Read lubukusu Yer. 16 Bible Online

Yer. 16 - lubukusu bible

Yer. 16

¹Wele Omunyali Owa Bioosi aaboolela Yeremia ali,

²“Okhareera omukhasi namwe wasaala babaana abuundu ano tawe.

³Ndakhuboolela kaacha khwekholekha khu baana balasaalwa ano ne khu basaasi babwe.

⁴Balifwa lufu lubi. Mbao ookhabalile namwe ookhabasiikhe tawe. Kimibili kiabwe kikhabe busa nga kamasisie khwiloba. Bakhabunile mwiie, namwe bafwe enjala mala kimibili kiabwe kibe siakhulia sie chinyuni ne chisaang'i.”

⁵Wele Omunyali Owa Bioosi aloma ali, “Okhengila munju eye kamasika namwe wacha khusooma bafu namwe wabalila tawe. Sikila ese narusiisie khu baandu bano kumuleembe kwase, busiime bwase bwa busiele ne siisa siase.

⁶Bayiinda ne bataambi sitube balafwila mu sibala sino, se balasiikhwa tawe, ne se aliio olabalila namwe ekine namwe abeke kumurwe sikila nibo tawe.

⁷Se aliio olalia ne khunywa khulwe khumuoleelesia ofwisiisie tawe. Se aliio olakholela siisa akhaba ofwisiisie raraawe namwe maawe tawe.

⁸“Okhacha munju eya naikara wikhale nabo, namwe olie ne khunywa nabo tawe.

⁹ Rekeeresia niko Ese, Wele Omunyali Owa Bioosi Wele owa Isiraeli ndikho ndoma ndakamia busangaafu ne khoyo ne babaandu bano bakhabone ne kekholekha.

¹⁰“Ne nga okhababoolele kamakhuwa kano bakhakhureebe sifuno sikila ne khalake khubaukuuma ne bukhalafu. Bakhareebe likoso siina nilio bakholile ne bwoni siina nibwo bakholeele Wele Omunyali Owa Bioosi, Wele wabwe?”

¹¹Ne ewe olibakobosia oli, “Wele Omunyali Owa Bioosi aloma ali, ‘Sikila baraara benywe banjanjukha mala baloonda bawele babaandi ne khubakholela lundi ne khubasaaya. Ne banjanjukha ese ne khulekha khuliinda lilaka liase.

¹²Ne enywe mwakholile kamabi khukhila baraara benywe. Buli mulala khwinywe aloonda sileka sie lilienya liewe limayaanu mala aloba khukhundekeeresia.

¹³Khwako, ndamuoona murure mu sibala sino muche mu sibala nisio enywe namwe baraara benywe bakhamanya tawe. Ne ebweeneyo, mukhakholele bawele babaandi kumuusi ne siilo sikila se ndekesiakho busiime khwinywe tawe.’ ”

¹⁴Wele Omunyali Owa Bioosi aloma ali, “Khwako, chindaalo chilikho chiicha, babaandu se bakhalomekho lundi bali, ‘Nga Wele Omunyali Owa Bioosi ne amenyile mindali, owarusia babaandu ba Isiraeli khukhwama mu sibala sia Misiri,’ tawe.

¹⁵Ne kakhali bakhalome bali, ‘Nga Wele Omunyali Owa Bioosi ne amenyile mindali, owarusia babaandu ba Isiraeli khukhwama mu sibala sie bunaswa ne khukhwama mu bibala bioosi nibio aabasalanisia bacha.’ Kaliba kario sikila ese khabakobosie mu sibala nisio naelesia bakuuka babwe.”

¹⁶Wele Omunyali Owa Bioosi aloma ali, “Lola ndikho nduma balobi bakali mala balabatiila. Enyuma wako ndaruma baayi bakali mala balaaya babaandu bano mu buli sikulu ne lukulu ne mu mbangaachi che chinyaanda.

¹⁷Sikila naboone chingila chabwe choosi se chanjekisilekho tawe namwe bubwoni bwabwe se bwanjekisilekho tawe.

¹⁸Ese ndabaruungia khukhwola khabili khulwe bumayaanu ne bubwoni bwabwe, sikila banyaalutia sibala siase ne bifwaani biili nga kimibili kikiafwa, mala bechusia kumukabwa kwase ne bifwaani bisinyisia.”

¹⁹Ee Wele Omunyali Owa Bioosi, ewe oli kamaani ne buliindi bwase, oli bubwilukhilo bwase biise bie butinyu chikholo chiliicha khwiwe khukhwama buli abuundu khu sibala mala chilome chili, “Bakuuka befwe se baebwa kumukabwa kwosi kwosi tawe ne kakhali baebwa bawele be bubeeyi, bibiindu bia busa, bitamba bukhala.

²⁰Eku, omundu anyala ekholela omwene bawele? Babenabo se bali bawele nibo tawe!”

²¹“Khwako ndabakhola bamanye lino. Ndabakhola bamanye bunyali bwase ne kamaani kase ne balamanya bali lisina liase lili ‘Wele Omunyali Owa Bioosi.’ ”