Read lubukusu Yer. 15 Bible Online

Yer. 15 - lubukusu bible

Yer. 15

¹ Nio Wele Omunyali Owa Bioosi amboolela ali, “Akhaba Musa ne Samweli ne benyokha mala beme ebweeni wase bandilile, se ndikholela babaandu bano siisa tawe. Barusie ebweeni wase bache!

² Ne bakhureeba bali, ‘Khuche waena?’ Baboolele oli: Wele Omunyali Owa Bioosi aloma ali, ‘Abo babenyekhana khufwa bulwaale, balafwa bulwaale, ne abo babenyekha khufwila mwiie, balafwila mwiie, abo babenyekha khufwa enjala, balafwa enjala, ne abo babenyekha mu mbaambe, balacha mu mbaambe.’ ”

³Wele Omunyali Owa Bioosi aloma ali, “Ese nabisiisie bibiindu biibi bine biicha khubekholekhakho; balafwila mwiie, chimbwa chilakhuruura kimibili kiabwe chinyuni chikilie ne chisaang'i che mundaa chilalia kimibili kiiramire.

⁴ Ndakhola babaandu boosi mu sibala babesiindukhile sikila niko Manase okhwa Hesekia, omwami owa Yuda akhola mu Yerusalemu ne aba omwami.”

⁵Wele Omunyali Owa Bioosi aloma ali, “Naanu olamukholela enywe siisa, ee baandu ba Yerusalemu, namwe naanu olamulila? Naanu olekhebukha khureeba ali muriena?”

⁶Wele Omunyali Owa Bioosi aloma ali, “Mwandekhile ese, muchiililila khukobola enyuma, khwako nakololoosie kumukhono kwase khwinywe mala namubuniisie, naluiliile khukhwekhaliilikha.

⁷Nabaseesile ne euma eye khuseleecha mu bilibwa bie chingoba che sibala siabwe Nabakholile bafwiliilwe, nabuniisie babaandu base, sikila se balekha bumayaanu bwabwe tawe.

⁸Natasile bukali bwe banamulekhwa babwe bakhila kumuyekhe kwe mu nyanja, narereere maawe be basoleeli omwiiri mwiangilwe nabarereere bubeeleli ne butinyu biabechilekho khangu.

⁹Maayi owasaala babaana saba awele kamaani, aochaocha, ayiima buelelo kumuusi kwewe kwekele sisiilima, aambwa chisoni ne khuchangalaala, ne babaandi baramire boosi ndakhola bafwiile mwiie ebweeni we basiku babwe.”

¹⁰Se ndi ne kumuleembe tawe! Siina maayi ne aasaala? Ndikho ndomana ne khuyingana na buli mundu mu sibala se nekopia namwe nekopa chirupia tawe, ne kakhali buli mundu andaama.

¹¹Wele Omunyali Owa Bioosi, lekha bilaamo biabwe bindiile kaaba bali se nakhukholeele ewe bulayi tawe, kaaba bali se nakhwikoonjeleele khu butinyu ne siibi sie basiku base siise sie butinyu tawe.

¹²Omundu anyala afuna sichuuma khukhwama ebunaswa, namwe kumukasa?

¹³Wele Omunyali Owa Bioosi amboolela ali, “Ese ndareera basiku basute kimiaandu ne buiinda bwe babaandu base, elaba engila eye khubaukuuma khulwe bubwoni nibwo bakhola mu sibala sioosi.

¹⁴Ndamukhola mube bakholi be basiku benywe mu sibala nisio mukhamanyile tawe, sikila lirima liase lilinga kumulilo, ne kulaburukha khulwa mindali na mindali.”

¹⁵Nio Yeremia aboolela Wele Omunyali Owa Bioosi ali, “Ee Wele Omunyali Owa Bioosi, ewe umanyile khebulile ese mala unjeete, mala ruungisia abo babakhupia siibi. Mu khwekhaliilikha khwowo okhanjira tawe. Manya oli ndikho khupwa siibi sikila ewe.

¹⁶Ewe wamboolela kamakhuwa kowo mala naulila buli likhuwa. Lundi kasiimisia kumwoyo kwase, sikila ese ndi owowo, Ee Wele Omunyali Owa Bioosi, Wele owe bunyali bwoosi.

¹⁷Ese se nekhala ne babaandu babesangaasia tawe namwe ne senekhoya tawe, nekhala seng'ene, sikila ewe wambukuuma ewe wanjichusia bubeeleli.

¹⁸Siina sikila buchuuni bwase ne buchiililila khutasa? Siina sikila likoonjo liase ne likhaona tawe, Siina sikila ne liloba khuona? Siina sikila ne umbea nga khakheechi, nga khakheechi khateenyanga siise siosi siosi?”

¹⁹Khwako Wele Omunyali Owa Bioosi aloma ali, “Waaba ne okobola ndakhukobosia niio waba, mala wiime ebweeni wase noloma ke bukhala kakhali ka busa tawe, olaba omung'oosi wase. Baleecha niio ewe oli, ne ewe solacha niio bali tawe.

²⁰Ne ese ndakhukhola ewe obe nga lisiisi lisire lie kumukasa, balakhupania ne se balakhukhila tawe, sikila ese ndi nawe khukhuonia ne khukhusikula,

²¹Ndakhusikula khukhwama mu makhono ke bamayaanu, mala khusikule khukhwama khu maani ke bakuluumi.”