Read lubukusu Yer. 21 Bible Online

Yer. 21 - lubukusu bible

Yer. 21

¹Omwami Sedekia owa Yuda aruma Pashihuri okhwa Kwini no musaayi Sefania okhwa Maseyi khwise ne burume buno.

² Nosiima khusabile Wele Omunyali Owa Bioosi sikila omwami Nebukadinesa owa Babiloni ne banamae bewe balikho bebwaakala lukoba luno. Wakana Wele Omunyali Owa Bioosi anyala akhukholela kamayia mala Nebukadinesa alekha khukhupa.

³Nio Yeremia ababoolela ali,

⁴“Cha muboolele Sedekia muli, Wele Omunyali Owa Bioosi, Wele owa Isiraeli aloma ali, ‘Lola ndakaluukhasia bibiooki bie liie nibio oli nabio, nibio olikho uupanisila omwami owa Babiloni ne Bakalidayo, bakhwibuuliile ewe enje we lisiisi, ese ndabareera alala bengile mu lukoba luno.

⁵Ese samwene ndapana ne nawe ne kamaani koosi mu lirima ne mu burafu ne bukhalafu bukali.

⁶Lundi ndapa bamenywa be lukoba luno, babaandu ne bibiaayo sitube balafwa lufu lurafu.

⁷Ese samwene Wele Omunyali Owa Bioosi ndoma ndi, enyuma wako, khakhuaane ewe Sedekia omwami owa Yuda ne bakholi bowo ne babaandu be mu lukoba luno baona lufu, liie ne njala, khu Nebukadinesa omwami we Babiloni, ne mu bunyali bwe basiku benywe, ne mu bunyali bwabo bayiima khumwiira enywe. Alabeera ne mbalu, se alibakholela siisa namwe abalekhe namwe ababeele tawe.’

⁸Nio Wele Omunyali Owa Bioosi amboolela khuboolela babaandu ndi, Wele Omunyali Owa Bioosi aloma ali, ‘Ndikho nda ebweeni wenywe engila eye bulamu nende eye lifwa.

⁹Oyo olekhala mu lukoba luno aleerwa ne mbalu, ne njala, ne lufu. Ne kakhali oyo orura eaana khu Bakalidayo balikho bamwibuulila enywe alaona omulamu ne alanyoola bulamu bwewe nga kumuruuru kwe liie.

¹⁰Sikila nakhalakile lukoba luno khulwe bumayaanu ne se kali kamalayi tawe. Lulaanwa mu bunyali bwo mwami owa Babiloni mala alalwosia ne kumulilo.’ ”

¹¹“Ne khu nju eye bubwami eya Yuda loma kamakhuwa kano: Ulila likhuwa lia Wele Omunyali Owa Bioosi,

¹²ee enju eya Daudi! Wele Omunyali Owa Bioosi aloma ali, ‘Khalaka bung'ali kumutikhinyi ne sikula oyo onuliilwe khukhwama khu bunyali bwa khayinga, ne busa lirima liase lilaburukha nga kumulilo, ne lilaburukha ne se aliio olalisimia tawe, sikila bikholwa bienywe bimayaanu.’

¹³Wele Omunyali Owa Bioosi aloma kano: Lola, namubiile enywe, bamenywa be mwitooma muli nga lulwanda lwe khumweyeywe. Enywe muloma muli, ‘Naanu okhakhwibwaakale efwe, namwe naanu okheche niio khuli?’

¹⁴Ndamuelesia siiukuumo khuloondekhana ne kamatuunda ke bikholwa bienywe, khabwane kumulilo mu musiru, mala kulosia buli siindu siili siimbi.”