Read lubukusu Yer. 18 Bible Online

Yer. 18 - lubukusu bible

Yer. 18

¹Wele Omunyali Owa Bioosi aboolela Yeremia ali,

²“Yinyokha oche munju yo mubuumbi ne noli mumwenomwo ndakhuboolela kamakhuwa kase.”

³Nio nacha munju yo mubuumbi, ne munju omwo omubuumbi aaba alikho akhola kimilimo kiewe khu ngara eye khubuumbilakho.

⁴Ne sisiindu sie liloba nisio aba ne abuumba sionekhela mu mukhono mwewe, mala asikaluukhasia asikholamo sisiindu sisiindi, nisio omubuumbi omwene alola ali bulayi khubuumba.

⁵Nio Wele Omunyali Owa Bioosi amboolela ali,

⁶“Ee, baandu be nju eya Isiraeli, ese se nyala namukhola enywe nga omubuumbi yuno ne ama khukhola tawe ku? Baandu ba Isiraeli, nga liloba ne lili mukhono kwo mubuumbi, bulayi bwene akhaba enywe mwesi muli busa murio mukhono kwase.

⁷Siise siosi siosi ne mboolela ekholo namwe bubwami ndi ndabwonakaka mala mbubunie,

⁸ne ekholo niyo ndomile yaaba ne kaluukhana yalekha bumayaanu, ndalekha khukhola kamabi niko abeele ndekeekhe khukikhola.

⁹Ne siise siosi siosi nyala naboolela ekholo namwe bubwami ndi ndakiimikha mala ngiandalasie,

¹⁰ne ekholo eyo yaba ne khola bumayaanu mu moni chase, ne khandekeresia tawe, aba ndalekha khukhola kamalayi niko narekekha khukikholela.

¹¹Khwako boolela babaandu ba Yuda ne babaandu bamenyile mu Yerusalemu kamakhuwa kase kano: Wele Omunyali Owa Bioosi aloma ali lola ndikho murekekhera enywe butinyu. Ndikho mwibasilia kamabi. Buli mulala alekhe engila yewe emayaanu. Ng'oona likeenda lienywe ne bikholwa.

¹²Ne kakhali balakobosia bali, ‘Ako ka busa! Efwe khulaloonda kamakhuwa kefwe fwabene, buli mundu alakhola sileka khuloondekhana ne kumwoyo kwewe kumumayaanu.’ ”

¹³Khwako Wele Omunyali Owa Bioosi aloma ali, “Reeba mu kholo choosi, naanu owaulilakho sisiindu nga sino? Babaandu ba Isiraeli bakholile sisiindu sie khuukia.

¹⁴Kamaarara ke khu sikulu sia Lebanoni kawechangakho ku? Chinjichi chichakukha khu ngulu chiteenyanga, chinjichi che kameechi kamanyifu?

¹⁵Ne kakhali babaandu base banjibiliile boselia bupani bawele bakhali ba ng'ali tawe, batiimile chingila chabwe ne kimiyila kimikhale mala bachile khu ngila chikhalisia se baluungiikhe khumuyila tawe.

¹⁶Bakholile sibala siabwe khuba sie khuukia sisiindu sie khulekwa mindali na mindali buli mundu yesi yesi obirao auka mala asisiikha kumurwe.

¹⁷Ndabasalanisia ebweeni we basiku babwe nga ekhuungu eye bukwe, ndabafutarira ne se ndabekhebukha, mu siise sie butinyu bwabwe tawe.”

¹⁸Nio babaandu baloma bali, “yiicha khukhole siindu khu Yeremia. Khukhabe ne basaayi buli lwoosi khukhwekisia elomo, bakesi khukhua likaambila, ne bang'oosi khukhwilwachila likhuwa lia Wele. Lekha khu musitake mala khukhaulilakho likhuwa liewe liosi liosi tawe.”

¹⁹Nio nasaba ndi, “Ee, Wele Omunyali Owa Bioosi ndekeeresie mala oulile liliekoonjelela liase nende niko basiku base bandoma.

²⁰Bumayaanu buli kumuruungo kwe bulayi ku? Ne kakhali banjabiile buko. Khebulila nga nema ebweeni wowo ne ndomaloma bulayi bwabwe, nio olekhe khuba ne lirima khu nibo.

²¹Khwako Wele Omunyali Owa Bioosi lekha babaana babwe bafwe enjala, lekha bafwiile mwiie. Lekha bakhasi babwe bafwisie baseecha ne babaana, lekha be siseecha bafwe lufu lubi, ne basoleeli bafwiile mwiie.

²²Lekha bililo biuliilikhanile mu chinju chabwe, ewe no obareerera babebwaakali matundubiikha! Sikila bayabile buko khukhundusiao, mala bandekire kimireko bikele.

²³Kakhaba kario, ewe, Wele Omunyali Owa Bioosi, omanyile chikwangwaani chabwe choosi che khukhunjira. Okhababeela bubwoni bwabwe, namwe warusia bubi bwabwe ebweeni wowo tawe lekha bakhilwe ebweeni wowo. Bakholele kano mu lirima liowo.”