Read lubukusu Yer. 26 Bible Online

Yer. 26 - lubukusu bible

Yer. 26

¹ Mu khurakikha khwe khukhwamiia khwa Yehoyakimu okhwa Yosia, omwami owa Yuda,

²Wele Omunyali Owa Bioosi aboolela Yeremia ali, “Yiima khu luya lwe Lukaangu lwa Wele Omunyali Owa Bioosi mala oboolele babaandu be chingoba cha Yuda boosi babecha khusaaya Wele Omunyali Owa Bioosi mu Lukaangu kamakhuwa koosi niko ese khulaka khubaboolela. Okhalekhakho likhuwa akhaba lilala tawe.

³Banyala barekeeresia mala buli mulala akaluukhana alekha bikholwa biewe bimayaanu. Baaba ne bakhola bario, ese ndakaluukhasia kamebaasio kase ndekhe khubareerera butinyu nga abeele ndekeekhe sikila bikholwa biabwe bimayaanu.

⁴Baboolele kamakhuwa kano: Wele Omunyali Owa Bioosi aloma ali, ‘Enywe, mwaba ne mukhandekeeresia tawe, lundi ne mukharia lilaka liase nilio nara ebweeni wenywe,

⁵ne khuulila kamakhuwa ke bakholi base bang'oosi nibo namurumira enywe khangu, ne se mwabarekeeresia tawe,

⁶ ese nja khukhola Lukaangu luno lube nga Shilo mala nja khukhola lukoba luno lube silaamo khulwe chikholo choosi che khu sibala.’ ”

⁷Basaayi ne bang'oosi, ne babaandu boosi baulila Yeremia ne alomaloma kamakhuwa kano mu nju mwa Wele Omunyali Owa Bioosi.

⁸Ne nga amala khulomaloma koosi niko Wele Omunyali Owa Bioosi amulaka, basaayi, bang'oosi ne babaandu boosi bamufwakhila ne bamuboolela bali, “Ewe wolaana khufwa!

⁹Siina sikila ewe ne ong'oolela mu lisina lia Wele Omunyali Owa Bioosi noloma oli, ‘Lukaangu luno lulaba nga Shilo ne lukoba luno lulanjukhwa, babaandu se balamenyamo tawe?’ ” Ne babaandu boosi bebuusia mala bakara Yeremia mu Lukaangu lwa Wele Omunyali Owa Bioosi.

¹⁰Nga babemeelesi ba Yuda ne baulila bibiindu bino, bama munju yo mwami becha mu Lukaangu lwa Wele Omunyali Owa Bioosi mala bekhala khu ndebe chabwe ebweeni we silibwa siiya sie Lukaangu lwa Wele Omunyali Owa Bioosi.

¹¹Nio basaayi ne bang'oosi baboolela babemeelesi ne babaandu boosi bali, “Omundu yuno enyekha akhalakilwe lifwa, sikila ang'oolile kamabi khu lukoba luno nga enywe mwabene ne mwama khuulila ne kamaru kenywe.”

¹²Nio Yeremia aboolela babemeelesi ne babaandu boosi ali, “Wele Omunyali Owa Bioosi anduma ese khung'oola khu Lukaangu luno ne khu lukoba luno kamakhuwa koosi niko enywe mwama khuulila.

¹³Khwako, luno enywe ng'oona chingila chenywe ne bikholwa bienywe mala murie Wele Omunyali Owa Bioosi, Wele wenywe ne Wele Omunyali Owa Bioosi alakaluukhasia kamebaasio kewe alekhe kamabi niko aboolile khukhola.

¹⁴Ne kakhali ese, lola ndi mu bunyali bwenywe. Kholekho nilio mubona muli lili lilayi lundi lia ng'ali.

¹⁵Ne kakhali manya muli mwaba ne munjira mulereerera mwabene ne lukoba luno ne babaandu bamenyilemo sifuki sitamba bumayaanu, kali kario sikila ng'ali Wele Omunyali Owa Bioosi anduma ese khwinywe ndomalome kamakhuwa kano koosi enywe ne murekeeresie.”

¹⁶Nio babemeelesi ne babaandu boosi baboolela basaayi ne bang'oosi bali, “Omundu yuno se enyekha akhalakilwe lifwa tawe, sikila alomalome khwifwe mu lisina lia Wele Omunyali Owa Bioosi, Wele wefwe.”

¹⁷Ne babemeelesi balala benyokha balomaloma khu babaandu babuusiane alala boosi, baloma bali,

¹⁸ Mika owe Moresheti ang'oola mu ndaalo cha Hesekia omwami owa Yuda. Aboolela babaandu boosi ba Yuda ali, “Wele Omunyali Owa Bioosi, Wele owe Banamae aloma ali, ‘Sayuni lulilimwa nga kumukuunda Yerusalemu lulekela situumi sie lilionakwa ne sikulu nisio Lukaangu lulikho silaba kumusiru.’

¹⁹Omwami Hesekia owa Yuda ne babaandu ba Yuda boosi beera Mika ku? Niye se aria Wele Omunyali Owa Bioosi mala Wele Omunyali Owa Bioosi amukholela siisa ta ku? Ne Wele Omunyali Owa Bioosi se akaluukhasia kamebaasio kewe ke khubakhola kamabi niko aaba ne arekekhe ta ku? Ne kakhali efwe khuli siimbi khukhwireerera butinyu bukali lukali.”

²⁰Abao omundu okundi owang'oolelanga mu lisina lia Wele Omunyali Owa Bioosi, bali Uria okhwa Shemaya khukhwama Kiriati-Yearimu. Ang'oola kamabi khu Lukoba luno ne khu kholo yino, kamakhuwa nga ka Yeremia.

²¹Ne nga omwami Yehoyakimu ne banamae bewe boosi ne babemeelesi baulila kamakhuwa kewe, omwami amuyiima amwire. Nga Uria ne aulila, aria mala elukhila e Misiri.

²²Nio omwami Yehoyakimu aruma omundu bali Elinatani okhwa Akibori ne babaandu babaandi alala ne naye bacha e Misiri khurera Uria.

²³Barusia Uria khukhwama e Misiri mala bamuyila khu mwami Yehoyakimu mala amwiira ne mbalu, amwaata kumubili kwewe niio basiikhanga babaandu bakhali ne lukoosi tawe.

²⁴Ne kakhali Yeremia aliindwa ne Ahikamu okhwa Safani nio se aanwa khu baandu bamwiire tawe.