Read lubukusu Yer. 2 Bible Online

Yer. 2 - lubukusu bible

Yer. 2

¹Wele Omunyali Owa Bioosi amboolela ali,

²“Cha mala wilwachile babaandu ba Yerusalemu ne khubaboolela oli, Wele Omunyali Owa Bioosi aloma ali, Ese khebulila nga enywe ne mwaba basuubilwa ne musiili baele, nga ne mwasiima ese mu khunyoa nga mwaba babeea, nga mwandondakho mu sichiimi, mu sibala siikhamiichwamo tawe.

³Isiraeli, yaba endakatifu khu Wele Omunyali Owa Bioosi, kamatuunda kewe ke khunyoa. Boosi babakaliakho banyoolekha khuba ne kamabi, butinyu bwabakwakho, Ese Wele Omunyali Owa Bioosi nalomile.”

⁴Ulila elomo ya Wele Omunyali Owa Bioosi, enywe lisaaye lia Yakobo ne enju yoosi eya Isiraeli.

⁵Wele Omunyali Owa Bioosi aboola ali, Bubi siina nibwo baraara benywe banyoola nio banjanjukha, Basaaya bifwaani bitamba bukhala, mala babene batamba bukhala?

⁶Se bareebakho bali, “Wele Omunyali Owa Bioosi ali waena owakhurusia efwe mu sibala sia Misiri, owakhurangirira khwabira mu sichiimi, mu sibala sie sisiangalaamwe ne kamaloo, mu sibala sisioomu para lundi sie sisiilima sikali, sibala nisio omundu akhabirangamo tawe, nimwo omundu akhamenyilemo” tawe.

⁷Ese nabareera mu sibala sie ngakha, khukhwekhoyela kamatuunda kaasio, ne bibiindu biasio bilayi. Kakhaba kario nga mwachamo, mwonakaka kamaloba kase, mala mwanyaalutia kumukabwa kwase.

⁸Basaayi se bareeba bali, “Wele Omunyali Owa Bioosi ali waena?” Tawe. Basaayi base babene, se bamanya ese tawe, Babaami bandekelesia, bang'oosi bang'oola mu lisina lia Baali, mala basaaya bifwaani biikhali ne bukhala tawe.

⁹Wele Omunyali Owa Bioosi aloma ali, “Ese ndi nende niko ndoma khwinywe, lundi khaboolele babechukhulu benywe.

¹⁰Yambukha muche mu bibala bili siimbi ne chinyanja, e Saipurasi mala mubone, namwe ruma omundu e Kedari, mala muloleelesie burekeerefu, Lola sisiindu nga esio sirio sikhabakhoo tawe.

¹¹Ekholo eliyo eyakaluukhasiakho bawele bayo, akhaba ne bakhaba ba ng'ali tawe? Ne kakhali babaandu base bakaluukhasie luyali lwabwe, khulwe esio siikhali ne bukhala tawe.”

¹²Wele Omunyali Owa Bioosi aloma ali, “Yesiindukhila lino lukali, ee Likulu, terema ne buuri bukali,

¹³sikila babaandu base bakholile bumayaanu buno: Bandekhile ese emoni eye kameechi ke bulamu, mala beyabiile chisebele chabwe, chisebele chiteenya.”

¹⁴“Isiraeli se ali nasioobi tawe, se asaalwa mu nyinga cha nasioobi tawe, siina sikila basiku bewe ne bamuaaya?

¹⁵Chitalang'i chimuulukhumila, chaulukhuume lukali. Chakholile kamaloba kewe kabeele sisiangalaamwe, Chingoba chewe chabunile, bamenywa se balimo tawe.

¹⁶Khutasa khwako, babaandu ba Memufisi ne Talipanihesi bakhunulile ekuutwa yowo.

¹⁷Isiraeli ewe wamwene wereerera kano, wanjanjukha ese Wele Omunyali Owa Bioosi, Wele wowo, nga naba ne khurangirira khu ngila.

¹⁸Nono, munyoola siina khulwe khucha e Misiri? Khunywa kameechi ke luluuchi lwa Naili? Namwe siina nisio munyoola khulwe khucha Ashuru, khunywa kameechi ke luluuchi lwa Efurati?

¹⁹Bumayaanu bwowo bulakhuukuuma, Ne liayaaya liowo mwisuubila lilakhurafwira. Manya oli buli bumayaanu lundi burafu khwiwe khulekha Wele Omunyali Owa Bioosi, Wele wowo Liria khwise se likhulimo tawe, Wele Omunyali Owa Bioosi alomile.”

²⁰Wele Omunyali Owa Bioosi aloma ali, “Khale mwaloba bunyali bwase mwaloba khufukiilila kakaase, ne khukhusaaya.” Mwasaaya bifwaani bia wele we lisaaye, khu buli sikulu sileeyi ne amurongooro.

²¹Ne kakhaba kario ese namubiaala nga, kumusabibu kumulayi, khukhwama khu bumiicho bulayi. Nono mwabeele murie nio mwakaluukhana, mala mwekela kimisabibu kie mundaa?

²²Mwakhaba ne mwisiinga ne sisiaangu, mala murumikhire esabuni engali, engekheni eye bubi bwenywe busiimanyikhana busa khwise.

²³Munyala mwaloma muriena muli, “Se mwenyaalutisie tawe, Lundi se mwasaayile Babaali tawe?” Lola liiba lienywe mwitooma, manya niko mukholile, mwabeele nga engamia emasoti eunyiile eseecha.

²⁴Epunda eye mundaa eyanala mu sichiimi, ne eunyiile eseecha se aliio okikhiingilila tawe, eseecha ekiyiima ne se eluwa tawe, biise bie khukhwilukha enyoolekhana khangu,

²⁵Isiraeli mukhaluya bikele bienywe tawe, ne chikokopilo chenywe mukhaulila bulesia tawe ne muli mukhuyiima bawele babaandi tawe. Ne kakhali mwaloma muli “Se linyalikhana tawe, sikila khwasiima bawele be chikholo chichiindi, ne khulabarumikhira.”

²⁶“Nga omwifwi ne aambwa chisoni ne atiliilwe, enju eya Isiraeli eliiambwa chisoni, Nibo, babaami babwe, babemeelesi babwe, basaayi babwe ne bang'oosi babwe.

²⁷Baboolela kumurongooro bali, ‘Ewe oli paapa wase,’ ne libaale bali, ‘Ewe maayi wase.’ Sikila ba khupiile kumukoongo, ne bubweeni bwabwe balangule. Ne kakhali mu biise bie butinyu bwabwe baloma bali, ‘yiicha okhuonie!’

²⁸Ne kakhali bawele benywe nibo mwebechela bali waena? Baaba ne bamuonia mu biise bie butinyu bwenywe lekha benyokhe. Baandu ba Yuda, bawele benywe bali bakali, nga chingoba chenywe!”

²⁹Wele Omunyali Owa Bioosi aloma ali, “Siina sikila ne mumbiiya ese mu liloocha lienywe? Mweesi mwakholeele sileka.

³⁰Naukuuma babaana benywe mu khwenaana, liukuuma se liabakaluukhasia tawe, enywe mwabeene mweera bang'oosi benywe ne chimbalu, nga etalang'i eli njala.

³¹Ne enywe! Selukho enywe, ulila likhuwa lia Wele Omunyali Owa Bioosi. Ese nabeele sichiimi khu Isiraeli, Namwe sibala sie sisiilima sikali? Siina sikila nono babaandu base ne baloma bali, ‘khuli balekhuule, se khulakhukobolakho lundi tawe’?

³²Omwana omukhaana anyala ebilila bibiindu nibio efwaranga, namwe omukhaana we siselelo ebilile engubo eye siselelo? Ne kakhali babaandu base banjibiliile, chindaalo chingali chikhabalikha tawe.

³³Mumanyile khuyiima basaale! Akhaba bakhasi bamayaanu, mwabeekia chingila chenywe.

³⁴Akhaba khu ngubo chenywe, silikho sifuki sie babaandu batambi, bakhali ne bumayaanu tawe. Se wabanyoola ne beeba tawe. Ne kakhaba kario,

³⁵Mwaloma muli, ‘Se khulikho ne bumayaanu tawe, Ng'ali, Wele se alakhukhalalila tawe.’ Lola, ndamukhalakila, khulwe khuloma muli, ‘Se mwakholile bubwoni tawe’

³⁶Mubukula khuuba liiolu khuyiiyayiiya, ne mukaluukhasia chingila chenywe, Bamisiri bakhamuambie chisoni. Nga Ashuru yamuambia.

³⁷Akhaba mu Misiri muliruramo, ne kamakhono kenywe khu mirwe oli baboe, sikila Wele Omunyali Owa Bioosi alobile abo nibo mweyikina, ne nibo se bakhamuyeete tawe.”