Read lubukusu Yer. 22 Bible Online

Yer. 22 - lubukusu bible

Yer. 22

¹Wele Omunyali Owa Bioosi aboolela Yeremia ali, “Cha mu nju eyo mwami owa Yuda mala omuboolele elomo yino,

²boola oli, ‘Ewe, omwami owa Yuda, owekhala khu sisala sie bubwami bwa Daudi, ne bakholi bowo boosi ne babaandu bowo boosi rekeeresia likhuwa lia Wele Omunyali Owa Bioosi.’ ”

³Wele Omunyali Owa Bioosi aloma ali, “Khola bung'ali ne buluungi mala mureesie abo babanuulwa khukhwama mu bunyali bwabo babapia siibi. Mukhakhola bubi namwe sisiayuumba khu bakeni namwe bafuubi namulekhwa namwe mukhachukha abuundu ano khu mundu okhali ne bubi tawe.

⁴Sikila mwaba ng'ali ne muria likhuwa lino, aba babaami be lisaaye lia Daudi balachiililila khukhwamiia. Nibo alala ne bakholi babwe ne babaandu babwe balachiililila khukhwingila mu bilibwa bino ne batimila khu makaari ne khu farasi.

⁵ Ne mwaba nemukhaulila kamakhuwa kano tawe, nechuba ndi enju yino se eliamiia tawe.”

⁶Sikila Wele Omunyali Owa Bioosi aloma khu mwami owa Yuda ali, “Ewe oli nga Kileati khwise, nga sisekese sia Lebanoni ne kakhaba kario, ndakhukhola nga sisiangalaamwe, lukoba lukhamenywamo tawe.

⁷Ndarekekha babonaki khwiwe, buli mulala ne bulwaani bwewe, balarema kimirongooro kiowo kimitarakwa kimilayi mala bakiosie.

⁸“Ne chikholo chingali chilibira alukoba ano, ne buli mundu alireeba owasie ali, ‘Siina sikila Wele Omunyali Owa Bioosi ne aakhola lukoba luboofu luno ari?’

⁹Ne nibo balikobosia bali, ‘Sikila banjukha endakaano eya Wele Omunyali Owa Bioosi, Wele wabwe, mala basaaya bawele babaandi ne khubakholela kimilimo.’ ”

¹⁰Baandu ba Yuda mukhalila omwami Yosia tawe, namwe mukhasooma lifwa liewe tawe. Ne kakhali lila lukali omwana wewe Yoahasi balikho bacha naye aleeyi sakhakobole lundi tawe, se akhabonekho lundi sibala nisio asaalwamo tawe.

¹¹ Sikila Wele Omunyali Owa Bioosi aloma ali, khuloondekhana ne Yoahasi okhwa Yosia omwami owa Yuda, owamiia mu bweyaangu bwa raraawe Yosia mala arura ano. “Sakhakobole ano lundi tawe.

¹²Ne kakhali akhafwiile abuundu niio bamuyilile mu mbaambe, ne se akhabone sibala sino lundi tawe.”

¹³“Alaamwe omundu owombakha enju yewe mu ngila chikhali cha ng'ali tawe, ne khuramo chisiro mukorofa mu ngaaki mungila ekhali eye bung'ali tawe, omundu okhola owasie amukholele kilimo kia busa, se amuelesia kumuruungo kwewe tawe.

¹⁴Oloma ali, ‘Ndombakha enju emboofu eye chisiro chimbalaayi mukorofa,’ mala arekho kamatirisia, ne khukibotookhelesia ne kimitarakwa mala akaakhe bubesemu.

¹⁵Wibaasia oli ewe oli omwami sikila wombakha enju eye kimitarakwa? Raraao se alia ne khunywa ne khukhola bung'ali ne buluungi ta ku? Nio buli siindu sia mubeela bulayi.

¹⁶Akholela bung'ali bataambi ne babanani, nio buli siindu siamubeela bulayi. Kano niko kakekesia bali wamanya Wele Omunyali Owa Bioosi.

¹⁷Ne kakhali ewe oli ne chimoni ne kumwoyo khulwe khubona bukhala bukhali bwa ng'ali bwong'ene, khulwe khuchukha sifuki sia busa, ne khukhupia babaandu siibi ne khukhola sisiayuumba.”

¹⁸ Khwako Wele Omunyali Owa Bioosi aloma kano khuloondekhana ne Yehoyakimu okhwa Yosia omwami owa Yuda “Se bakhamusoome ne baloma bali, ‘Ee wandaayase!’ Namwe bali, ‘Ee omukooko!’ Tawe. Se bakhamusoome ne baloma bali, ‘Ee omwami!’ Namwe bali ‘Ee omwami owe lukoosi!’ Tawe.

¹⁹Akhasiikhwe nga epunda, Akhakhuruurwe amwaatwe enje we bilibwa bia Yerusalemu.”

²⁰Wele Omunyali Owa Bioosi aloma ali, “Baandu ba Yerusalemu cha e Lebanoni mala muyokele. Cha mu sibala sia Basiani mala mulile, laanga ne muli khu bikulu bia Moabu sikila basaale benywe boosi babunile.

²¹Nalomaloma nanywe siise nisio mwabeela bulayi ne kakhali mwaloba khurekeeresia, lino nilio liba lienywe khukhwama bwana se mwaria lilaka liase tawe.

²²Babemeelesi benywe balauchwa ne mbeo, basaale benywe balatiilwa mwiie. Chingoba chenywe chilaambwa chisoni, sikila bubwoni bwenywe nibwo mwakhola.

²³Mwamenya abeele bulayi mu mitarakwa kikiama Lebanoni mukhakholelwe siisa sikali siise sie buchuuni, buchuuni nga bwo mukhasi olumwa!”

²⁴ Wele Omunyali Owa Bioosi aboolela Yehoyakini okhwa Yehoyakimu omwami owa Yuda ali, “Nga Wele omenyile mindali, akhaba ewe ne wakhabeele embete eye bubwami khu mukhono kwase kumuseecha, nakhakhurusiisiekho,

²⁵nakhura mu bunyali bwabo nibo weendekhelela babaandu bayiima bulamu bwowo. Ndakhura mu bunyali bwa Nebukadinesa omwami owa Babiloni ne Bakalidayo.

²⁶Ese ndikho nja khukhuyila ne kamaani mu mbaambe ewe ne maao mu sibala sisiindi, nisio okhasaalwamo tawe, mala mwembi mukhafwilemo.

²⁷Ne oliekoomba khukobola mu sibala sino lundi ne se olikobolamo tawe.”

²⁸Yeremia areeba ali, omwami Yehoyakini yuno ali busa nga enyuungu eyatikha yalobwa, sisiindu nisio omundu akhenya tawe? Siina sikila niye ne babaana bewe ne bayilwa ne kamaani mu sibala nisio bakhamanyile tawe?

²⁹Ee, sibala, sibala, sibala ulila elomo ya Wele Omunyali Owa Bioosi!

³⁰Wele Omunyali Owa Bioosi aloma ali, “Bala omundu yuno nga okhali no mwana tawe, omundu okhaliindiaala mu bulamu bwewe tawe, sikila mbao khu be lisaaye liewe oliila khu ndebe eye bubwami eye lisaaye lia Daudi, mala amiia lundi sibala sia Yuda tawe.”