Read lubukusu Yer. 37 Bible Online

Yer. 37 - lubukusu bible

Yer. 37

¹ Omwami Nebukadinesa owa Babiloni akhola Sedekia okhwa Yosia khuba omwami owa Yuda mu bweyaangu bwa Yehoyakini okhwa Yehoyakimu.

²Ne kakhali Sedekia ne bakholi bewe ne babaandu bewe se barekeeresia kamakhuwa ka Wele Omunyali Owa Bioosi niko ababoolela khubirira khu mung'oosi Yeremia tawe.

³Omwami Sedekia aruma Yehukali okhwa Shelemia no musaayi Sefania, okhwa Maaseya khu mung'oosi Yeremia bamuboolele bali, “Khusabile khu Wele Omunyali Owa Bioosi, Wele wefwe.”

⁴Siise esio Yeremia aba asiili khubowa tawe, aba omulekhuule khukeenda mu baandu.

⁵Banamae ba Babiloni baba babotookheleesie Yerusalemu, ne nga baulila bali banamae ba Misiri baambukhe kumupaka, se bacha ebweeni lundi tawe.

⁶Nio Wele Omunyali Owa Bioosi aboolela omung'oosi Yeremia ali,

⁷“Ese Wele Omunyali Owa Bioosi, Wele owa Isiraeli ndoma ndi, ewe boolela omwami owa Yuda okhurumire usabe oli, ‘Banamae ba Farao bechile khumuabina bali siimbi khukobola e Misiri mu sibala siabwe.

⁸Ne Bakalitayo balakobola bapane ne babaandu be lukoba luno. Balaluamba mala balwosie.

⁹Wele Omunyali Owa Bioosi aloma ali, mukhebea mwabene ne muloma muli, “Ng'ali Bakalitayo bachiliile elala tawe, sikila balakobola.

¹⁰Ne mwakhaba ne muula banamae boosi be Bakalitayo balikho bamupania, mala barame baumiie bong'ene, buli mundu akone mu liiema liewe, babaandu abo balenyokha mala bosie lukoba luno.’ ”

¹¹Nga banamae be Bakalitayo ne babona banamae ba Farao ne bembiya, Bakalitayo barura mu Yerusalemu.

¹²Yeremia acha mu sibala sie Babenjamini khunyoola kumukabwa kwewe kwe kimiaandu ebweeneyo, mu baandu bewe.

¹³Nga ne aaba nali asilibwa sia Benjamini omwimeelesi we banamae owalaangwa bali Iriya okhwa Shelemia, omwichukhulu owa Hanania amuaamba ne aloma ali, “Ewe olikho wenya khuyeeta Bababiloni.”

¹⁴Ne Yeremia amukobosia ali, “Bubeeyi, ese se ndikho njeeta Bababiloni tawe.” Ne Iriya se amurekeeresia tawe ne kakhali amuaamba mala amuyila khu bemeelesi.

¹⁵Babemeelesi bakhalalila Yeremia lukali, bamupa mala bamura mu siboe munju eya Yonasani omuandiki, sikila bakikhola nga enju eye siboe.

¹⁶Yeremia abowa mu sikoro munju eye siboe mala amenyamo khulwe chindaalo chingali.

¹⁷Enyuma wako omwami Sedekia arumania bamureerere Yeremia, mala amwakaanila. Omwami amuyila munju mwewe mala amureeba mu bwikisi ali, “Burume bwosi bwosi bulikhoo khukhwama khu Wele Omunyali Owa Bioosi?” Yeremia amukobosia ali, “Yee buliio.” Mala amuboolela ali, “Ewe okhaambwe ne omwami owa Babiloni.”

¹⁸Ne lundi Yeremia areeba omwami Sedekia ali, “Siina siibi nisio ese khukholeele ewe ne babemeelesi bowo namwe babaandu bano nio wanda ese mu siboe?

¹⁹Bang'oosi bowo babakhung'oolelanga ewe ne baloma bali, ‘omwami owa Babiloni se alakhwibwaakala ewe namwe sibala sino tawe,’ bali waena?

²⁰Nono ulila, khusaba omwami, liliikoonjelela liase lie lilieboombia likhoya likhwolele mala okhangobosia munju eya Yonasani omuandiki tawe, ne busa khola ndio nafwilamo.”

²¹Nio omwami Sedekia aana kamalaka, mala Yeremia abowa khu luuya lwo muliindi we lichipi mala bamuelesianga kumukaati mulala buli endaalo khukhwama munju eye kimikaati. Bakhola bario khukhwola nga kimikaati kie mu lukoba ne kiawa. Ne Yeremia achiililila khumenya mu luuya lwo muliindi we lichipi.