Read lubukusu Yer. 12 Bible Online

Yer. 12 - lubukusu bible

Yer. 12

¹Ee, Wele Omunyali Owa Bioosi ewe oli Omuluungi, ne khwiloochela ne kakhaba kario, ndakhweloochela butinyu bwase. Siina sikila bamayaanu ne bali bulayi? Siina sikila babaandu bachaama, ne bali bulayi?

²Ewe obabiaala nga kumurongooro mala bekhisia chisia, bachoa mala barakho kamatuunda, baloma kamalayi khwiwe ne kiminwa kiabwe, ne mu miooyo kiabwe bali aleeyi nawe.

³Ne kakhali, Ee Wele Omunyali Owa Bioosi umanyile ese, ewe umbonanga mala ukhakanga chinganakani chase barusie enje nga kamakheese ke khukhonywa mala obaule obare alubeka khulwe ndaalo eye liikhonya.

⁴Sibala silooma khulwe siise siina? Ne bunyaasi bulooma khulwe siise siina? Sikila bumayaanu bwe bamenywa bamwo chisaang'i ne chinyuni chilafwa sikila babaandu baloma bali, “Wele se alabona khumaliilikha khwefwe tawe.”

⁵“Aaba notimile ne babaandu mala bakhutimia waluwa, olatima oriena ne chifarasi? Ne aaba ne okwa khu sibala silayi sie kumuleembe, olakhola oriena mu bichakha bia Yoritani.

⁶Sikila bakhaba bawandaayo be nju eya raraao, bosi bakhuchonganiile, balikho bakhuyiima bakhaba ne baloma kamalayi khwiwe okhabasuubila tawe.”

⁷Wele Omunyali Owa Bioosi aloma ali, “Nanjuukhe Isiraeli, nalobile ekholo yase endobore. Naanile babaandu nibo nasiima khu basiku babwe.

⁸Babaandu base barobore bangaluukhanekho, balikho bambulukhumila nga etalang'i eye mu musiru khwako nababiile.

⁹Babaandu base barobore bali nga enyuni eyibwakaalwe ne kisilili chimbeka choosi. Laanga chisaang'i chiiche mu naikara.

¹⁰Babaayi bakali bonaka kumukuunda kwase kwe kimisabibu, baswalakilila kumukuunda kwase, bakhola kumukuunda kwase kumulayi khuuba sichiimi sisianjukhwa.

¹¹Bakukhola kwekela sichiimi sisianjukhwa, sili sichiimi ebweeni wase. Sibala sioosi sili sichiimi, mbao osikanakanakho tawe.

¹²Khu buli siangalaamwe mu sikulu, babaandu bechile khuyaaya Narumire liie khu sibala sioosi se aliio omundu olamenya ne kumuleembe tawe.

¹³Babiaala engaanu mala bakesa kamawa bakholile kia busa ne se banyoola bukhala tawe sikila lirima liase likali kimikuunda kiabwe kionekhe.”

¹⁴Wele Omunyali Owa Bioosi aloma ali ndi nende nilio ndoma khu baandu bamenyile embi ne Isiraeli baboonake sibala nisio naelesia babaandu base ba Isiraeli, “Kharusie babaandu bamayaanu bano nga okhula kumurongooro mala mbonie Yuda.

¹⁵Ne enyuma we khubarusiao khabakholele siisa lundi mala khabakobosie lundi buli mundu khu mukabwa kwewe ne buli mundu mu maloba kewe.

¹⁶Ne kakhabe kari baaba ne bakhamenieelesie beyike chingila che babaandu base, bechubila mu lisina liase bali, ‘Nga Wele Omunyali Owa Bioosi ne amenyile mindali,’ bulayi bwene nga boosi ne beyikia babaandu base khukhwechuba mu lisina lia Baali, ne baliba babaandu base.

¹⁷Ne kakhali kaaba bali ekholo yosi yosi se eulila tawe, aba ndakibunia mala ngionake.”