Read lubukusu Yer. 14 Bible Online

Yer. 14 - lubukusu bible

Yer. 14

¹Wele Omunyali Owa Bioosi aboolela Yeremia khuloondekhana ne siimiyu sikali ali,

²“Sibala sia Yuda silikho silila, ne chingoba chasio chilikho chikwa babaandu bamwo balikho basooma ne lilila lia Yerusalemu liniina Liiuliilikha.

³Bayiinda baruma bakholi babwe kameechi, bacha kameechi mu chisebele, ne se banyoolamo kameechi tawe bakobolayo ne chisoongo busa, baambiilwe chisoni mala bafwiile kimiooyo bebiimba mu moni.

⁴Sikila efula seliio tawe, asi omile, balimi balwala kimiooyo bebiimba mu moni.

⁵Akhaba kicheu mu ndaa anjukha eng'ana yayo, sikila bunyaasi se buliio tawe.

⁶Chipunda mulia chiima khu bikulu khu ngaaki, chiyiima buelelo nga chingipwe, se chibona bulayi tawe sikila se chili ne kamayilwe tawe.

⁷“Akhaba bumayaanu bwefwe ne buli bukali ebweeni wowo, khuyeete, Ee Wele Omunyali Owa Bioosi, sikila lisina liowo, sikila khukhwila enyuma mu lisuubila liefwe khuli khukali, khwakhukholeele ewe bubwoni.

⁸Ewe weng'ene oli lilieyikina lia Isiraeli Ewe niwe okhuonianga efwe siise sie butinyu, siina sikila ewe obe nga omukeni mu sibala siefwe, nga oli khu lukeendo okona abuundu siilo silala ne busia acha?

⁹Siina sikila obe nga omundu owakoyaana, nga omundu we kamaani mala okhanyala aonia tawe? Ne kakhaba kario ee, Wele Omunyali Owa Bioosi, ewe oli akari wefwe, ne efwe khuli babaandu bowo, okhakhulekha tawe.”

¹⁰Wele Omunyali Owa Bioosi aloma khuloondekhana ne babaandu bano ali, “Basiimile khuyiiyayiiya busa ne bacha aleeyi khukhwama khwise se benya khukhwiikhala alala tawe, khwako Wele Omunyali Owa Bioosi se abafukiilila tawe, luno alakhebulila bumayaanu bwabwe, mala abaukuume khulwe bubwoni bwabwe.”

¹¹Wele Omunyali Owa Bioosi amboolela ali, “Okhasaba ese njeete babaandu bano tawe.

¹²Bakhaba ne basila khulia, ese se ndaulila lilila liabwe tawe, ne bakhaba ne baana biianwa bie khukhwosia nende bie biakhulia, se ndabafukiilila tawe. Ne kakhali ndababunia mwiie ne njala ne bulwaale.”

¹³Nio naloma ndi, “Aa, Omwami WELE! Lola bang'oosi bababoolela bali, se bakhabone liie namwe enjala tawe, ne kakhali babasuubisia kumuleembe abuundu ano.”

¹⁴Ne Wele Omunyali Owa Bioosi amboolela ali, “Bang'oosi balikho bang'oola bubeeyi mu lisina liase. Ese se nabaruma namwe se nabalaka namwe se nalomaloma khu nibo tawe. Balikho bang'oola khwinywe kamalola ke bubeeyi, bulakusi bukhali ne bukhala tawe, ne bubeeyi bwe kamebaasio kabwe babeene.

¹⁵Khwako Wele Omunyali Owa Bioosi alomaloma, khu bang'oosi bang'oola mu lisina liewe akhaba ne akhabaruma tawe, bang'oosi bang'oola bali liie namwe enjala se biliicha khu sibala tawe, bang'oosi abo balibunisibwa ne liie ne enjala.

¹⁶Ne babaandu nibo bang'oosi abo bang'oolanga balimwaatwa khu ngila che mu lukoba lwa Yerusalemu, sikila enjala ne liie ne mbao olibasiikha nibo, namwe bakhasi babwe ne babaana babwe be sisoleeli nende be siikhana tawe. Wele Omunyali Owa Bioosi akhabaruungie bubwoni bwabwe.”

¹⁷Wele Omunyali Owa Bioosi alaka Yeremia ali, “Baboolele likhuwa lino, ‘Lekha ndile siilo ne kumuusi ne kamasika kakheema khukhwiikha tawe sikila babaandu base babeene baumiie lukali, mala banyoolile sikhupo sikali.

¹⁸Ne nja mu ndaa, mbona baberiirwa mwiie! Ne nga nja mu lukoba, mbona, bafwa enjala! Bang'oosi ne basaayi sitube bayiiyayiiya mu sibala ne se basimanyile nisio bakhola tawe.’ ”

¹⁹Wele Omunyali Owa Bioosi ewe walobela elala Yuda? Ewe wabiila babaandu ba Sayuni? Siina sikila ne okhuumisie lukali, nio busilikhi se buliio tawe? Khwayiima kumuleembe, ne kakhali bulayi se bwanyoolekha tawe khwayiima busilikhi ne kakhali, khwanyoola butinyu.

²⁰Ee Wele Omunyali Owa Bioosi, khwamanyile bumayaanu bwefwe, ne bumayaanu bwe bakuuka befwe, sikila khwakhukholeele ewe bubwoni.

²¹Ee Wele Omunyali Owa Bioosi, okhakhumwaata tawe khulwe lisina liowo tawe, okhaambia chisoni endebe yowo eye bubwami eye luyali tawe, khebulila, ne okhafuna endakaano yefwe ne nawe tawe.

²²Alikhoo mu bawele be bubeeyi be chikholo onyala areera efula ku? Namwe likulu linyala liaana efula liliene? Se oli ewe, Ee Wele Omunyali Owa Bioosi, Wele wefwe? Efwe khura lilieyikina liefwe mwiwe sikila ewe okhola buli siindu.