Read lubukusu Yer. 25 Bible Online

Yer. 25 - lubukusu bible

Yer. 25

¹ Mu mwiiko kukhola khane kwe bubwami bwa Yehoyakimu okhwa Yosia omwami owa Yuda nanyoola burume khukhwama khu Wele Omunyali Owa Bioosi khu baandu boosi ba Yuda (kumwenokwo kwaba kumwiiko kwe khunyoa kwo mwami Nebukadinesa omwami owa Babiloni)

²Omung'oosi Yeremia aboolela babaandu ba Yuda boosi ne bamenywa ba Yerusalemu boosi.

³Ababoolela ali, “Khulwe kimiiko kamakhumi kabili na kitaru khukhwamila khu mwiiko kwe khumi na kitaru kwe khukhwamiia khwa Yosia okhwa Amoni omwami owa Yuda khukhwola khu ndaalo yino Wele Omunyali Owa Bioosi amboolelanga ese elomo yewe mala ese muboolela buli busiele ne kakhali se mundekeresianga tawe.

⁴Se mwarekeeresia namwe se mwaulila akhaba Wele Omunyali Owa Bioosi ne achiililila khumurumira enywe bakholi bewe bang'oosi.

⁵Bang'oosi bamuboolela enywe bali, ‘Luno buli mundu khwinywe akaluukhane khukhwama khu ngila yewe emayaanu ne bikholwa biibi mala amenye mu sibala nisio Wele Omunyali Owa Bioosi amuelesie enywe ne bakuuka benywe khukhwama khaale khulwa mindali na mindali.

⁶Mukhacha khu bawele babaandi mwabakholela ne khubasaaya tawe, namwe mukhaambaambia lirima khulwe bikholwa bienywe tawe. Nio se ndamureerera kamabi tawe.’ ”

⁷Wele Omunyali Owa Bioosi aloma ali, “Ne kakhaba kario, se mwandekeresiisie tawe. Ne kakhali mwambambiisie lirima ne kimilimo kie kamakhono kenywe nio mwereerere mwabeene butinyu.”

⁸Khwako Wele Omunyali Owa Bioosi aloma ali, “Sikila enywe se mwaria kamakhuwa kase tawe,

⁹lola ndalaanga chikholo che ebunaswa choosi, ne khulaanga Nebukadinesa, omwami owa Babiloni omukholi wase, ne ndabareera khukhupana ne sibala sino ne bamenywa bamwo, ne khukhupania chikholo che aembi choosi. Ndababunisilia elala mala mbakhole babe babi be khubiyilwa ne khukwa ne khulekwa mindali na mindali.

¹⁰ Khutasa khwako ndabarusiakho kumumilo kwe busangaafu, ne ekhoyo ne kumwenya kwe siselelo ne lisia lie lususi ne buwaanga bwe taa.

¹¹ Sibala sino sioosi silonakwa ne khukhwanjukhwa ne chikholo chino chilakholela omwami owa Babiloni khulwe kimiiko kamakhumi saba.

¹²Nio enyuma we kimiiko kamakhumi saba khareere siiukuumo khu mwami owa Babiloni ne sibala sie Bakalitayo sikila bumayaanu bwabwe mala khole sibala sianjukhwe khulwa mindali.

¹³Khakhole khu sibala esio kamakhuwa koosi kamabi niko ndomile khu nisio, buli siindu sisiaandikwa mu sitabu sino, nisio Yeremia ang'oola khu kholo chino choosi.

¹⁴Sikila chikholo chingali ne babaami be bunyali bakhabakhole nasioobi mala ese khabaruungie khuloondekhana ne bikholwa biabwe ne kimilimo kiabwe.”

¹⁵Wele Omunyali Owa Bioosi, Wele owa Isiraeli aboolela Yeremia ali, “Bukula sikoombe sie ndali sisichuule lirima liase sino, mala onywesie chikholo choosi nicho ese khurumakho.

¹⁶Balanywa bameele batalitaale ne khulalukha sikila liie nilio ese ndikho nduma khu nibo.”

¹⁷Khwako Yeremia abukula sikoombe khukhwama mukhono mwa Wele Omunyali Owa Bioosi mala akhola chikholo choosi nicho Wele Omunyali Owa Bioosi amurumakho chanywelamo.

¹⁸Anywesia Yerusalemu ne chingoba cha Yuda, babaami ne babemeelesi khukhola chingoba chanjukhwe ne khutambamo omundu, khuba che khuuka ne lundi che silaamo, nga ne chili khukhwola luno.

¹⁹Lundi anywesia Farao, omwami owa Misiri, bakholi bewe, babemeelesi, ne babaandu bewe boosi,

²⁰anywesia ne bakeni bamenyile ne Farao boosi babaami be sibala sia Usi boosi, ne babaami ba Filisiti boosi (Ashikeloni, Kasa, Ekironi ne babarama mu Ashitoti),

²¹anywesia Edomu, Moabu ne ba okhwa Amoni, alala ne

²²babaami ba Tiro boosi babaami ba Sidoni boosi ne babaami be sikelekha sie nyanja.

²³Dedani, Tema, Busi ne naabo boosi babekanga binyoosi.

²⁴Anywesia Babaami boosi ba Arebia ne babaami boosi be chikholo chichatubaana chimenyile mu siangalaamwe.

²⁵Akhola ario akhaba khu baami boosi ba Simuri, babaami boosi ba Edomu ne babaami boosi ba Media.

²⁶Lundi anywesia babaami boosi be bunaswa be aleeyi ne aembi buli sia mulala, alala Bubwami bwoosi bwe mu sibala buli mu sibala sioosi. Mala enyuma wa bano boosi omwami owa Babiloni akhanywe.

²⁷Nio ewe Yeremia okhababoolele oli, “Wele Omunyali Owa Bioosi, Wele owa Isiraeli aloma ali, ‘Nywa, nywa mumeele murusie, mukwe mala mukhenyokha lundi tawe, sikila liie nilio ese ndikho nduma khwinywe.’

²⁸Ne baaba ne baloba khukhwakaanila sikoombe siili mukhono mwowo, olababoolela oli: Wele Omunyali Owa Bioosi aloma ali, ‘Khukhwola munywe!’

²⁹Lola, ese ndarakikha lilionaka mu lukoba lwase lulwene. Enywe mwibaasia muli se mulauukuumwa tawe? Ndikho nja khubauukuuma, nja khurera liie khu baandu boosi khu sibala. Ese Wele Omunyali Owa Bioosi nalomile.”

³⁰Khwako, Wele Omunyali Owa Bioosi aaboolela Yeremia aboolele babaandu kamakhuwa kano koosi ali, “Wele Omunyali Owa Bioosi alakhokhela khu sikulu, ne khukhwama mu bwikhalo bwewe butakatifu alalomaloma, alakhokhela babaandu bewe ne kamaani, mala ayokele nga abo basuura chisabibu, ne khu bamenywa be mu sibala.

³¹Kumumilo kulauliilikha buli abuundu mu sibala sikila Wele ali ne kesi ne babaandu be chikholo alikho engila mu bukhalaki ne babaandu boosi, ne bamayaanu, alabeerera mwiie.”

³²Wele Omunyali Owa Bioosi aloma ali, “Lola butinyu bulikho burura, bwama mu kholo ndala bucha mu kiindi ne sisifuusia sie kamaani silikho siebuusia alala.

³³Ne kimibili kia abo nibo Wele Omunyali Owa Bioosi akheere khu ndaalo eyo kilisalaanila khukhwama lubeka lulala lwe sibala khukhwola khu luundi. Se balibalila namwe kimibili kiabwe kibusibwe alala, namwe kisiikhwe tawe, kiliba busa nga esiina eye kamasisie.

³⁴Enywe babaayi lila, enywe babaami yikalangasia mwikokhe, enywe babaami be lituuli, sikila chindaalo che khukhonywa khwenywe ne khusalanila cholile ne mulakhonywa nga kamamiiku kamanefu.

³⁵Se khabekhoo engila eye khukhwilukha tawe.

³⁶Ulila bililo bie babaayi ne lilila lie babemeelesi be kamatuuli. Sikila Wele Omunyali Owa Bioosi alikho onakaka kamayilwe kabwe,

³⁷ne kamayilwe kamalayi kalanjukhwa sikila lirima likali lia Wele Omunyali Owa Bioosi.

³⁸Bulayi bwene nga etalang'i ne elekha libina liayo, Wele Omunyali Owa Bioosi aalekhile babaandu bewe, sikila sibala siabwe siabeele sisiangalaamwe sikila liie lie owe kamaani ne khulwe lirima lirafu lia Wele Omunyali Owa Bioosi.”