Read lubukusu Yer. 17 Bible Online

Yer. 17 - lubukusu bible

Yer. 17

¹Wele Omunyali Owa Bioosi aloma ali, “Bubwoni bwa Yuda bwaandikwa ne kalamu eye sichuuma. Bwachongwa khu bipao bie kimiooyo kiabwe ne khu njika chabwe cha alutare ne kalamu eye kamamili.

²Ne babaana babwe bakhebulila chialutare chabwe ne bifwaani bia wele Ashera buli abuundu a murongooro ne khu bikulu,

³bakhebulila akhaba bili khu chingulu ne khu siangalaamwe. Kimiaandu kienywe nende bioosi nibio mwarakho kimiooyo ndabiaana mwiie nga kumuruungo khulwe bubwoni bwenywe mu sibala sienywe sioosi.

⁴Se mulaba ne bunyali khu mukabwa nikwo namuelesia tawe, ne ndamukhola mukholele basiku benywe mu sibala nisio mukhamanyile tawe. Ndakhola ndio sikila lirima liase liaburuukhe nga kumulilo mala kulaburukha khulwa mindali.”

⁵Wele Omunyali Owa Bioosi aloma ali, “Alaamwe omundu osuubila mu mundu wasie mala eyikina kamaani ke kumubili niye kumwoyo kwewe kwarura khu Wele Omunyali Owa Bioosi.

⁶Ali nga khachakha mu siangalaamwe, mala se alibona kamalayi ne kecha tawe. Alamenya abuundu aoomu para mu sichiimi, mu sibala sie lutalalie nisio okhabiaalakho tawe.

⁷Ali ne khabi omundu osuubila mu Wele Omunyali Owa Bioosi, niye lisuubila liewe lili mu Wele Omunyali Owa Bioosi.

⁸ Ali nga kumurongooro kukwabiaalwa a meechi kukwikhisianga chiisi chakwo mu meechi ne se kuria siimiyu ne siicha tawe, sikila kamasaafu kakwo kachiilililanga khuba kamabisi, se kubechanga ne liliembeelela siimiyu ne siicha tawe sikila se kwimanga khuba ne kamatuunda tawe.

⁹Kumwoyo kwo mundu kuli kumubeeyi khukhila bibiindu bioosi, ne kuli kumumayaanu lukali naanu onyala amanya kakaakwo?

¹⁰ Ese Wele Omunyali Owa Bioosi mbimilisianga kamebaasio mala khaka kumwoyo khu buli mundu khuloondekhana ne chingila chewe, khuloondekhana ne bikholwa biewe.”

¹¹Nga enyuni ebuusianga kamaana niko ekhalula tawe niye omundu onyoola buiinda mungila ekhali eya ng'ali tawe, buiinda obwo bulamuwakho nali akari we bulamu bwewe mala ekhumaliilikha khwewe aba omusilu.

¹²Lukaangu lwefwe luli nga endebe eye bubwami eye luyali, eli khu sikulu khukhwama mu khurakikha.

¹³Ee Wele Omunyali Owa Bioosi, ewe oli lilieyikina lia Isiraeli, abo boosi bakhulekha ewe bakhaambisibwe chisoni, abo babakhwanjukha ewe kamasina kabwe kakhaandikwe mwiloba sikila banjuukhe Wele Omunyali Owa Bioosi, sinoko sie kameechi ke bulamu.

¹⁴Ee Wele Omunyali Owa Bioosi, silikhe mala mbone, mbonie ne ndaonisibwa sikila ewe oli efuma yase.

¹⁵Lola babaandu bandeeba bali, “Likhuwa lia Wele Omunyali Owa Bioosi lili waena? Lekha liche!”

¹⁶Ee se nakhuyingiliile ewe khureera butinyu tawe, namwe se nekoombile endaalo eye butinyu tawe, ewe omanyile koosi niko nalomaloma kaba ebweeni wowo.

¹⁷Okhandeerera butinyu tawe ewe oli bubwilukhilo bwase mu siise sie butinyu.

¹⁸Lekha abo babakhupia siibi baambwe chisoni ne okhandekha ese naambwa chisoni tawe, lekha barangaararwe ne ese kharangaararwa tawe, bareerere endaalo eye bubi, babunie ne libuna khukhwola khabili.

¹⁹Wele Omunyali Owa Bioosi amboolela ali, “Cha wime mu Silibwa sie ekholo eya Benjamini, nisio babaami ba Yuda babiriranga ne bengila ne khurura mu lukoba. Cha mu bilibwa bie lukoba lwa Yerusalemu bioosi

²⁰mala olome oli, ‘Ulila likhuwa lia Wele Omunyali Owa Bioosi enywe babaami ba Yuda ne babaandu ba Yuda mweesi ne bamenywa ba Yerusalemu, mubiriranga mu bilibwa bino.’ ”

²¹ Wele Omunyali Owa Bioosi aloma ali, “Ba barekeerefu khulwe bulamu bwenywe ne mukhasutakho sisutwa khu ndaalo eya sabato namwe musibisilie mu bilibwa bie lukoba lwa Yerusalemu tawe.

²² Ne mukhasuta sisutwa khu ndaalo eye Sabato khukhwama munju yenywe, namwe mukhakhola kumulimo kwosi kwosi tawe, ne kakhali liinda endaalo eya Sabato ebe endakatifu, nga nalaka bakuuka benywe.

²³Ne nibo se barekeeresia namwe baulila tawe, ne kakhali bakhola sileka bakhakhola bario baulila mala bakaanila kamekisio tawe.

²⁴“Ne kakhali Wele Omunyali Owa Bioosi aloma ali, ‘Kaaba bali mundekeeresia mala mulekhe khusuta sisutwa mwingisie mu bilibwa bie lukoba luno khu ndaalo eya sabato, mulinde endaalo eya Sabato ebe endakatifu, lundi mulekhe khukhola kimilimo khu ndaalo ng'eneyo tawe,

²⁵aba babaami be lisaaye lia Daudi bakhengile mu bilibwa bie lukoba luno ne batimila khu makaari ne khu farasi. Akhaba babaana babwe, babaandu ba Yuda ne bamenywa ba Yerusalemu bosi bakhakhole bario. Nio lukoba luno lulamenywamo khulwa mindali.

²⁶Lundi babaandu balama mu ngoba cha Yuda ne birekere bibiakara Yerusalemu, khukhwama mu maloba ka Benjamini ne khukhwama Shefela khukhwama mu sibala sie bikulu, ne khukhwama ebunaswa owa Yuda. Bakhareere biianwa bie khukhwosia ne chimbosio, biianwa bie biakhulia ne bupani buunya bulayi ne khureera biianwa bie khusiima munju ya Wele Omunyali Owa Bioosi.

²⁷Ne kakhali enywe mwaba ne mukhandekeeresia, ne khuliinda endaalo eye Sabato mu butakatifu ne khulekha khusuta sisutwa ne khukhwingila nasio mu bilibwa bia Yerusalemu khu ndaalo eye sabato tawe, aba ndabwana kumulilo mu bilibwa bialwo mala kulaburukha buli abuundu mu Yerusalemu mala se kulasima tawe.’ ”