Read lubukusu Yer. 11 Bible Online

Yer. 11 - lubukusu bible

Yer. 11

¹Wele Omunyali Owa Bioosi amboolela ese Yeremia ali,

²“Ulila kamakhuwa ke ndakaano yino, mala oboolele babaandu ba Yuda ne Yerusalemu.

³Olababoolela oli, Wele Omunyali Owa Bioosi, Wele owa Isiraeli aloma ali, alaamwe omundu okharia kamakhuwa ke ndakaano yino tawe.

⁴Eli endakaano niyo nakhola ne bakuuka benywe nga ne nabarusia mu sibala sia Misiri, sibala sisiaba sibile nga sisiooso sie bichuuma khu nibo. Nababoolela ndi mbulile mala mukhole nga muboolela. Nababoolela ndi mulaba babaandu base ne ese ndaba Wele wenywe.

⁵Nio nolisie lisuubisia nilio nasuubisia bakuuka babwe ndi, ndibaelesia sibala nisio kamabeele ne bubuukhi biseleetikhanga nisio bali nasio luno.” Nio naloma ndi, “Bulayi Wele Omunyali Owa Bioosi.”

⁶Nio Wele Omunyali Owa Bioosi amboolela lundi ali, “Yilwacha kamakhuwa kano koosi mungoba cha Yuda ne khu ngila che lukoba lwa Yerusalemu noloma oli: Ulila kamakhuwa ke ndakaano yino mala mukhole nga kaloma.

⁷Sikila nakaania bakuuka benywe ne mbandalasia nga nabarusia mu sibala sia Misiri. Nachililiile khubakaania khukhwola endaalo yino ne mboola ndi, murie niko muboolela.

⁸Ne kakhaba kario se baria, namwe barekeeresia tawe. Buli mundu achiililila mu sileka sie bumayaanu bwewe. Nabalakiilisia batiile lilaka liase ne kakhali baloba. Khwako nabarakho siiukuumo sisiaandikwa mu lilaka lino.”

⁹Wele Omunyali Owa Bioosi lundi amboolela ali, “Sileka sili mu baandu ba Yuda ne Yerusalemu.

¹⁰Bakoboole mu bwoni bwe bakuuka babwe ba baloba khukhumbulila mala baloondile ne khukholela ba wele babaandi. Baisiraeli ne Bayaudi bafunile endakaano niio nakhola ne bakuuka babwe.”

¹¹Khwako, Wele Omunyali Owa Bioosi aloma ali, “Ndikho mbareerera butinyu nibwo bakhanyala bebacha tawe. Bakhaandilila se ndabarekeeresia tawe.

¹²Nio chingoba cha Yuda ne babaandu ba Yerusalemu balacha balilile bawele nibo boselianga biiunya bulayi, ne kakhali bawele abo se bakhabaonie ne bali mu butinyu tawe.

¹³Sikila bawele benywe Yuda babeele bakali nga chingoba chenywe, ne chialutare chenywe chili chingali mu lukoba lwa Yerusalemu. Chialutare che chisoni echo mwarao khukhwoseliakho biiunya bulayi khu wele Baali.

¹⁴Khwako okhasabilakho babaandu bano namwe walila namwe wasaba mu bweyaangu bwabwe tawe. Sikila sendabarekeeresia ne basaba ne bali mu butinyu bwabwe tawe.”

¹⁵Wele Omunyali Owa Bioosi aboola ali, “Babaandu nibo nasiima balikho bakhola bumayaanu. Bali na ng'ali siina khuuba munju mwase? Bebaasia bali banyoola bekayila butinyu khulwe khulaka ne khurusia chimbosio? Bibienebio bilabareerera busangaafu ku?

¹⁶Wele Omunyali Owa Bioosi amulaanga enywe ali, ‘Kumuseituni kumubisi kwe kamatuunda kamakali kamalayi.’ Ne kakhali luno ndarakho kumulilo kuutirira oli efula mala malekho chisakia chakwo.

¹⁷Wele Omunyali Owa Bioosi akhalake khumureerera butinyu khwinywe sikila bumayaanu nibwo enju eya Yuda ne Yerusalemu bakholile. Bambaambiisie lirima khulwe khukhwoselia Baali biiunya bulayi.”

¹⁸Wele Omunyali Owa Bioosi, aamanyisia ese mala namanya nio anjokesia ese bikholwa biabwe bimayaanu.

¹⁹Ne kakhali naba nga limeeme lioolu nilio bayila abukhonyelo Se namanya ndi barekekhanga kamamayaanu khwise tawe, baloma bali, “Lekha khwonakake kumurongooro ne kamatuunda kakwo, lekha khumurusie mu sibala sie balamu, lekha khumwire alekhe khukhebulilwakho tawe.”

²⁰Ne kakhali, ee Wele Omunyali Owa Bioosi, okhalakanga mu bung'ali, opiimanga kimiooyo ne kamebaasio, lekha ese mbone liliiyacha liowo khu nibo, sikila ese nareere kakaase mwiwe.

²¹Babaandu ba Anatoti, benya ese fwe, bamboolela bali balanjira naaba ne njiililila khukhwilwacha lisina lia Wele Omunyali Owa Bioosi.

²²Khwako Wele Omunyali Owa Bioosi aloma ali, “Ndabaelesia siiukuumo. Babaana babwe baele bakhererwe mwiie ne babaana babwe bakhafwe enjala.

²³Ne se aliio akhaba namulala okharame tawe. Sikila ndireera butinyu khu baandu ba Anatoti mu mwiiko kwe siiukuumo siabwe.”