Read lubukusu Yer. 20 Bible Online

Yer. 20 - lubukusu bible

Yer. 20

¹Omusaayi Pashihuri, okhwa Imeri, owaba omwimeelesi we Lukaangu lwa Wele Omunyali Owa Bioosi aulila Yeremia ne ang'oola bibiindu bino.

²Nio Pashihuri arusia lilaka bape Yeremia mala amure khu minyololo embi ne silibwa sia ngaaki sie kholo eya Benjamini mu Lukaangu.

³Nga bwasia, Pashihuri alekhuula Yeremia khukhwama khu minyololo. Nio Yeremia amuboolela ali, “Wele Omunyali Owa Bioosi se alakhulaanga lisina liowo, ali Pashihuri lundi tawe, ne kakhali alakhulaanga ali, ‘Liriisia buli Lubeka.’

⁴Sikila Wele Omunyali Owa Bioosi aloma ali, ‘Lola ese ndakhukhola ewe obe liriisia khu wamwene ne khu basaale bowo boosi. Balererwa mwiie ne basiku babwe ewe nololeleele. Ne ese khaane Yuda sioosi mu bunyali bwo mwami owa Babiloni. Ne akhababukule abayile Babiloni mu mbaambe mala ese khaberere ebweeneyo.

⁵Khutasa khwako khaane kimiaandu kie lukoba lwa Yuda kioosi ne bibiindu bie bukhala nende bie bukusi bwe angaaki ne libiikhilo lie babaami ba Yuda mu bunyali bwe basiku babwe. Baliyaaya kimiaandu kiabwe ne khubaamba babayile e Babiloni.

⁶Ne ewe Pashihuri, ne bamenyile munju mwowo boosi mukhache mu mbaambe e Babiloni, mala mukhafwiile ebweeneyo ne khusiikhwa ebweeneyo, ewe ne basaale bowo boosi nibo wang'oolelanga ke bubeeyi.’ ”

⁷Ee, Wele Omunyali Owa Bioosi, ewe wambeyile ese, ne ese nabeyiilwe ewe oli ne kamaani khukhukhila ese ne ewe wakhilile kamaani, njekheelelwa na buli mundu, buli mundu anjokelela ne khukhukhoma.

⁸Buli lwosi ne ndomaloma, khukhwola ndile, njokela ndi, “Sisiayuumba ne libuna!” Wele Omunyali Owa Bioosi, banjekheelela ne bandekelesia buli lwosi, sikila nilwacha likhuwa liowo.

⁹Ne ndoma ndi, “Ndebilila Wele Omunyali Owa Bioosi, namwe se ndomalomakho lundi mu lisina liewe tawe,” Burume bwowo buba nga kumulilo mwise bunjosia lukali khaka kamaani khu bukhiingilila ne se kanyalikhana tawe.

¹⁰Mbulila buli mundu namanya ali “Butinyu buli, buli abuundu lekha khumusitaake khu bakhoongo.” Akhaba basaale base baali siimbi basangaalila khuukwa khwase baloma bali, “Khumukhake khulole wakana khumunyoola mala weyacha.”

¹¹Ne kakhali Wele Omunyali Owa Bioosi ewe oli nase, oli owe kamaani ne bunyali, nabo babakhupia sibi balakhilwa, balaambwa chisoni buli lwoosi, sikila se banyala khukhukhila tawe. Chisoni chabwe se chiliibililwa tawe.

¹²Ee, Wele Omunyali Owa Bioosi, okhalakilanga babaandu mu bung'ali, omanyile ke mumwoyo ne kamebaasio lekha mbone lilieyacha liowo khu basiku base, sikila ese nakhweyikiine ewe.

¹³Yimbila Wele Omunyali Owa Bioosi, Fumia Wele Omunyali Owa Bioosi, sikila areesiisie omubanani, khukhwama khu bunyali bwe babaandu bamayaanu,

¹⁴ Elaamwe endaalo niyo ese nasaalilwakho, Endaalo niyo maayi asaalilakho ekhabiitwa chikhabi tawe.

¹⁵Alaamwe omundu owaboolela paapa ali, “Sangaala sikila wasalile omwana omusoleeli.”

¹⁶Omundu oyo akhoya abe nga chingoba nicho Wele Omunyali Owa Bioosi akwiisia ne akhali ne siisa tawe, lekha aulila lilila kumutikhinyi ne lulwiika mwiaangilwe,

¹⁷sikila se anjirira munda ne khasaalwa tawe. Endi enda eya maayi wase eli siliindwa siase.

¹⁸Siina sikila ne nasaalwa? Khubona sibi ne bubeeleli ne mbe ne chisoni chindaalo che bulamu bwase choosi?