Read lubukusu Yer. 23 Bible Online

Yer. 23 - lubukusu bible

Yer. 23

¹“Wele Omunyali Owa Bioosi aloma ali, ‘Bali ne silaamo babaayi babeera ne khusalanisia kamakheese ke mumayilwe mwase!’ ”

²Khwako Wele Omunyali Owa Bioosi, Wele owa Isiraeli aloma ali, “Khuloondekhana ne babaayi baliinda babaandu base! Mwasalanisie kamatuuli kase mala mwakayilile aleeyi ne se mwakiliindile tawe. Lola, ndamuelesia kumunaanio khulwe bumayaanu nibwo mukholile.

³Nio ndabuusia alala babaandu base babarama khukhwama mu bibala bioosi nibio nabasalanisia ne khubareera mu sibala siabwe. Ne bakhasaalane mala bakuche.

⁴Ndibaelesia baruki bakhabaliinde. Ne se bakhabe ne buuri namwe lilieendekhelela tawe, ne se khabaukuume lundi tawe. Ese Wele Omunyali Owa Bioosi nalomile.”

⁵ Wele Omunyali Owa Bioosi aloma ali, “Chindaalo chilikho chiicha nicho ndiroboreramo omwami omuluungi owe lisaaye lia Daudi. Omwami oyo aliruka ne kamakesi ne khukhola bung'ali mu sibala sioosi.

⁶Mu ndaalo che bubwami bwewe babaandu ba Yuda bakhaonisibwe ne Baisiraeli balimenya mu muleembe. Ne alilaangwa bali ‘Wele Omunyali Owa Bioosi ali buonia bwefwe.’ ”

⁷Wele Omunyali Owa Bioosi aloma ali, “Khwako, lola chindaalo chilikho chiicha, babaandu se baliechuba lundi bali, ‘Nga Wele Omunyali Owa Bioosi ne amenyile mindali, owarusia babaandu ba Isiraeli mu sibala sia Misiri’ tawe,

⁸ne kakhali baliechuba bali, ‘Nga Wele Omunyali Owa Bioosi ne amenyile mindali, owarusia lisaaye lia Isiraeli mu sibala sie bunaswa ne khukhwama mu bibala bioosi nibio abeele bachamo.’ Nio balimenya mu sibala siabwe siene esio.”

⁹Khuloondekhana ne bang'oosi, kumwoyo kwase kwambwelemo kamakuumba kase koosi kareenga, ndi nga omundu omumeesi nga omundu niye endali ebirire sikila Wele Omunyali Owa Bioosi, lundi sikila kamakhuwa kewe kamatakatifu.

¹⁰Sikila sibala siechuule bukhobani, sibala sisooma sikila silaamo ne kamayilwe ke mu sichiimi komile. Bikholwa biabwe bili bimayaanu, ne kamaani kabwe se kali ka ng'ali tawe.

¹¹Wele Omunyali Owa Bioosi aloma ali, “Bang'oosi ne basaayi se bakhola ka Wele tawe, akhaba munju mwase nanyoolilemo bumayaanu bwabwe.

¹²Khwako chingila chabwe khu nibo chilaba nga chingila che bumiumiu mu siilima, mu nicho khabayile bache mala bakwemo, sikila ndabareerera butinyu mu mwiiko kwe siiukuumo siabwe.

¹³Mu bang'oosi ba Samaria naboone sisiindu sie busilu bang'oola mu bunyali bwa Baali mala batiimia babaandu base be nju eya Isiraeli.

¹⁴ Ne kakhali mu bang'oosi ba Yerusalemu, naboone sisiindu simayaanu lukali bakhola bueeyi ne khuloma bubeeyi, bayeeta babaandu khukhola bumayaanu, nio se aliio owekanila tawe, boosi babeele nga Sodomu khwise ne bamenywa bamwo nga Komora.”

¹⁵Khwako Wele Omunyali Owa Bioosi, aloma ali khuloondekhana ne bang'oosi, “Lola ese ndabaliisia siakhulia silulu, ne khubaelesia kameechi kalimo bufwisi, sikila khukhwama khu bang'oosi ba Yerusalemu bibiindu biikhali bie buwele tawe biasalaniile mu sibala sioosi.”

¹⁶Wele Omunyali Owa Bioosi aloma ali, “Mukharekeeresia kamakhuwa niko bang'oosi bang'oola khwinywe ne khumwichusia lilieyikina lie bubeeyi tawe. Balomaloma kamalola ke kamebaasio kabwe babeene ne se kaama khu Wele Omunyali Owa Bioosi tawe.

¹⁷Bachiililila khuboolela abo baleka elomo ya Wele Omunyali Owa Bioosi bali, ‘Muli busa bulayi.’ Lundi baboolela buli mundu oloonda chingila chewe mu sileka bali, ‘Mbao butinyu bulikhwichakho tawe’ ”

¹⁸Naanu mu bang'oosi bano owema mu muse kwa Wele Omunyali Owa Bioosi khumanyilisia ne khuulila elomo yewe, namwe naanu owarekeeresia elomo yewe mala akiulila.

¹⁹Lola, embembeesi ya Wele Omunyali Owa Bioosi! Lirima liarurire, sisifuusia sikali silaba khu mirwe kie babooni.

²⁰Lirima lia Wele Omunyali Owa Bioosi se lilawa tawe khukhwola nga ne akhola buli siindu, nisio enya khukhola mumebaasio kewe. Mu ndaalo chichiicha mukhabimanye bulayi bubwene.

²¹“Ese se naruma bang'oosi tawe, ne kakhali bacha busa se nabalomalomakho tawe ne kakhali bang'oola busa.

²²Abanga bema mu muse kwase andi baboolela babaandu base kamakhuwa kase, mala bakharurire khu ngila chabwe chimayaanu, ne khu bikholwa biabwe bimayaanu.”

²³Wele Omunyali Owa Bioosi areeba ali, “Ese ndi busa Wele owa aembi ne sendi Wele we aleeyi tawe ku?

²⁴Omundu anyala ekisa abwikisi nio khamubona tawe? Ese se ndi buli abuundu mwikulu ne khu sibala tawe?

²⁵Nauliile bang'oosi babeeyi bang'oola mwisina liase ne baloma bali, ‘Ndoorire! Ndoorire!’

²⁶Bubeeyi bulabao khukhwola siise siina mu mioyo kie bang'oosi bang'oola bubeeyi bwe kimiooyo kiabwe?

²⁷Bebaasia bali balakhola babaandu base banjibilile khubirira khu marooro kabwe niko baboolana. Bakhola bulayi bwene nga bakuuka babwe ne banjibilila mala baloonda Baali.

²⁸Lekha omung'oosi oli ne kamarooro aboole kamarooro kwewe, ne lekha oyo oli ne lomo yase akiboole mu busuubilifu. Wele Omunyali Owa Bioosi areeba ali: Chikhanja che ngano chilekhana ne ngano ku?

²⁹Wele Omunyali Owa Bioosi aloma ali, ‘Elomo yase seli nga kumulilo, lundi nga enyundo eyarakaka libaale mu bitonyi tawe ku?’

³⁰Wele Omunyali Owa Bioosi aloma ali, ‘Khwako lola, ese nabiile bang'oosi babebana chilomo mala bachiloma nga burume khukhwama khwise.’

³¹Lundi nabiile bang'oosi baloma kakabwe babeene mala baboola bali, ‘Wele Omunyali Owa Bioosi aloma.’ ”

³²Wele Omunyali Owa Bioosi aloma ali, “Lola nabiile abo bang'oola kamarooro ke bubeeyi ne bababoolelanga mala batiimia babaandu base khulwe bubeeyi bwabwe ne busilu. Khwako se bali ne bukhala khu baandu bano tawe.”

³³Wele Omunyali Owa Bioosi aboolela Yeremia ali, “Mulala khu baandu bano, namwe khu bang'oosi namwe khu basaayi ne akhureeba ali, ‘Burume bwa Wele Omunyali Owa Bioosi buli siina?’ Ewe baboolele kamakhuwa kano: Wele Omunyali Owa Bioosi aloma ali, ‘Enywe ninywe burume mala ndikho nja khumumwaata.’

³⁴Ne omung'oosi, omusaayi namwe mulala khu baandu ne aloma ali, ‘Bumiinikhi bwa Wele Omunyali Owa Bioosi’ ese nja khumuelesia siiukuumo nenju yewe.

³⁵Ne kakhali baboolele oli, buli mundu areebe owasie ne lundi buli mundu areebe wandaaye ali, ‘Wele Omunyali Owa Bioosi akobosie ali siina?’ Namwe, Wele Omunyali Owa Bioosi alomalome siina?

³⁶Ne kakhali burume bwa Wele Omunyali Owa Bioosi okhaburarakho lundi tawe, sikila burume buli likhuwa nilio buli mundu aloma, mala mukaluukhasia chilomo cha Wele omenyile mindali, Wele Omunyali Owa Bioosi, Wele wefwe.

³⁷Wele Omunyali Owa Bioosi aboolela Yeremia ali: Reeba bang'oosi oli, ‘Wele Omunyali Owa Bioosi amukobosie ali siina?’ Namwe ‘Wele Omunyali Owa Bioosi alomalome siina?’

³⁸Ne kakhali baaba ne baloma bali, ‘Bumiinikhi bwa Wele Omunyali Owa Bioosi,’ baboolele oli sikila balomile kamakhuwa kano,

³⁹khwako lola, ese ng'ali ndababubukula mbamwaate bandure ebweeni wase. Ndabamwaata nibo ne lukoba nilwo naelesia bakuuka babwe.

⁴⁰Ndabaambia chisoni cha mindali ne liilekwa, ne sikholwa sino se siliibililwa tawe.”