Read lubukusu Yer. 32 Bible Online

Yer. 32 - lubukusu bible

Yer. 32

¹ Wele Omunyali Owa Bioosi alomaloma ne Yeremia mu mwiiko kwe khumi khukhwama nga Sedekia naba omwami owa Yuda, kukwaba kumwiiko kwe ekhumi na munaane khukhwama nga Nebukadinesa ne aaba omwami owa Babiloni.

²Siise esio banamae bo mwami owa Babiloni baaba bebwakaale Yerusalemu, ne omung'oosi Yeremia aba ekaliliilwe mu luya lwe bubwami lulwaba mu lichipi lio mwami owa Yuda.

³Omwami Sedekia aba aboyile Yeremia ebweeneyo ne areeba ali, “Siina sikila ewe ne ong'oola oli: Wele Omunyali Owa Bioosi aloma ali, ‘Lola ese ndikho mbaana lukoba luno khu mwami owa Babiloni mala alalutiila.

⁴Sedekia omwami owa Yuda se alebacha arure mu makhono ke Bakalitayo tawe, ne kakhali ng'ali alaanwa mu makhono ko mwami owa Babiloni, mala alalomaloma naye moni na moni ne amuloleleele.

⁵Lundi alabukula Sedekia amuyile e Babiloni mala alamenya ebweeneyo khukhwola nga ndibonana naye. Sedekia akhapana ne Bakalidayo se alabaula tawe.’ ”

⁶Yeremia aloma ali Wele Omunyali Owa Bioosi aamuboolela niye ali,

⁷“Lola Hanameli okhwa raraao Shalumu alecha khwiwe mala akhuboolele ali, ‘Kula kumukuunda kwase kuuli e Anatoti sikila niwe okhoyela khukusikula khulwe khukukula.’ ”

⁸Nio wandaaye owa Yeremia Hanameli aamwichakho khu luuya lwe baliindi khuloondekhana ne likhuwa lia Wele Omunyali Owa Bioosi mala amuboolela ali, “Kula kumukuunda kwase kuuli e Anatoti mu sibala sia Benjamini sikila ewe niwe oli ne bung'ali bwe khukusikula, kukule.” Nio Yeremia amanya ali lino liaba likhuwa lia Wele Omunyali Owa Bioosi khu niye.

⁹Ne Yeremia akula kumukuunda okwo e Anatoti khukhwama khu Hanameli wandaaye. Yeremia amubalila chirupia bukusi bubwola bitonyi bie efwesa likhumi na saba.

¹⁰Khwafukiilisiana, narakho kumukhono, nanyoola baloli namubalila chirupia chichenyibwa.

¹¹Nio nabukula chibarwa chombi che lifukiilisiana che likulaana, chilimo kamakhuwa kaloondekhana ne kumukuunda, ne ndala khwiyo yaba embambule.

¹²Nakaanisia chibarwa che likulaana khu Baruku okhwa Neria, omwichukhulu owa Maiseya. Nakhola ndio mu moni cha Hanameli wandaayase ne mu moni che baloli babara kamakhono kabwe khu likulaana lienelio, ebweeni we babaandu ba Yuda boosi ba baaba ne bekhale mu luuya lwo mulindi.

¹³Yeremia alaka Baruku mu moni chabwe ali,

¹⁴“Wele Omunyali Owa Bioosi, Wele owa Isiraeli aloma ali, ‘Bukula chibarwa che likulaana chombi, niyo bafuumile ne eli khwasie mala ochire mu nyuungu eye liloba chibemo siise sileeyi.

¹⁵Sikila Wele Omunyali Owa Bioosi, Wele owa Isiraeli aloma ali: Chinju ne kimikuunda ne kimikuunda kie kimisabibu kikhakulwe lundi mu sibala sino.’ ”

¹⁶Enyuma wa Yeremia khukhwakanisia Baruku okhwa Neria chibarwa che likulaana, asaba Wele Omunyali Owa Bioosi mu makhuwa kano:

¹⁷“Ee, Omwami WELE, ewe niwe owabuumba likulu ne liloba khulwe bunyali bwowo bukali ne kamaani! Se siliio sisiindu siiandalafu khwiwe tawe.

¹⁸Ewe wekesianga busiime bwa busiele khu baandu bakali, lundi oelesianga babaana siiukuumo khulwe bubwoni bwe baraara babwe. Ewe, oli Wele omukali lundi owe bunyali, lisina liowo lili Wele Omunyali Owa Bioosi,

¹⁹oli omukali owe likaambila, lundi owe bunyali mu bikholwa. Obonanga chingila choosi che babaandu. Oanaanga kumuruuru khu buli mundu khuloondekhana ne chingila chewe ne bikholwa biewe.

²⁰Mu ndaalo echo ewe wekesia kamayia nende bie liukia mu sibala sia Misiri, ne mu ndaalo chino osichiililila khukhwekesia kamayia mu Isiraeli ne mu baandu babaandi boosi, nio wamanyikhana buli abuundu.

²¹Ewe warusia babaandu bowo Baisiraeli mu sibala sia Misiri ne kamayia nende ke liukia ne bunyali bwowo ne kamaani ne liriisia likali,

²²mala wabaelesia sibala nisio kamabeele ne bubuukhi biseleetikhanga sino, nisio wasuubisia khuelesia bakuuka babwe.

²³Nio bengisia mala basibukula siaba sisiabwe. Ne kakhali se baria Lilaka liowo namwe bamenya ne buuri tawe. Se bakholakho sisiindu siosi siosi khu niko ewe wabalaka bakhole tawe. Khwako ewe wakholile butinyu buno bwoosi khubechakho.

²⁴“Bakalitayo babotookhelela lukoba benya khu luamba, balikho balwibwaakala. Liie, enjala ne lufu bilakila lukoba lukwe mu makhono ko musiku. Olabona oli koosi niko olomile kekholekhe.

²⁵Ne kakhaba kario ewe Omwami WELE wamboleele ese oli, ‘Kula kumukuunda khu rupia mala obe ne baloli akhaba lukoba luno ne luli siimbi khuambwa ne Bakalitayo.’ ”

²⁶Wele Omunyali Owa Bioosi aboolela Yeremia ali,

²⁷“Lola, ese ndi Wele Omunyali Owa Bioosi, Wele owe babaandu boosi. Mbao sisiindu siosi siosi siili siiandalafu khwise tawe.

²⁸ Khwako Wele Omunyali Owa Bioosi amboolela ali: ‘Lola ese ndikho mbelesia lukoba luno khu Bakalitayo ne khu Nebukadinesa omwami owa Babiloni mala alalubukula.

²⁹Bakalitayo balikho bapana ne Yerusalemu balecha baluambie kumulilo mala balwosie. Balosia akhaba ne chinju nicho babaandu boseliangamo biiunya kumuuya kumulayi khu Baali ne biianwa bie khunywa bibiachukhwa khulwe bawele babaandi khukhumbambia ese lirima.

³⁰Kalaba kario babaandu ba Isiraeli ne ba Yuda se bakholile sisiindu siosi siosi tawe, ne kakhali bumayaanu ebweeni wase, khukhwama khale.

³¹Lukoba luno lwambambiisie lirima ne bukhalafu khukhwama khu ndaalo niyo lwombakhilwakho khukhwola khu ndaalo yino. Khwako ndalurusia mu moni mwase.

³²Ndakhola ndio sikila bumayaanu bwe babaandu ba Isiraeli ne ba Yuda nibwo bakhola alala ne babaami babwe, babemeelesi, basaayi ne bang'oosi khukhumbambia ese lirima.

³³Bandekelesia ne se bandekeeresia tawe. Nakhaba ne nachiililila khubasomia, se barekeeresia banyoola liliekesia tawe.

³⁴ Bang'oona sisiindu sisinyisia ese mala basira munju yase khukifwolobia.

³⁵ Bombakhila wele Baali abuundu aesuta mu litooma lia okhwa Hinomu, khuanilao babaana babwe basoleeli ne bakhaana nga chimbosio khu wele Moleki, akhaba ese ne khabalaka tawe lundi se liaba mu mebaasio kase ndi bakhole lilisinyisia lino bario tawe, khukhola babaandu ba Yuda bakhole bubwoni.’ ”

³⁶Khwako Wele Omunyali Owa Bioosi, Wele owa Isiraeli aloma khu lukoba nilwo enywe mulomakho luno muli, “Lwaelesiibwe khu mwami owa Babiloni mungila eye liie, enjala ne lufu,”

³⁷lola ese ndababuusia alala khukhwama mu bibala bioosi nibio nabasalanisiamo mu lirima ne bukhalafu bwase ne burafu bukali. Ese khabakobosie abuundu ano mala mbakhole bamenye mu muleembe.

³⁸Bakhabe babaandu base ne ese khabe Wele wabwe.

³⁹Ese khabaelesie kumwoyo mulala ne ngila ndala mala bandie ese mindali na mindali khulwe bulayi bwabwe babeene, ne bwe babaana babwe akhaba babene ne bafwa.

⁴⁰Ese khakhole ne nabo endakaano eya mindali eloma eli se khalekhekho khubakholela bulayi tawe. Ne ndibakhola bandie nio bakhakhola bario banjanjukha lundi tawe.

⁴¹Ese khekhoyele khubakholela bulayi mala khabakhole bamenyele elala mu sibala sino mu busuubili ne kumwoyo kwase kwoosi.

⁴²Wele Omunyali Owa Bioosi aloma ali, “Bulayi bwene nga ne nareriire lilionaka likali lino lioosi khu baandu bano, khabareerere busa ndio bulayi bwoosi nibwo nabasuubisia.

⁴³Kimikuunda kikhakulwe mu sibala sino nisio enywe mulikho muloma muli, sianjuukhwe, omundu se alimo namwe esaang'i tawe, muli siaelesibwa Bakalitayo.

⁴⁴Kimikuunda kilakulwa chirupia, chibarwa che lifukiilisiana chikhaandikisibwe ne khureebwakho kamakhono ne khuba ne buloli, mu sibala sia Benjamini, siimbi Yerusalemu, mu ngoba cha Yuda, mu ngoba che mu sibala sie bikulu, mu ngoba cha Shefela ne mu ngoba che ebunafubo owa Yuda. Kakhabe kario sikila ese khakobosiele babaandu chikhabi chabwe.”