Read lubukusu Yer. 31 Bible Online

Yer. 31 - lubukusu bible

Yer. 31

¹Wele Omunyali Owa Bioosi aloma ali, “Siise silikho sicha nisio ese ndiba Wele owe Baisiraeli boosi, ne abo baliba babaandu base.

²Mu sichiimi omwo ese nekesia siisa, khu baandu bakhafwila mwiie tawe. Nga Baisiraeli ne bayiima siiuluukho,

³nababonekhela khukhwama aleeyi, baandu ba Isiraeli, buli lwosi namusiima enywe ne busiime bwa mindali khwako nachiililiile khuuba omusuubilwa khwinywe.

⁴Khamwombakhe lundi. Lundi mukhabukule chitamburini chenywe mala mukhine ne mwimba ne khukhwekhoya.

⁵Mukhabiaale lundi kimisabibu khu bikulu bia Samaria, bamiichi balimiicha mala bekhoyele bibiaamo.

⁶Sikila endaalo eliicha niio baliindi balilangila mu sibala sie bikulu sia Efuraimu bali, ‘Yinyokha khuche Sayuni khu Wele Omunyali Owa Bioosi, Wele wefwe.’ ”

⁷Wele Omunyali Owa Bioosi aloma ali, “Yimbila Isiraeli ne busangaafu ekholo eli emboofu lukali yimba lulwimbo lwe fuma, ‘Wele Omunyali Owa Bioosi aoniisie babaandu bewe, aasikuule boosi babarama.’ ”

⁸Lola ndabarusia mu sibala sie bikulu sie ebunaswa, mala mbabuusie khukhwama mu bibala bie aleeyi lukali, mu nibo bakhabemo babofu ne baleme, bakhasi be chinda ne bakhasi balumwa sitube, bakhakobole ano mu sipupu siboofu.

⁹Baliicha ne balila ndibarangirira ne liioleelesia ne bakobola khabakhole bakeendele a njichi che kameechi khu ngila engololofu niyo bakhetuya tawe, sikila ese ndi nga paapa khu Isiraeli ne ekholo eya Efuraimu eli nga omwana wase omubele.

¹⁰Ulila likhuwa lia Wele Omunyali Owa Bioosi, baandu be chikholo, mala muliboolela buli abuundu mu sibala loma muli, “Oyo owasalanisia Baisiraeli alababuusia, ne alabaliinda oli omwaayi ne aliinda kamakheese kewe.”

¹¹Sikila Wele Omunyali Owa Bioosi asikuule babaandu ba Yakobo mala abasikuule khukhwama khu baandu be kamaani khubakhila nibo.

¹²Bakheche bembele lukali khu sikulu sia Sayuni ne bakhasangaalile bulayi bwa Wele Omunyali Owa Bioosi, khu biakhulia, endali ne kamafura, ne kamameeme ne chimoosi bulamu bwabwe bukhabe nga kumukuunda nikwo bachukhililanga kameechi, ne se bakhabelesibwe lundi tawe.

¹³Nio bakhaana baliekhoya mu bukhino, ne basoleeli ne basaakhulu balisangaala Ese ndikaluukhasia liilila liabwe libe liliekhoya, khabaoleelesia mala mbaelesie busangaafu mu bweyaangu bwe bubeeleli.

¹⁴Wele Omunyali Owa Bioosi aloma ali, “Khaliisie basaayi biakhulia bikali, ne babaandu base balinyalikha ne bulayi bwase.”

¹⁵ Wele Omunyali Owa Bioosi aloma ali, kumumilo kwauliilikhaniile Rama, lisooma ne bililo birafu, Raeli alikho alila babaana bewe, alobile khuolelesibwa khulwe babaana bewe sikila se baliio tawe.

¹⁶Wele Omunyali Owa Bioosi aloma ali, “Lekha khulila, yeeya kamasika mu moni mwowo, sikila kimilimo kiowo kilaebwa kumuruungo ne balikobola khukhwama mu sibala sio musiku.

¹⁷Lilieyikina mu ndaalo chichiicha liliio, ne babaana bowo balikobola mu sibala siabwe.

¹⁸“Nauliile ekholo eya Isiraeli ne lila mu bubeeleli eli, ‘Wele Omunyali Owa Bioosi, khwaba nga ekhaafu niyo bakhafundisia tawe ne kakhali ewe wakhwekesia khuria khukobosie engo, ne efwe khwerekeekhe khukobola, Wele Omunyali Owa Bioosi, Wele wefwe.

¹⁹Sikila enyuma we khukaluukhana khwekanila, ne enyuma we khukhwekisibwa khwabeelela, khwaambwa chisoni ne khuchangalaasibwa sikila khwaba ne bubwoni khukhwama khale.’ ”

²⁰Wele Omunyali Owa Bioosi areeba ali, “Efuraimu se ali omwana wase omukoosi tawe ku? Se ali omwana wase niye nasiima tawe ku? Sikila akhaba ne mulomakho lukali, njililila khumukhebulila, khwako kumwoyo kwase kumwekoomba, ng'ali ndamukholela siisa.

²¹“Ra khu ngila bimanyisio bienywe yiima engila niyo mwechelakho, ee, baandu ba Isiraeli, kobola kobola engo mu ngoba nicho mwalekha.

²²Mulaayaaya khukhwola liina, ee, enywe babaandu mukhasuubila tawe? Nabang'aane sisiindu lundi sikabukhaane, nga omundu we siikhasi namenyia omundu we siseecha.”

²³Wele Omunyali Owa Bioosi, Wele owa Isiraeli aloma ali, “Lundi bakharumikhire kamakhuwa kano mu sibala sia Yuda ne mungoba chasio ne malile khubakoboselia bulayi bwabwe. Bakhalome bali, ‘Wele Omunyali Owa Bioosi akhoya akhubiite ewe chikhabi, ee bumenyo bwe buluungi, Ee, sikulu sitakatifu!’

²⁴Babaandu bakhamenye mu Yuda ne chingoba chasio choosi. Khukhabe ne balimi ne babaayi ne kamatuuli kabwe.

²⁵Sikila ese khauluusie baluiliile ne khuliisia be njala biakhulia.

²⁶Nio babaandu bakhalome bali, ‘Njiile nakona, oli ninyokha neulila bulayi.’ ”

²⁷Wele Omunyali Owa Bioosi aloma ali, “Lola chindaalo chilikho chiicha nicho ese nja khutasa be nju eya Isiraeli ne be nju eya Yuda, balasaalana babe bakali lundi bibiaayo biabwe bilasaalana bibe bikali.

²⁸Biise biliola nibio, bulayi bwene nga nabaloleelesia khulwe khubarusiao, khubasalanisia, khubakwisia ne khubonaka, ne khureera bumayaanu, akhaba lundi khabaloleleesie khulwe khubombakha ne khubabiaala.

²⁹ Siise esio ne siicha babaandu se bakhalome bali, ‘Bapaapa baliile chisabibu chindulu ne kameeno ke babaana kaburuukhe tawe.’

³⁰Ne kakhali buli mundu alafwa sikila bubwoni bwewe omwene, ne buli mundu olilia chisabibu chindulu kameeno kewe omwene kaliburukha.”

³¹ Wele Omunyali Owa Bioosi aloma ali, “Lola chindaalo chilikho chiicha nicho ese khakholelemo endakaano yase embia nende be nju eya Isiraeli nende be nju eya Yuda.

³²Se khabe endakaano nga niyo nakhola ne bakuuka babwe nga nabatiila kumukhono nabarusia mu sibala sia Misiri, endakaano yase niyo bafunaka akhaba ese ne naba nga omuseecha wabwe tawe.

³³ Ne kakhali yino eli endakaano niyo ese nja khukhola nende be nju eya Isiraeli enyuma we chindaalo echo. Ese khabaremo lilaka liase mala khaliandike khu miooyo kiabwe. Ese khabe Wele wabwe ne nibo bakhabe babaandu base.

³⁴ Ne se aliio omundu olieyikia owasie, namwe wandaaye naboola ali, ‘Manya Wele Omunyali Owa Bioosi tawe,’ sikila boosi bakhaamanye ese khukhwamila khu mukeekhe khukhwola khu mukhulu, sikila khababeele bubwoni bwabwe ne se khabukhebulile lundi tawe.”

³⁵Wele Omunyali Owa Bioosi, oanaanga enyanga khulwe buwaanga kumuusi, ne kumwesi ne ching'enieesi khulwe buwaanga siilo ookholanga bibuli bie enyanja ne bioloola, lisina liewe bali, Wele Omunyali Owa Bioosi.

³⁶Wele Omunyali Owa Bioosi aloma ali, “Bibiindu bibiarebwao bino ne birusibwao, ne lisaaye lia Isiraeli liosi lirusibwao se eba lundi ekholo ebweeni wase khulwa mindali tawe.”

³⁷Wele Omunyali Owa Bioosi aloma ali, “Likulu liaba ne linyala liakelwa, ne kumusiingi kwe sibala ne kunyala kwamanyikha, nono aba ese ndamwaata be lisaaye lia Isiraeli boosi khu koosi niko bakhola.”

³⁸Wele Omunyali Owa Bioosi aloma ali, “Chindaalo chilikho chiicha lukoba lucha khwombakhwa lundi khulwa Wele Omunyali Owa Bioosi. Lukhombakhwe khukhwama khu ndeleelwa eya Hananeli mumbo khukhwola khu Silibwa sie mu koona.

³⁹Ne lulwakha lukhache lwole khu Lukulu lwa Karebu mumbo mala lukobole luche Koa.

⁴⁰Litooma lioosi lie baafu ne likokhe ne kimikuunda kioosi khukhwola khu sinoko sia Kitironi khu koona eye silibwa sie Farasi ebukwe, bilaba bitakatifu khu Wele Omunyali Owa Bioosi. Se bilatechulwa namwe bionakwe lundi tawe.”