Read lubukusu Yer. 30 Bible Online

Yer. 30 - lubukusu bible

Yer. 30

¹Wele Omunyali Owa Bioosi, Wele owa Isiraeli

²aboolela Yeremia ali, “Andika mu sitabu kamakhuwa koosi niko khuboleele.

³Lola, chindaalo chilikho chiicha nicho ese ndikoboselia babaandu base ba Isiraeli ne Yuda chikhabi, khabakobosie mu sibala nisio naelesia bakuuka babwe, mala bakhasibukule sibe sisiabwe.”

⁴Kano niko kamakhuwa niko Wele Omunyali Owa Bioosi alomaloma khuloondekhana ne babaandu ba Yuda ne Isiraeli:

⁵Wele Omunyali Owa Bioosi aloma ali, “Khwauliile bililo bie bireengo, bililo biriisia; ne kumuleembe se kuliio tawe.

⁶Luno, reeba, mala mubone, omundu we siseecha anyala asaala omwana? Nono siina sikila ne mbona buli mundu we siseecha ne atiililiile enda nga omukhasi olumwa? Siina sikila buli mundu ne acheleleekhe?

⁷Bona! Endaalo eyo eli emboofu, se eliio ekiindi nga eng'eneeyo tawe, sili siise sie bubeeleli khu baandu ba Yakobo, ne kakhaba kario bakhasikulwe baruremo.”

⁸Wele Omunyali Owa Bioosi aloma ali, “Endaalo eyo ne eliola ese ndifunaka lichooki lirure khwikosi khwabwe mala ndikangulula kiminyololo kiabwe. Ne baakwa se balibakhola nibo lundi khuuba bakholi babwe tawe.

⁹Ne kakhali bakhaakholele ese Wele Omunyali Owa Bioosi, Wele wabwe ne omwami wabwe we lisaaye lia Daudi, niye ese ndira khu ndebe eye bubwami.”

¹⁰ Wele Omunyali Owa Bioosi aloma ali, “Ee, baandu ba Yakobo, bakholi base mukharia tawe, namwe mukheembeelela tawe, sikila ese khamuonie khukhwama aleeyi, ne lisaaye lienywe khukhwama mu sibala siabwe sie embaambe. Mulikobola mube ne kumuleembe ne bulayi ne mbao olimuriikhirisia enywe tawe.”

¹¹Wele Omunyali Owa Bioosi aloma ali, “Sikila ese ndi ne nanywe khumuonia, Ese ndarusiao elala chikholo choosi nicho namusalanisiamo ne se khamurusieo enywe elala tawe. Ese khamuukuume enywe mu bung'ali ne se khamulekhe busa ne khamuukumile tawe.”

¹²Wele Omunyali Owa Bioosi aboolela babaandu ali, “Kamakoonjo kenywe se kaona tawe, ne buchuuni bwenywe se buwa tawe.

¹³Se aliio omundu omusilikha tawe, kamalesi ke kamakoonjo kenywe se kaliio tawe. Lilieyikina lie khuona mbao.

¹⁴Basiime benywe boosi bamwibiliile, se benanakho tawe. Ese namwibuulile nga omusiku, siiukuumo sienywe siabele sirafu sikila bubwoni bwenywe buli bukali. Lundi bumayaanu bwenywe buli bukali.

¹⁵Mukheloocha sikila buchuuni bwenywe tawe, Se muli ne busilikhi tawe. Namuukuuma ndio sikila bubwoni bwenywe buli bukali lundi bumayaanu bwenywe buli bukali.

¹⁶Khwako babaandu boosi bamwibwaakala enywe bakhebwaakalwe ne basiku benywe boosi, baliyilwa mu mbaame ne bali baboe. Boosi bamupia siibi, bakhapisibwe siibi, abo bamuyaaya enywe kimiaandu bakhayaaywe.

¹⁷Ese khamuonie, khamuonie kamakoonjo kenywe, akhaba basiku benywe ne baloma bali, ‘Sayuni lwalamiilwe, mbao olwibaasiakho tawe.’ Ese Wele Omunyali Owa Bioosi nalomile.”

¹⁸Wele Omunyali Owa Bioosi aloma ali, “Khakobosie babaandu base mu sibala siabwe, mala kholele buli nju siisa. Yerusalemu lukhombakhwe lundi akhaba lichipi likhombakhwe lundi.

¹⁹Babaandu bamenyilemo bakhaafumie mu nyiimbo, bakhekhoye lukali, khu khabi chase bakhatasikhe, chikhabi chase chikhabareerere lukoosi.

²⁰Khabakoboseleo kamaani niko baba nako khale, ne khubemekhela elala, ne ese khaukuume abo ba baapia siibi boosi.

²¹Omwami wabwe akhabe mulala khu nibo babeene obamiia nibo okhame mu beene, ese khamukhole eeche siimbi niio ndi ne mulaanga, sikila naanu onyala eecha busa omwene ese ne khamulaangile?

²²Enywe mukhabe babaandu base ne ese khabe Wele wenywe.”

²³Lola, embembeesi eya Wele Omunyali Owa Bioosi! Bukhalafu bwewe bwaboneekhe sisifuusia sikali sileecha khu mirwe kie babooni.

²⁴Lirima lirafu lia Wele Omunyali Owa Bioosi se lilakobola enyuma tawe, khukhwola nga nakhola ne khumala ke lirekekha lie kamebaasio kewe. Mu ndaalo chichiicha mukhamanye kano bulayi bwene.