Read lubukusu Yer. 39 Bible Online

Yer. 39 - lubukusu bible

Yer. 39

¹Mu mwesi kwe khumi kwe kumwiiko kwa tisa kwa Sedekia nga omwami owa Yuda, Nebukadinesa omwami owa Babiloni ne banamae bewe boosi becha babotookhelesia Yerusalemu.

²Khu ndaalo eya tisa, eye kumwesi kwa khane kwe kumwiiko kukhola ekhumi na mulala kwa Sedekia nga omwami, lisiisi lie lukoba lwatechulwa.

³Nga Yerusalemu ne lwaambwa, babemeelesi boosi bo mwami owa Babiloni becha bekhela mu silibwa sie akari. Babemeelesi abo baba Nerikalisiaresa, Samukarinebo, Saresekimu Omurabusari, Nerikali-siaresa Omurabumaki alala ne babemeelesi babaandi boosi bo mwami owa Babiloni.

⁴Sedekia, omwami owa Yuda ne banamae bewe boosi babona banamae ba Babiloni. Nga bababona belukha mu silo barura mu lukoba, babirira khu ngila eye kumukuunda kwo mwami, babira mu silibwa siili akari we kamasiisi kabili mala bacha mwitooma lia Yoritani.

⁵Ne kakhali banamae ba Bakalitayo babaloondakho mala batiilila Sedekia mu keewa eya Yeriko. Nga bamuaamba, bamureera khu Nebukadinesa omwami owa Babiloni, e Ribula, mu sibala sia Hamati, mala amukhalakila ebweeneyo.

⁶Omwami owa Babiloni eera basoleeli ba Sedekia mu moni cha Sedekia e Ribula, alala ne babemeelesi ba Yuda boosi.

⁷Oli amala ario, arusiamo Sedekia chimoni mala amuboa kiminyololo amuyila e Babiloni.

⁸Bababiloni bosia lichipi lio mwami Sedekia, ne chinju che babaandu bewe mala batechula kamasiisi ke lukoba lwa Yerusalemu.

⁹Ekhumaliilikha Nebusaratani, omunamae omwimeelesi we baliindi abukula babaandu boosi abayila mu mbaambe e Babiloni, abo bababa ne baambana naye, alala ne babarama mu lukoba.

¹⁰Nebusaratani, omunamae omwimeelesi alekha mu sibala sia Yuda batambi, bakhali na siindu tawe, mala abaelesia biluundu bie kimisabibu ne kimikuunda.

¹¹Ne omwami Nebukadinesa aelesia Lilaka Nebusaratani omunamae, omwimeelesi khuloondekhana ne Yeremia naboola ali,

¹²“Bukula Yeremia, omulinde bulayi, okhamukholakho liibi liosi liosi tawe, ne kakhali mukholele nga akhuboolela.”

¹³Nio Nebusaratani omunamae omwimeelesi, Nebusiasibani omurabusari, Nerikalisiaresa Omurabumaki ne babemeelesi babaandi boosi bo mwami owa Babiloni,

¹⁴barumania babukula Yeremia khukhwama mu luuya lwo muliindi we lichipi. Bamwakaanisia Ketalia okhwa Ahikamu, omwichukhulu owa Siafani amuyile engo. Nio Yeremia amenya mu baandu bewe.

¹⁵Wele Omunyali Owa Bioosi aboolela Yeremia nga ne aaba ne ekaliliilwe mu luuya lwe lichipi ali,

¹⁶“Cha oboolele Ebetimeleki omukushi oli, ‘Wele Omunyali Owa Bioosi, Wele owa Isiraeli aloma ali, lola ese ndakhola khu lukoba luno niko naloma. Ndalukholakho kamabi ne se kali kamalayi tawe. Ne endaalo niyo kaliekholekhela, kaliekhola ewe ne ololeleele.

¹⁷Ne kakhali ndikhusikula ewe endaalo eyo ne seoliaanwa khu baandu nibo oriire abo tawe.

¹⁸Sikila ng'ali khakhuonie ne se okhererwe mwiie tawe, ne kakhali okhaonie bulamu bwowo. Kakhabe kario sikila ewe wanjeyikina ese.’ ”