Read lubukusu Yer. 27 Bible Online

Yer. 27 - lubukusu bible

Yer. 27

¹Mu khurakikha khwe khukhwamiia khwa Hesekia okhwa Yosia omwami owa Yuda, Wele Omunyali Owa Bioosi aboolela Yeremia ali,

²“Khola bitorobo ne bisekeyi mala ofware mwikosi mwowo.

³Ruma burume khu mwami owa Edomu, khu mwami owa Moabu, omwami owa Amoni, omwami owa Tiro ne khu mwami owa Sidoni khubirira khu barume babechile mu Yerusalemu khu Hesekia omwami owa Yuda.

⁴Boolela barume bache baboolele babaami babwe kamakhuwa kano: Wele Omunyali Owa Bioosi, Wele owa Isiraeli aloma ali,

⁵‘Mu bunyali bwase bukali ne kamaani kase nabuumba sibala alala ne babaandu ne chisaang'i chilimo mala mbelesia bunyali khu mundu yesi yesi niye samwene siimile.

⁶Luno nareere sibala sino sioosi mu bunyali bwa Nebukadinesa omwami owa Babiloni, omukholi wase mala namueleesie akhaba chisaang'i che mundaa khumukholela kimilimo.

⁷Chikholo choosi chilamukholela kimilimo. Chilakholela akhaba omusoleeli wewe no mwichukhulu wewe, khukhwola nga siise ne silioola sie khukwa khwe kholo yewe. Siise esio chikholo chingali ne babaami be bunyali balimukhola abe nasioobi wabwe.’ ”

⁸Wele Omunyali Owa Bioosi aloma ali, “Ne ekholo yosi yosi namwe bubwami bwaaba ne bukhakholela Nebukadinesa omwami owa Babiloni yuno kimilimo, ne khufwara mwikosi liayo lichooki lie mu bunyali bwo mwami owa Babiloni tawe ese ndaelesia ekholo eyo kumunaanio ne liie, enjala ne lufu, khakhole ndio khukhwola nga ne mbunia ekholo eyo khulwe khurumikhira Nebukadinesa.

⁹Khwako mukharekeeresia bang'oosi benywe, be chisaasi, be kamarooro, ne balakusi, ne bafumu, balamuboolelanga enywe bali, ‘Mukhakholela omwami owa Babiloni kimilimo tawe.’

¹⁰Balikho bamung'oolela ke bubeeyi, nio enywe murusibwe mu sibala sienywe muyilwe aleeyi, ne ese ndamuona murure, mala mulabuna.

¹¹Ne ekholo yosi yosi efukiilila bubwami bwo mwami owa Babiloni ne khumukholela, ndalekha ekholo ng'ene eyo mu sibala siayo elime kimikuunda kiayo ne khumenyamo.”

¹²Yeremia aboolela Sedekia omwami owa Yuda burume buno ne bubwene ali, “Fukiilila omwami owe Babiloni, mala mumukholele kimilimo, niye ne babaandu bewe nio mumenye.

¹³Siina sikila ewe ne babaandu bowo mufwe khulwe liie, ne njala ne lufu nga Wele Omunyali Owa Bioosi nalomile khuloondekhana ne kholo yosi yosi ekhakholela omwami owa Babiloni tawe?

¹⁴Mukharekeeresia kamakhuwa ke bang'oosi bamuboolela bali, ‘Se mukhakholele omwami owa Babiloni kimilimo tawe,’ tawe sikila balikho bamung'oolela bubeeyi.

¹⁵Wele Omunyali Owa Bioosi aloma ali: Ese se nabaruma tawe. Balikho bang'oola bubeeyi mu lisina liase, ekhumaliilikha khamuoone muche mala mubune, enywe alala ne bang'oosi baalikho bamung'oolela.”

¹⁶Nio Yeremia aboolela bang'oosi ne babaandu boosi ali, “Kano niko Wele Omunyali Owa Bioosi aloma: Mukharekeeresia kamakhuwa ke bang'oosi benywe bamung'oolela ne baloma bali, ‘Lola bibiindu bie munju eya Wele Omunyali Owa Bioosi bilakobosebwa khukhwama Babiloni enyuma we siise sitiiti tawe. Balikho bamung'oolela bubeeyi.

¹⁷Mukhabarekeeresia tawe, kholela omwami owa Babiloni kimilimo mala mumenye. Siina sikila lukoba luno lube likuunda?

¹⁸Baaba ne bali bang'oosi mala bali ne burume bwa Wele Omunyali Owa Bioosi, lekha bekoonjelele Wele Omunyali Owa Bioosi nio bibiindu bie mu nju eya Wele Omunyali Owa Bioosi, nende bie mu nju eyo mwami owa Yuda, nende bie mu Yerusalemu biramemo, bikhayilwa e Babiloni tawe.

¹⁹Bibiindu nibio omwami Nebukadinesa owa Babiloni aakhabukula aacha nabio tawe, biaba chinjeko ne bibuumba, biteetwe ne bibiindu bibiindi.

²⁰Aabukula Yekoniya okhwa Yehoyakimu, omwami owa Yuda, ne babemeelesi ba Yuda ne Yerusalemu ne bali baboe khukhwama Yerusalemu bayilwa e Babiloni.’ ”

²¹Wele Omunyali Owa Bioosi, Wele owa Isiraeli aloma ali, “Khuloondekhana ne bibiindu bibiarama mu nju eya Wele Omunyali Owa Bioosi ne bie munju yo mwami owa Yuda ne Yerusalemu,

²²Bikhasutwe biyilwe e Babiloni mala birameyo khukhwola khu ndaalo niyo ndibibaasiliakho. Nio mbikobosie mala mbire abuundu ano.”