Read lubukusu Yer. 35 Bible Online

Yer. 35 - lubukusu bible

Yer. 35

¹ Wele Omunyali Owa Bioosi aboolela Yeremia mu ndaalo cha Yehoyakimu okhwa Yosia, omwami owa Yuda ali,

²“Cha khu be nju eya Rekabi mala olomalome ne nabo. Nomalile, bareere mu Lukaangu lwa Wele Omunyali Owa Bioosi, obengisie mu lusiro lulalakho, mala obaelesie endali banywe.”

³Nio Yeremia abukula Yaasania okhwa Yeremia (Yeremia aba okhwa Habasinia) ne bawandaaye, alala ne basoleeli bewe boosi ne be nju eya Rekabi boosi.

⁴Abareera munju ya Wele Omunyali Owa Bioosi mu lusiro lwe babaana ba Hanani (Hanani aba okhwa Ikidalia). Hanani aba omundu owa Wele. Lusiro olwo lwaba siimbi ne lusiro lwe babemeelesi, lundi lwaba angaaki we lusiro lwa Maaseya okhwa Shalumu, omuliindi we abuundu e khuulila.

⁵Nio Yeremia abukula bikoombe ne bibuumba bibichuule endali ara ebweeni we Barekabi mala ababoolela ali, “Nywa endali yino.”

⁶Ne kakhali Barekabi bakobosia Yeremia bali, “Efwe se khulanywa endali yosi yosi tawe, sikila Yonatabu okhwa Rekabu kuuka wefwe akhulaka ali, ‘Enywe mukhanywakho endali namwe basoleeli benywe tawe khulwa mindali na mindali.

⁷Mukhombakha chinju namwe mukhamiicha tawe, mukhabiaala namwe mwaba ne liruuti lie kimisabibu tawe. Ne kakhali mulamenya mu maeema mu ndaalo che bulamu bwenywe choosi nio mumenye chindaalo chingali mu sibala nisio mwaramamo nga bakwa.’

⁸Efwe khwaria lilaka lia kuuka wefwe Yonatabu okhwa Rekabu, khu koosi niko akhulaka, ali efwe, bakhasi befwe, basoleeli befwe ne bakhaana befwe khukhanywakho endali mu ndaalo che bulamu bwefwe choosi tawe.

⁹Lundi khukhombakha chinju che khumenyamo tawe. Se khuli ne kimikuunda kie kimisabibu namwe kimikuunda kie khulima tawe.

¹⁰Ne kakhali khwamenya mu maeema mala khwaria ne khukhola koosi niko Yonatabu paapa wefwe akhulaka.

¹¹Ne kakhali nga Nebukadinesa omwami owa Babiloni ne ebwaakala sibala siefwe khwaloma khuli, ‘Yiicha khuche e Yerusalemu sikila khwariire banamae be Bakalitayo ne banamae ba Shamu.’ Niko kakila ne khumenyile mu Yerusalemu muno.”

¹²Nio Wele Omunyali Owa Bioosi aboolela Yeremia kamakhuwa kano:

¹³Ese Wele Omunyali Owa Bioosi, Wele owa Isiraeli ndoma ndi, “Cha mala oboolele babaandu ba Yuda ne bamenywa ba Yerusalemu oli enywe se mukana khukhwekesibwa mala murie kamakhuwa kase tawe?

¹⁴Lilaka nilio Yonatabu okhwa Rekabu alaka basoleeli bewe ali bakhanywakho endali tawe, lialiindwa mala khukhwola endaalo eya luno, se banywechanga endali tawe. Kali kario sikila baria lilaka lia kuuka wabwe. Ese namubooleele ne nilamo ne se mwandekeresiisie tawe.

¹⁵Nachiililila khubarumira enywe bakholi base bang'oosi ne muboolela ndi, ‘Kaluukhana luno buli mundu khukhwama khu liba liewe limayaanu, mala mung'oone bikholwa bienywe ne mukhaloonda bawele babaandi mwabakholela ne khubasaaya tawe. Mwakhola murio mulamenya mu sibala nisio namuelesia enywe ne bakuuka benywe.’ Ne kakhali enywe se mwarekeeresia namwe mwambulila tawe.

¹⁶Be nju eya Yonatabu, (Yonatabu okhwa Rekabu) baliindile lilaka nilio kuuka wabwe abaelesia, ne kakhali enywe baandu base se mwandiire ese tawe.

¹⁷Khwako ese Wele Omunyali Owa Bioosi, Wele owa Isiraeli ndoma ndi, ‘Lola ndikho ndeera khu Yuda, ne khubamenywa ba Yerusalemu bubwonoki bwoosi nibwo naloma khubareerera. Kalaba kario sikila nalomaloma khu nibo mala se barekeeresia tawe, lundi nabalanga ne se bangobosia tawe.’ ”

¹⁸Ne Yeremia aboolela be nju eya Rekabu ali, “Wele Omunyali Owa Bioosi, Wele owa Isiraeli aloma ali, ‘Sikila enywe mwariire lilaka lia kuuka wenywe Yonatabu mala mwakholile koosi niko amulaka,

¹⁹khwako ese Wele Omunyali Owa Bioosi, Wele owa Isiraeli ndoma ndi omundu se alitamba mu be lisaaye lia Yonatabu okhwa Rekabu oliikholela ese tawe.’ ”