Read lubukusu Yer. 19 Bible Online

Yer. 19 - lubukusu bible

Yer. 19

¹Wele Omunyali Owa Bioosi amboolela ali, “Cha okule enyuungu. Amboolela lundi ali bukula basaakhulu balala ne basaayi bakhulu balala,

² mala oche mu litooma lia okhwa Hinomu ebwingililo bwe silibwa sia Patisieti mala wilwachile ebweeneyo kamakhuwa niko nja khu khuboolela.

³Olaloma kano: Enywe baami ba Yuda ne bamenywa ba Yerusalemu, ulila kamakhuwa ka Wele Omunyali Owa Bioosi. Wele Omunyali Owa Bioosi, Wele owa Isiraeli aloma ali, lola ese ndikho ndeera butinyu buno abuundu ano nio buli omundu oulila aliesiindukha.

⁴Kaliba kario sikila babaandu bano banjanjuukhe ese mala banyaalutisie abuundu ano khulwe khukhwoseliao bupani khu wele babaandi nibo babene namwe baraara babwe namwe babaami ba Yuda bakhamanya tawe. Lundi sikila bachukha abuundu ano sifuki sikali sie babaandu bakhali ne bubi tawe.

⁵ Lundi bombakhila Baali abuundu aesuta khukhwoseliao babaana babwe basoleeli nga siianwa sie khukhwosia khu wele Baali. Kano ese se nabalaka namwe nabisia namwe nebaasiakho tawe.

⁶Khwako ese Wele Omunyali Owa Bioosi ndoma ndi, ‘Lola chindaalo chilikho chiicha, abuundu ano se alilaangwa lundi bali Tofeti, namwe litooma lia okhwa Hinomu tawe, ne kakhali alilaangwa ali litooma lie khukhoonya.

⁷Ne abuundu ano ndonaka lirekekha lie babaandu ba Yuda ne Yerusalemu litambe bukhala. Ne ndikhola babaandu bamwo bererwe mwiie ebweeni we basiku babwe ne nabo bayiima bulamu bwabwe. Khaane kimibili kiabwe kibe siakhulia sie chinyuni ne chisaang'i.

⁸Ne khakhole lukoba luno lube sisiindu sie khuriisia, sisiindu nisio bauka. Buli mundu olibirao akhauke ne khusiisiikha kumurwe sikila kamaraba kaliio.

⁹Ne ese ndibakhola balie babaana babwe basoleeli ne bakhaana, ne buli mundu alalia kumubili kwo wasie sikila khukhwibulilwa ne butinyu nibwo basiku babwe ne nabo bayiima khu beera bakhabakholele.’

¹⁰Nio olara enyuungu ebweeni we babaandu nibo olaba nabo abo,

¹¹mala olababoolela oli, Wele Omunyali Owa Bioosi aloma ali, ‘Khwako khaare babaandu bano ne lukoba luno nga omundu ne aara enyuungu yo mubuumbi, ekhanyalikhana khubumbwa lundi tawe. Babaandu balisiikhwa mu Tofeti sikila abuundu aandi se alibao e khusiikha tawe.

¹²Wele Omunyali Owa Bioosi aloma ali, ndikhola ndio abuundu ano ne babaandu bamenyileo, mala khole lukoba lube nga Tofeti.

¹³Chinju cha Yerusalemu, ne chinju che babaami ba Yuda, chinju choosi nicho bosiela bupani khu ngaaki khwacho khulwe ching'enieesi ne biianwa bie khunywa biachukhilwe khulwe bawele babaandi, chilanyaaluutwa nga Tofeti.’ ”

¹⁴Nio Yeremia aama Tofeti niio Wele Omunyali Owa Bioosi aamuruma khung'oola mala aacha eema khu luuya lwe Lukaangu lwa Wele Omunyali Owa Bioosi. Aboolela babaandu boosi ali,

¹⁵Wele Omunyali Owa Bioosi, Wele owa Isiraeli aloma ali, “Lola ndikho ndeera khu lukoba luno ne khu ngoba chichiindi chindiiti choosi kamabi koosi niko khalake, sikila bakhola sileka, baloba khuulila kamakhuwa kase.”