Read lubukusu Yer. 3 Bible Online

Yer. 3 - lubukusu bible

Yer. 3

¹Wele Omunyali Owa Bioosi aloma ali, “Omundu aaba ne aloba omukhasi wewe, mala omukhasi oyo amururakho ache khu mundu okundi, abe omukhasi wo mundu oyo, omundu owamuloba oyo anyala amukobosia lundi ku? Aba sibala esio se sianyaalutiibwe lukali ta ku? Ewe wakhola bukhobani ne basaale bakali, onyala wakobola khwise?

²Suta chimoni olole khu bikulu khungaaki mala obone! Waena niio ewe okhakona tawe? Wekhalenge khu chingila nolindiilila basaale bowo, nga omwaraabu nalindiilila omusiku mu sichiimi. Ewe wanyaalutisie sibala ne bukhobani.

³Khwako efula se lakwa tawe, akhaba efula eye siruumbi se yechile tawe. Ne kakhaba kario ewe oli ne chimoni che bueeyi, waloba khuaambwa chisoni.

⁴“Ewe se wama khunanga ese oli, ‘Paapa, ewe oli omusaale wase khukhwama mu buele bwase?

⁵Ewe olakhalala mindali na mindali, Ewe olaba ne lirima busa khukhwola khu siakamo?’ Lola, Ewe Isiraeli walomile orio, ne kakhali wakholile bumayaanu bwoosi nibwo onyala wakhola.”

⁶ Wele Omunyali Owa Bioosi aamboolela ese mu ndaalo cho mwami Yosia ali, “Waboone niko Isiraeli okhali ne lisuubila tawe akholile? Aniinile khu buli sikulu sileeyi, ne khucha asi wa buli murongooro mala akholela ebweeneyo bukhobani.

⁷Ne ese nebaasia ndi alaba oli amalile khukhola kano koosi ne angobolela. Ne kakhali se akobola tawe. Ne wandaaye Yuda okhasuubilwa tawe abona kano.

⁸Yuda abona ali sikila bukhobani bwoosi bwa Isiraeli okhali ne lisuubila tawe, ese namuoona ne kamaandike ke khulekhana. Kakhaba kario, wandaaye omubeeyi Yuda se aria tawe, ne kakhali akhaba yesi acha mala akhola bukhobani.

⁹Sikila bueeyi bwaba likhuwa liiolu khu niye mala anyaalutia sibala, akhola bukhobani khulwe khusaaya kamabaale ne kimirongooro.

¹⁰Ne akhaba koosi ne kaba kario, wandaaye wewe omubeeyi Yuda se akobola khwise ne kumwoyo kwewe kwoosi tawe, ne kakhali ekholakhosia busa.”

¹¹Nio Wele Omunyali Owa Bioosi amboolela ali, “Isiraeli okhali omusuubilwa tawe, ewe weyekesie wamwene oli se oli ne bumayaanu nga wandaayo omubeeyi Yuda tawe.

¹²Cha wilwache kamakhuwa kano lubeka lwe bunaswa ne oloma oli, ‘Ewe Isiraeli okhali omusuubilwa tawe, kobola.’ Se ndakhukhalalila tawe, sikila ndi ne siisa, se ndakhalala khulwa mindali tawe.

¹³Ne kakhali fukiilila bumayaanu bwowo, oli wakhola sileka khu Wele Omunyali Owa Bioosi, Wele wowo mala wasalanisia busiime bwowo, mu bakwa asi owa buli murongooro, lundi oli se wariire niko khuboolela tawe.”

¹⁴Wele Omunyali Owa Bioosi aloma ali, “Ngobolele enywe babaana mukhali ne busuubilwa tawe, sikila ese ndi omwami wenywe, ndabukula mulala khukhwama mu buli lukoba ne babili, khukhwama buli enju, mala ndamureera e Sayuni.

¹⁵Ne ndamuelesia babaayi basiimisia kumwoyo kwase, balamwimeelela ne limanya ne liiulila.

¹⁶Ne Wele Omunyali Owa Bioosi aloma ali, ne mumalile khutasikha mwaba bakali mu sibala mu ndaalo echo, babaandu se balirumburakho lisanduku lie endakaano lia Wele Omunyali Owa Bioosi tawe, se likhechekho mu mebaasio, namwe likhebulilwe mu nganakani namwe liekoombwe namwe likholwe lundi tawe.

¹⁷Mu siise esio Yerusalemu lukhalaangwe Endebe eye bubwami bwa Wele Omunyali Owa Bioosi, ne chikholo choosi chilibuusiamo ebweeni wa Wele Omunyali Owa Bioosi ne se chikhabe chimiinyi khulwe khuloonda bumayaanu bwabwe lundi tawe.

¹⁸Mu ndaalo echo be nju eya Yuda bakhaambane nende be nju eya Isiraeli, mala boosi alala bakhame mu sibala sie bunaswa beche mu sibala nisio ese naelesia bakuuka babwe sibe kumukabwa kwabwe.”

¹⁹Wele Omunyali Owa Bioosi aloma ali, “Isiraeli nenya khubukule ewe nga omwana wase, mala khuelesie kamaloba kamalayi, kamaloba kamalayi mu sibala sioosi. Nenya unaange oli ‘Paapa’ nio olekhe khukhunjanjukha lundi.

²⁰Ee, be nju eya Isiraeli, ng'ali nga omukhasi ookhali omusuubilwa ne alekha omuseecha wewe, enywe se mwabeele basuubilwa khwise tawe.

²¹“Kumumilo kuuliilikhana abuundu aesuta lukali, liilila ne liliekoonjelela lie babaana ba Isiraeli, sikila banyaaluutia limenya liabwe, bebilila Wele Omunyali Owa Bioosi, Wele wabwe.

²²Ee baana bakhali ne lisuubila tawe, kobola, ndamuraamo lisuubila. “Ne enywe muloma muli, Lola khulikho khwicha, sikila ewe oli Wele Omunyali Owa Bioosi, Wele wefwe.

²³Ng'ali bikulu biakhutiimia, akhaba ne chingulu, Ng'ali mu Wele Omunyali Owa Bioosi Wele wefwe, bulimo buonia bwa Isiraeli.

²⁴Ne kakhali khukhwama khale sisiindu sie chisoni sie khusaaya wele Baali siakila khwatibia bioosi nibio bakuuka befwe bakhola, kiminyele kiabwe ne kamatuuli, babaana babwe basoleeli ne bakhaana.

²⁵Lekha khukone asi mu soni chefwe, ne lekha echangalaalo ekhwichulekho sikila khwakholela Wele Omunyali Owa Bioosi, Wele wefwe bubwoni, efwe ne bakuuka befwe khukhwama khale khukhwola endaalo yino. Ne se khwariakho kamalaka ka Wele Omunyali Owa Bioosi, Wele wefwe tawe.”