Read lubukusu Yer. 36 Bible Online

Yer. 36 - lubukusu bible

Yer. 36

¹ Mu mwiiko kukhola khane kwa Yehoyakimu, okhwa Yosia, omwami owa Yuda, Wele Omunyali Owa Bioosi aboolela Yeremia ali,

²“Bukula sitabu mala oandikemo kamakhuwa koosi niko ese khuboleele khuloondekhana ne Yuda ne Isiraeli ne chikholo choosi. Andika buli siindu nisio khuboleele khukhwama khale mu ndaalo nicho Yosia abeelakho omwami khukhwola luno.

³Khola orio nio wakana babaandu ba Yuda baulile kamabi koosi niko nenya khubakhola wakana buli mundu alekha liba liewe limayaanu mala ese mbabeele bumayaanu ne bubwoni bwabwe.”

⁴Nio Yeremia alanga Baruku okhwa Neria, mala amuboolela koosi niko Wele Omunyali Owa Bioosi aaba ne amuboleele. Baruku akaandika koosi mu sitabu nga Yeremia amuboolelanga.

⁵Ne Yeremia aboolela Baruku ali, “Ese nakhingiliilwe khukhwingila mu Lukaangu.

⁶Nono ewe olacha, mala khu ndaalo eye khunyoa eye khukhweyimana khulia, osomele mu Lukaangu kamakhuwa ka Wele Omunyali Owa Bioosi niko khuboleele waandika, babaandu boosi ne barekeeresie. Akhaba lundi okhasomele babaandu ba Yuda barurire mu ngoba chabwe.

⁷Khola orio nio wakana basaba mala Wele Omunyali Owa Bioosi aulila lundi wakana buli omundu alekha liba liewe limayaanu, sikila lirima ne bukhalafu nibwo Wele Omunyali Owa Bioosi alomile khu baandu bano buli bukali.”

⁸Nio Baruku okhwa Neria akhola koosi bulayi bwene nga omung'oosi Yeremia ne aba namulakilisie. Asomela mu Lukaangu kamakhuwa ka Wele Omunyali Owa Bioosi khukhwama mu sitabu.

⁹Mu mwiiko kukhola kharaano kwa Yehoyakimu okhwa Yosia nga omwami owa Yuda, mu mweesi kwa tisa, babaandu boosi mu Yerusalemu ne babaandu boosi babarama mu ngoba cha Yuda bacha Yerusalemu balangiliila lilieyimana ebweeni wa Wele Omunyali Owa Bioosi.

¹⁰Nio Baruku asoma kamakhuwa ka Yeremia khukhwama mu sitabu. Asomela mu Lukaangu, mu lusiro lwa Kemaria okhwa Siafani, (Siafani aba omuandiki we mu luuya lwo mwami.) Lusiro olwo lwaba khu luuya luboofu, abwingililo bwe silibwa siyia sienju ya Wele Omunyali Owa Bioosi. Baruku asoma kamakhuwa kano babaandu boosi ne barekeeresie.

¹¹Nga Mikaya okhwa Kemaria, omwichukhulu owa Siafani, aulila kamakhuwa ka Wele Omunyali Owa Bioosi koosi khukhwama mu sitabu,

¹²ekha acha munju yo mwami mu lusiro lwo muandiki, ne babemeelesi boosi baba bekhaale mumwenomu. Baaba Elisiama omuandiki, Delaya okhwa Shemaya, Elinatani okhwa Akibori, Kemaria okhwa Siafani, Sedekia okhwa Hanania ne babemeelesi boosi.

¹³Nio Mikaya ababoolela kamakhuwa koosi niko aba ne nauliile Baruku ne asoma sitabu babaandu boosi ne barekeeresie.

¹⁴Nio babemeelesi boosi baruma Yehuti okhwa Netania (Netania aba okhwa Selemia, ne Selemia aba okhwa Kushi) aboolele Baruku ali, “Bukula sitabu nisio osomeele babaandu mala wiche.” Nio Baruku okhwa Neria abukula sitabu mala acha niio babemeelesi baba.

¹⁵Bamuboolela bali, “Yikhala asi mala okhusomele.” Nio Baruku abasomela.

¹⁶Nga baulila kamakhuwa koosi, balolana buli omundu khu wasie mala baba ne buri. Nio baboolela Baruku bali, “Khukhwola khuboolele omwami kamakhuwa kano koosi.”

¹⁷Nio bareeba Baruku bali, “Khuboolele, oandike oriena kamakhuwa kano koosi? Yeremia niye okhuboolelenge ne ewe oandika?”

¹⁸Baruku abakobosia ali, “Yee amboolelenge kamakhuwa kano koosi ne ese ngaandika ne bubwino mu sitabu.”

¹⁹Nio babemeelesi baboolela Baruku bali, “Cha mala mwekise, ewe ne Yeremia ne omundu yesi yesi akhamanya niio muli tawe.”

²⁰Nio babemeelesi bacha khu luuya niio omwami aba. Baaba babikhile sitabu mu lusiro lwa Elisiama, omuandiki, mala baboolela omwami kamakhuwa koosi.

²¹Nio omwami aruma Yehuti khureera sitabu, mala asibukula khukhwama mu lusiro mwa Elisiama omuandiki. Yehuti asomela omwami ne babemeelesi boosi ba baaba ne bemile ne khubotookhelela omwami.

²²Kwaba kumwesi kwa tisa ne omwami aba ekhaale munju eye siise sie kumunaane ne kumulilo kwe kamaanda kwaba ebweeni wewe.

²³Nga Yehuti ne asomanga buli chikaratasi chitaru namwe chine mu sitabu, omwami achikhalanga ne kumubano kumufumba, mala achimwaata mu mulilo, khukhwola nga sitabu sioosi ne siaya siawa.

²⁴Ne kakhaba kario, omwami namwe mulala khu bakholi bewe babaulila kamakhuwa kano koosi, se baria namwe se bekesiakho liliekanila tawe.

²⁵Elinatani ne Tetaya ne Kemaria bekoonjelela omwami akhosia sitabu tawe, ne se arekeeresia tawe.

²⁶Nio omwami alaka Yeraimeeli, omusoleeli wewe, ne Seraya okhwa Asirieli ne Shelemia okhwa Abuteeli baambe Baruku omuandiki owa Yeremia no mung'oosi Yeremia omwene, ne kakhali Wele Omunyali Owa Bioosi abakisa.

²⁷Enyuma wo mwami Yehoyakimu khukhwosia sitabu sie kamakhuwa niko Yeremia aboolanga ne Baruku aandika, Wele Omunyali Owa Bioosi aboolela Yeremia ali,

²⁸“Bukula sitabu sisiindi mala oandikemo kamakhuwa koosi kakabeele mu sitabu sie khunyoa, nisio Yehoyakimu omwami owa Yuda osiisie esio.

²⁹Ne khu Yehoyakimu omwami owa Yuda loma oli, ‘Wele Omunyali Owa Bioosi aloma ali, “Ewe wosiisie sitabu sino noloma oli, siina sikila noandikemo oli omwami owa Babiloni ng'ali alecha onake sibala sino, mala eere babaandu ne chisaang'i chasio?

³⁰Khwako Wele Omunyali Owa Bioosi aloma ali khuloondekhana ne Yehoyakimu omwami owa Yuda, mbao omundu khu be lisaaye liewe olila khu bwami bwa Daudi tawe. Yehoyakimu akheerwe mala kumubili kwewe kubakalwe khu muumu ne mu bunyifu bwe siilo.

³¹Ne ese khamuelesie niye siiukuumo alala ne lisaaye liewe ne bakholi bewe khulwe butinyu bwabwe. Khabareerere busiku bwoosi nibwo naloma khu baandu ba Yuda, khu bamenywa ba Yerusalemu, ne se bambulila tawe.’ ”

³²Nio Yeremia abukula sitabu sisiindi aelesia Baruku omuandiki, okhwa Neria. Yeremia amuboolelanga kamakhuwa koosi kakaba mu sitabu nisio Yehoyakimu omwami owa Yuda aba ne osiisie, mala atasakho kakaandi kamakali kafwaanana ne nako, mala Baruku aandika.