Read lubukusu Yer. 4 Bible Online

Yer. 4 - lubukusu bible

Yer. 4

¹Wele Omunyali Owa Bioosi aloma ali, “Babaandu ba Isiraeli, mwaba ne mwenya khukobola, aba ngobolele. Mwaba ne muli basuubilwa khwise, rusiao bifwaani nibio nabiila,

²mwechuba muli ‘Nga Wele Omunyali Owa Bioosi ne amenyile mindali,’ mu bung'ali, mu buluungi ne mu ngila endayi, aba ndabiita chikholo chikhabi, mala chilebonia sikila ese.”

³ Sikila Wele Omunyali Owa Bioosi aboolela babaandu ba Yuda nende abo bamenyile mu Yerusalemu ali, “Lima liirome lienywe, ne mukhamiicha mu mawa tawe.

⁴Baandu ba Yuda enywe nende bamenywa ba Yerusalemu, Yekwalaasia sikila ese Wele Omunyali Owa Bioosi, rusiakho lifuunga lie mu miooyo kieywe, busa lirima liase lilaburukha nga kumulilo, mala lichiililile khuburukha. Mbao oolalisimia tawe, sikila bumayaanu bwe bikholwa bienywe.”

⁵Loma mu Yuda, mala wilwache mu Yerusalemu ne oloma oli, “Khupa lulwiika mu sibala sioosi, kukuula lukali mala mulome muli, ‘Yibuusia alala mala khuche, mu ngoba chichakarwa ne lisiisi lie buliindi!’

⁶Suta ependera wekeselele e Sayuni, Yilukha muone, mukhaayilila tawe, sikila ese ndikho ndeera butinyu khukhwama ebunaswa, ne libuna likali.

⁷Etalang'i yarurire mu sichakha siayo, Omwonaki owe chikholo arurire amile abuundu wewe, achile khukhwonaka sibala sienywe, chingoba chenywe chilatechulwa chibe kamakubili, kakhalimo babaandu tawe.

⁸Sikila kano yifwara kamakunia, mwiunamile ne khulila, sikila lirima lia Wele Omunyali Owa Bioosi, se liakhulekhile tawe.”

⁹Wele Omunyali Owa Bioosi aaloma ali, “Khu ndaalo eyo bunyindaafu bukhawe mu baami ne babemeelesi babwe, basaayi bakhesiindukhe ne bang'oosi bakharangararwe.”

¹⁰Nio ese naloma ndi, “Aa, Omwami WELE, ng'ali ewe wabeyile babaandu bano lukali, ne Yerusalemu ne oloma oli, ‘Mulaba ne kumuleembe’ ne eyi lifwa liaboolilekho.”

¹¹Asiise esio babaandu bano nende be mu Yerusalemu baliboolelwa bali, “Ekhuungu embile khukhwama khu bikulu bibiomu mu siangalaamwe elauucha elole niio babaandu ba Wele Omunyali Owa Bioosi bali. Se eli eye khubisia likhuchi namwe eye khuseesa tawe.

¹²Eli ekhuungu engali khukhilakho yino, yiicha sikila ese luno Wele Omunyali Owa Bioosi ndalomaloma bukhalaki bwase khu nibo.” Wele Omunyali Owa Bioosi aloma ali,

¹³“Lola omusiku alikho echela, mu ngaaki nga kamafuumbi, kamakaari kewe ke liie kali nga sisifuusia, chifarasi chewe chili ne chimbilo khukhila chifuruusi. Butinyu bwakhunyoolile, khwabunile!

¹⁴Ee, Yerusalemu, siinga kumwoyo kwowo bumayaanu bururemo, nio oonisibwe. Olamenya ne kamebaasio kamamayaanu mwiwe khukhwola liina?

¹⁵Sikila kumumilo khukhwama Dani, ne khukaania bumayaanu khukhwama khu sikulu sia Efuraimu.

¹⁶Kaania chikholo oli alikho echa boola mu Yerusalemu. Balubotookheleesie baama mu sibala sie aleeyi, bayokelela chingoba cha Yuda.

¹⁷Nga baliindi be kumukuunda, bakariire Yerusalemu, sikila babaandu bamwo bakholeele ese sileka.

¹⁸Chingila chowo ne bikholwa biowo, biakhurereere kano, lino lili libuna lienywe, lili lirafu, mala limuchuunia kimiooyo.”

¹⁹Ndi mu bubeeleli, ndi mu bubeeleli, Ese niunamila mu buchuuni, Yee, buli abuundu mu mwoyo mwase, kumwoyo kulikho kuupa lukali, se nyala nasila tawe, sikila nauliile ekhoombi ne yipa, lulwiika lwe liie.

²⁰Busiku buloondela busiku, sibala sioosi sionakakwe, kamaeema kase konakakwe ne chisuuka chase mu siise sitiiti.

²¹Ese ndabona ependera khulwe siise siina? Ne mbulila ekhoombi ne yipa khulwe siise siina?

²²“Sikila babaandu base bali basilu, se bamanyile ese tawe, bali babaana basilu, se bali ne limanya tawe, bali bamanyile lukali khukhola bumayaanu, ne se bamanyile khukhola kamalayi tawe.”

²³Nalola khu sibala, siaba sionaakwe mala se silimo engakha tawe, Ne mu ngaaki se mwabamo buwaanga tawe.

²⁴Nalola khu bikulu, biaba bilikho biterema, ne bikulu bioosi bicha eyi ne neyi nga kumwesuubo.

²⁵Nalola mala omundu se abao tawe, ne chinyuni choosi chaba chapuruukhe.

²⁶Nalola, mala nabona sibala sie bibiaamo siekelile sisiangalaamwe, ne chingoba choosi chatechuulwe chekholile kamakuunda, ebweeni wa Wele Omunyali Owa Bioosi, ebweeni we lirima liewe lirafu.

²⁷Wele Omunyali Owa Bioosi aloma ali, “Sibala sioosi silanjukhwa, ne kakhaba kario, se ndasionakila elala tawe.

²⁸Sibala silalila, ne likulu angaaki lilamaliia sikila ese nalomile lundi nakhalake, nabisiisie ne se ndakobola enyuma tawe.”

²⁹Khulwe buyoka bwe batimia chifarasi, no munamae owe buyiingo, buli babaandu be lukoba belukha, bengila mu bichakha, baniina khu mabaale, chingoba choosi chanjukhwe, ne mbao omundu ochimenyamo tawe.

³⁰Ne ewe, Ee owonakwa, olikho wibaasia siina nga wifwara chimbesemu orio nio werona ne kamamili ke sahabu, nio weakhe chimoni weakhe lukoondo lwa busa. Basiime bowo bakhulekelesia, bayiima khukhwira.

³¹Sikila naulila lilila nga lio mukhasi olumwa, buchuuni nga bwoyo olikho osaala omwana wewe omubele. Lilila lie babaandu ba Sayuni lie khuochaocha, akololosia kamakhono kewe Sayuni ne khuloma ali, “Butinyu bwanyoola! Balikho becha khukhunjira!”