Read lubukusu Yer. 28 Bible Online

Yer. 28 - lubukusu bible

Yer. 28

¹ Mumwesi kwa kharaano mu mwiiko kwe khaane mu khurakikha khwe khukhwamiia khwa Sedekia omwami owa Yuda, omung'oosi Hanania okhwa Asuri khukhwama Kibeoni alomaloma ne Yeremia mu Lukaangu lwa Wele Omunyali Owa Bioosi ebweeni we basaayi ne babaandu ne aloma kamakhuwa kano:

²Wele Omunyali Owa Bioosi, Wele owa Isiraeli aloma ali, “Nafunaake lichooki lio mwami owa Babiloni.

³Mu miiko kibili ndakobosia abuundu ano bibiindu bioosi bie mu Lukaangu lwa Wele Omunyali Owa Bioosi, nibio Nebukadinesa omwami owa Babiloni abukula arusia abuundu ano acha nabio e Babiloni.

⁴Wele Omunyali Owa Bioosi aloma ali, lundi ese khakobosie abuundu ano Yekoniya okhwa Yehoyakimu, omwami owa Yuda alala ne baboe babayilwa e Babiloni boosi khukhwama Yuda, sikila ndafunaka lichooki lio mwami owa Babiloni.”

⁵Nio omung'oosi Yeremia aboolela omung'oosi Hanania ebweeni we basaayi ne babaandu boosi ba baaba ne bemile mu Lukaangu lwa Wele Omunyali Owa Bioosi ali,

⁶“Amina! Wele Omunyali Owa Bioosi akhoya akhola ario. Wele Omunyali Owa Bioosi akhoya akhola kamakhuwa niko wama khung'oola kaaba ng'ali mala akobosie abuundu ano bibiindu bie nju ya Wele Omunyali Owa Bioosi ne baboe boosi khukhwama Babiloni.

⁷Ne kakhali ulila luno likhuwa nilio mboola, ewe ne babaandu boosi.

⁸Bang'oosi ba babao ebweeni wowo ne nase khaale akho bang'oola liie, enjala ne lufu, khu bibala bikali ne bubwami bwe bunyali bukali.

⁹Ne omung'oosi nang'oola kumuleembe, mala bung'oosi bwo mung'oosi oyo bwecha bwabao ng'ali limanyikha lili Wele Omunyali Owa Bioosi aaba arumire omung'oosi oyo.”

¹⁰Nio omung'oosi Hanania abukula lichooki lie khukhwama khwikosi lio mung'oosi Yeremia mala alifunwa.

¹¹Ne Hanania alomaloma ebweeni we babaandu boosi ali, “Wele Omunyali Owa Bioosi aloma ali, Akhaba seesi khafunemo lichooki lia Nebukadinesa omwami owa Babiloni khukhwama khwikosi lie chikholo choosi mu miiko kibili.” Ne omung'oosi Yeremia echiila.

¹²Siise sitiiti, enyuma wo mung'oosi Hanania khufunaka lichooki liarura khwikosi khwo mung'oosi Yeremia, Wele Omunyali Owa Bioosi aboolela Yeremia kamakhuwa kano:

¹³Cha oboolele Hanania oli, “Wele Omunyali Owa Bioosi aloma ali, ‘Ewe wafunaake lichooki lie kumurongooro ne ese ndakhola ngobosieo lichooki lie sichuuma.’

¹⁴Sikila Wele Omunyali Owa Bioosi, Wele owa Isiraeli aloma ali, ‘Naboyile lichooki lie sichuuma khu makosi ke babaandu be chikholo boosi, bakholele Nebukadinesa omwami owa Babiloni. Balamukholela niye, sikila namueleesie niye bunyali akhaba khu saang'i che mundaa.’ ”

¹⁵Ne Omung'oosi Yeremia aboolela Hanania ali, “Ulila Hanania, Wele Omunyali Owa Bioosi se akhuruma tawe, ne ewe wakholile babaandu bano basuubile bubeeyi.

¹⁶Khwako Wele Omunyali Owa Bioosi aloma ali, ‘Lola ndakhurusiao. Olafwa kumwiiko kuno ne kumwene sikila walomile kamakhuwa ke sileka khu Wele Omunyali Owa Bioosi.’ ”

¹⁷Mu mwiiko okwo kumwene, mu mwesi kwa saba, omung'oosi Hanania afwa.