirisia chinyuni, ne se binyala bialomaloma tawe, bisutwa busa sikila se binyala biakeenda tawe. Mukhabiria tawe, sikila se binyala biakhola kamamayaanu, namwe biakhola kamalayi tawe.”

⁶Se aliio nga ewe, ee Wele Omunyali Owa Bioosi tawe, ewe oli omukali ne lisina liowo lili lie bunyali.

⁷ Ee, Omwami owe chikholo, naanu okhanyala akhuria ewe? Sikila ewe wenyekha liria mu bakesi boosi Be Chikholo, ne mu bwami bwabwe bwoosi, se aliio oli nga ewe tawe.

⁸Boosi bali basilu lundi bang'ang'afu, banyala beyika sina khukhwama khu sifwaani sie kumusaala.

⁹Efwesa eng'ooneebwe yareerwa khukhwama Tarishishi, ne sahabu khukhwama Ufasi, efwesa ne sahabu eli kimilimo kio mubeechi ne kamakhono ko mubasi. Chingubo chabio chimbuusi ne chikupilia, choosi chili kimilimo kio mundu owamanya kimilimo kiewe.

¹⁰Ne kakhali Wele Omunyali Owa Bioosi ali Wele owa ng'ali ali Wele omenyile mindali lundi Omwami owa mindali Naambwa lirima sibala siterema ne chikholo se chinyala chekhaliilikhila bukhalafu bwewe tawe.

¹¹Enywe mukhababoolele muli, “Bawele bakhaabuumba likulu ne liloba tawe, bakhonakwe ne se baliba abuundu osi osi khwiloba tawe.”

¹²Wele Omunyali Owa Bioosi abaang'ana liloba ne bunyali bwewe abaang'ana sibala ne bukesi bwewe ne khulwe limanya liewe abalaya likulu.

¹³Ne alomaloma ne kumumilo kwewe kameechi ke mungaaki kaoloola ne akhola namufweli afweela chimbeka choosi khwiloba. Akholanga efula eba ne chimbeni mala areera ekhuungu khukhwama munju che libiikhilo liewe.

¹⁴Buli mundu ali omusilu, lundi se ali ne limanya tawe, buli omubasi owe sahabu aambilwe chisoni khulwe bifwaani biewe, sikila bifwaani biewe bili bie bubeeyi ne bulamu se bubilimo tawe.

¹⁵Bifwaani se bilimo bukhala tawe, kimilimo kie khuombelesia busa siise sie siiukuumo siabio bikhonakakwe.

¹⁶Wele owa Yakobo se ali nga nibio tawe, niye owabuumba buli siindu, aroboore Isiraeli khuba babaandu bewe, Lisina liewe bali Wele Omunyali Owa Bioosi.

¹⁷Buusia bibiindu bienywe, Ee enywe muli mu siboe.

¹⁸Sikila Wele Omunyali Owa Bioosi aloma ali, “Lola, ndarusia bamenywa be mu sibala siise sino ne ndabareerera butinyu nibwo babona.”

¹⁹Khuli ne silaamo sikila butinyu bwefwe kamakoonjo kefwe se kalaona tawe, Ne khwaloma khuli ng'ali buno buli butinyu nibwo khulekhaliilikha.

²⁰Kamaeema kefwe konakiibwe, ne kimikoye kikiakaboa kiakituulwe Babaana befwe boosi bachile se baliio tawe. Se aliio oramire okhwombakhila kamaeema ne khurakho chipasia chikhiinga tawe.

²¹Sikila babaayi bali basilu, ne se bamanyile Wele Omunyali Owa Bioosi tawe, khwako se bali na siindu tawe ne kamatuuli kabwe koosi kasalaniile.

²²Ulila burume bulikho bwicha luyoka lwe likoyaana khukhwama ebunaswa khukhola chingoba cha Yuda chibe sichiimi abuundu we chingipwe.

²³Ee Wele Omunyali Owa Bioosi, namanya ndi chingila cho mundu se chili chichewe omwene tawe, ne se aliio omundu omwene oli ne bunyali khu bulamu bwewe tawe.

²⁴Ee Wele Omunyali Owa Bioosi ngololosie mu bung'ali okhangololosia mwirima tawe, busa okhola orio wambunia.

²⁵Elesia kumunaanio chikholo chikhakhusaaya ewe tawe ne khu baandu bakhakhumanyile tawe sikila beera babaandu ba Yakobo babeera ne khubabunia mala bonakaake bumenyo bwabwe.