Read lubukusu Yer. 38 Bible Online

Yer. 38 - lubukusu bible

Yer. 38

¹Nono Shefatia okhwa Matani, Ketalia okhwa Pashihuri, Yukali okhwa Shelemia ne Pashihuri okhwa Kwini, baulila koosi niko Yeremia aboolela babaandu boosi ali,

²“Wele Omunyali Owa Bioosi aloma ali, omundu olarama mu lukoba luno akhafwiile mwiie, namwe afwe enjala nga ta lufu, ne kakhali oyo oweana khu Bababiloni alaona. Alakhaka khuonia bulamu bwewe mala amenye.

³Wele Omunyali Owa Bioosi aloma ali, lukoba luno ng'ali lulaanwa khu banamae bo mwami owe Babiloni mala lulaambwa.”

⁴Nio babemeelesi baboolela omwami bali, “Lekha omundu yuno erwe sikila alikho amala kamaani mu banamae babarama mu lukoba luno, ne mu baandu boosi khulwe khubaboolela kamakhuwa nga kano kari. Omundu yuno se ayiima kamalayi khu baandu bano tawe, ne kakhali abayimila busiku.”

⁵Omwami Sedekia abakobosia ali, “Lola ali mu bunyali bwenywe, sikila ese se nyala namukholela enywe kamabi tawe.”

⁶Khwako babukula Yeremia bamuboa kimikoye bamwikhisia mwiloo lie kameechi lia Kwini, omusoleeli wo mwami liliaba khu luya lwe lichipi. Nio bekhisilia Yeremia mwiloo elio khu mikoye. Liloo liaba liatenya ne kakhali kamatosi kabamo, mala Yeremia eyinikha mu matosi.

⁷Ebetimeleki omukholi, omuchili khukhwama Kushi owaba munju yo mwami aulila bali bamwaatile Yeremia mwiloo. Siise esio omwami aba akhosia ekesi mu silibwa sia Benjamini.

⁸Ebetimeleki arura munju yo mwami acha aboolela omwami ali,

⁹“Omwami babaandu bano bakholile bumayaanu koosi niko bakholile khu mung'oosi Yeremia khulwe khumwikhisia mwiloo mala enjala elamwiriramo sikila kumukaati se kwaramirekho mu lukoba luno tawe.”

¹⁰Nio omwami alaka Ebetimeleki omukushi ali, “Bukula ano babaandu bataru muche mukhweese omung'oosi Yeremia mumurusie enje nakhafwa tawe.”

¹¹Nio Ebetimeleki abukula babaandu bataru acha nabo munju yo mwami, engila mu kabati eye chingubo mala abukulamo chingubo chichatabukha. Alarira khu mikoye mala ekhisilia Yeremia mwiloo.

¹²Nio Ebetimeleki Omukushi aboolela Yeremia ali, “Bukula chingubo echo ne kimikoye ore mukhwaa mwowo” Mala Yeremia akhola ario.

¹³Nio bakhweesa Yeremia bamurusia mwiloo lie kameechi. Nio Yeremia arama khu luuya lwe lichipi lwe baliindi.

¹⁴Omwami Sedekia arumania balanga omung'oosi Yeremia, nio amwakaanila amuliango kwe khataru kwe Lukaangu lwa Wele Omunyali Owa Bioosi. Omwami aboolela Yeremia ali, “Ndakhureeba lireeba mala okhangisakho sisiindu tawe.”

¹⁵Yeremia akobosia Sedekia ali, “Nakhuboolela bung'ali, ewe seunjira? Ne nakha khukaambila, ewe se olandekeeresia tawe.”

¹⁶Nio omwami Sedekia, echubila Yeremia mu bwikisi ali, “Nga Wele Omunyali Owa Bioosi ne amenyile mindali, owabuumba kimiooyo kiefwe, se ndakhwira namwe khuaane khu baandu babenya khukhwira bano tawe.”

¹⁷Nio Yeremia aboolela Sedekia ali, “Wele Omunyali Owa Bioosi, Wele owe banamae, Wele owa Isiraeli aloma ali, ‘Waaba noleaana khu bemeelesi bo mwami owa Babiloni, aba olaonia bulamu bwowo, ne lukoba luno se lulosibwa tawe, ne ewe ne be nju bowo mulaona.

¹⁸Ne kakhali waaba nokheaana khu bemeelesi bo mwami owa Babiloni tawe, nio aba lukoba luno lulaanwa khu Bababiloni mala balalwosia ne ewe solabebachakho tawe.’ ”

¹⁹Omwami Sedekia akobosia Yeremia ali, “Ese nariire Baeburania baambanile ne Bababiloni, khola ndio naanwa khu nibo mala banjekheelela.”

²⁰Yeremia amuboolela ali, “Se olaanwa khu nibo tawe. Luno ria kamakhuwa ka Wele Omunyali Owa Bioosi niko khuboolela ne olaba bulayi mala olaona.

²¹Ne kakhali waaba noloba khukhwilekhuula, kano niko kamalola niko Wele Omunyali Owa Bioosi anjekesie,

²²lola bakhasi balekhilwe munju yo mwami owa Yuda balikho barusibwa bayilwa khu bemeelesi bo mwami owa Babiloni mala bakhasi chana balikho baloma bali, ‘Omwami, basaale bowo basuubilwa bakhubeyile mala bakhuulile luno bikele biowo biesikhile mu lutoondoyi, nono bakhwanjukhe ao.’ ”

²³Yeremia aatasakho ali, “Bakhasi bowo boosi ne basoleeli balatiilwa bayilwe khu Bakalitayo ne ewe se olibebachakho tawe, ne kakhali olatiilwa no mwami owa Babiloni mala lukoba luno lulosibwa.”

²⁴Nio Sedekia akobosia Yeremia ali, “Okhaboolelakho omundu kamakhuwa kano tawe busa olafwa.

²⁵Kaaba bali banamae base ne baulila bali ndomaloome ne nawe mala bakhureebe bali, ‘Khuboolele niko waboleele omwami, nende niko omwami akhubooleele, okhakhukisakho sisiindu siosi tawe, aba solerwa tawe,’

²⁶baboolele oli, ‘Mu liboombia liase nekoonjeleele omwami akhangobosia munju eya Yonasani nafwilamo tawe.’ ”

²⁷Babemeelesi boosi bacha khu Yeremia bamureeba mala abakobosia bulayi bwene nga omwami ne amuboolela. Nio balekha khulomaloma ne naye sikila se baba bauliile elomo eya Yeremia no mwami tawe.

²⁸ Ne Yeremia amenya khu luuya lwe lichipi lio mwami khukhwola khu ndaalo niyo baambilakho Yerusalemu.