Read lubukusu Yer. 13 Bible Online

Yer. 13 - lubukusu bible

Yer. 13

¹Wele Omunyali Owa Bioosi amboolela ali, “Yeremia khoche okule esirwari eya katani mala ofware ne okhakira mu meechi tawe.”

²Nio ese nakula esirwari khuloondekhana ne likhuwa lia Wele Omunyali Owa Bioosi mala nefwara.

³Wele Omunyali Owa Bioosi amboolela lukhola khabili ali,

⁴“Bukula esirwari chana niyo okulile mala winyokhe oche khu Luuchi lwa Efurati mala okikise mu lubangaachi.”

⁵Nio nacha nakikisa khu luuchi lwa Efurati nga Wele Omunyali Owa Bioosi ne andaka.

⁶Enyuma we chindaalo chingali Wele Omunyali Owa Bioosi amboolela ali, “Yinyokha oche khu luuchi lwa Efurati mala obukule esirwari niyo nakhulaka khukisayo.”

⁷Nio nacha e luuchi lwa Efurati, nayaba nabukula esirwari abuundu niio naba ne nakikisa. Ne esirwari eyo yaba yoneekhe se yaba ne bukhala tawe.

⁸Nio Wele Omunyali Owa Bioosi amboolela ali,

⁹“Nja khwonakaka lilielola lia Yuda ne lilielola likali lia Yerusalemu mu ngila yino.

¹⁰Babaandu bamayaanu bano, baloba khuulila chilomo chase. Bali ne sileka baloonda kimiooyo kiabwe ne khuloonda bawele babaandi khubakholela ne khubasaaya. Bakhabe nga esirwari yino, ekhali ne bukhala tawe.

¹¹Bulayi bwene nga esirwari yiambanga khu mundu, nio seesi nakhola enju eya Isiraeli yoosi ne nju eya Yuda yoosi khukhwiamba khwise, nio babe babaandu base, ne kakhali se barekeeresia tawe.”

¹²Okhababoolele oli, “Wele Omunyali Owa Bioosi, Wele owa Isiraeli aloma ali, ‘Buli mwendo kukhechule endali.’ ” Ne kakhali bakhakhuboolele ewe bali, “Eku, wibaasia oli efwe se khumanyile khuli buli mwendo kukhechusibwe endali tawe?”

¹³Nio ewe obaboolele oli, “Wele Omunyali Owa Bioosi aloma ali, ‘Lola ese ndameesia babaandu bamenyile mu sibala sino boosi, babaami be lisaaye lia Daudi, basaayi, bang'oosi ne babaandu bamenyile mu Yerusalemu boosi.

¹⁴Ne ndabakhola babiilane, buli mundu no wasie, raraawe ne babaana babwe alala. Se ndabalekha namwe mbabeele namwe mbakholeele siisa nio ndekhe khubeera tawe.’ ”

¹⁵Ulila mala murekeeresie, ne mukhelola tawe, sikila Wele Omunyali Owa Bioosi alomile.

¹⁶Elesia luyali Wele Omunyali Owa Bioosi, Wele wenywe ne akhareera sisiilima tawe, ne mukhetuya khu sikulu tawe ne musiyiima buwaanga, alakaluukhana bube bubeeleli ne sisiilima sikali.

¹⁷Ne mukhaulila tawe, ndalilila mu bwikisi sikila lilielola lienywe, ndalila burafu mala kamasika keekhe khukhwama mu moni mwase sikila lituuli lia Wele Omunyali Owa Bioosi liabukuliibwe khuyilwa mu mbaambe.

¹⁸Wele Omunyali Owa Bioosi amboolela ali, “Boolela omwami ne maayi wo mwami oli, Bukula chindebe che lilieboombia Sikila chikuutwa chenywe chafuliikhe charurire khu mirwe.”

¹⁹Chingoba che ebunafubo wa Yuda chekaliilwe, se aliio ochikula tawe. Babaandu ba Yuda boosi bayiliilwe mu mbaambe boosi bayiliilwe mu mbaambe.

²⁰“Suta chimoni chenywe mala mubone abo babecha khukhwama ebunaswa. Kamakheese niko mwaebwa kali waena? Kamakheese kenywe ke lukoondo lulayi?

²¹Mulaloma muli siina ne bamwamiia enywe? Babaandu nibo mwabeene mweyikia khuba basaale benywe? Buchuuni se bulamubeela bukali nga bwo mukhasi olumwa?

²²Ne, ne muloma mu miooyo kienywe muli, siina sikila bibiindu bino ne bikhwichilekho. Kali kario sikila bukali bwe bumayaanu bwenywe nilio likila chingubo chenywe ne chitabukha lundi likila ne mupisibwa siibi.

²³Omundu omumali anyala akaluukhasia sikhoba siewe? Namwe engwe enyala yerusiakho kamapala kayo? Kaba ne kanyalikhana aba mwesi munyala mwakhola murio enywe mumwasiima khukhola bumayaanu.

²⁴Ndamusalanisia enywe nga likhuuchi litamuusibwa ne ekhuungu khukhwama mu siangalaamwe.

²⁵Sino nisio sitonyi sienywe sikelo nisio nabisia khumuelesia, sikila mwanjibilila ese mala mwasuubila bubeeyi

²⁶Ese samwene ndamufuula chingubo chenywe mala muambie chisoni.

²⁷Naboone bisinyisia bienywe, bueeyi bwenywe ne liliekoomba lie bukhobani bwenywe, mu bikulu ne mungoongo muli ne silaamo enywe baandu ba Yerusalemu! Mulabukula siise siina nio mube bakwalaafu.”