Read lubukusu Yer. 40 Bible Online

Yer. 40 - lubukusu bible

Yer. 40

¹Wele Omunyali Owa Bioosi alomaloma ne Yeremia enyuma wa Nebusaratani omunamae omwimeelesi ne alekhuulile Yeremia e Rama. Yeremia aba ayilwa Rama nali omuboe alala ne babaandu babaandi khukhwama Yerusalemu ne Yuda ba baaba ne bayilwa e Babiloni nga baboe.

²Omunamae we baliindi abukula Yeremia amuyila alubeka mala amuboolela ali, “Wele Omunyali Owa Bioosi, Wele wowo alangiliile bubi buno bukwe abuundu ano.

³Wele Omunyali Owa Bioosi akholile nga aloma. Kabeele kario, sikila enywe mwakholela Wele Omunyali Owa Bioosi bubwoni mala se mwaria niko aloma tawe, niko kakila busiku buno ne bumunyoolile enywe.

⁴Lola endaalo yino ese ndikho khukanguluula kiminyololo kirure khu makhono kowo. Bwaba ne buli bulayi khwiwe, khuche e Babiloni fwembi, yiicha mala ese ndakhuliinda bulayi. Ne waaba nokheulila bulayi khucha ne nase e Babiloni tawe, okhecha tawe. Lola, sibala sioosi sili ebweeni wowo. Cha osi osi niio wibaasia oli ali alayi khwiwe.”

⁵Nebusaratani achiililila khuloma ali, “Waaba norama, nono kobola khu Ketalia okhwa Ahikamu, omwichukhulu owa Siafani, niye omwami owa Babiloni arobora khuba omwimeelesi khu ngoba cha Yuda, mala omenye naye mu baandu bowo, namwe oche niio wibaasia oli ali alayi khwiwe.” Nio omwimeelesi we baliindi alaka Yeremia anyolenge siakhulia mala amuelesia siianwa ne khumulekhuula ache.

⁶Ne Yeremia acha amenya ne Ketalia okhwa Ahikamu e Misipa, mala amenya ne babaandu boosi babarama mu sibala.

⁷ Nga banamae bakhulu be lukoongo baulila bali omwami owa Babiloni aroboore Ketalia okhwa Ahikamu abe omuruki we sibala sia Yuda, mala amueleesie babaandu be siseecha nende be siikhasi ne babaana, babaandu ba baaba bataambi lukali, baakhabukulwa bayilwa mu mbaambe e Babiloni tawe.

⁸Nio banamae bakhulu abo bacha khu Ketalia e Misipa. Baba Ishimaeli okhwa Netania, Yoanani okhwa Karea, Sereya okhwa Tanihumeti, ba okhwa Efai omunetofa, Yesania okhwa Mumaaka alala ne babaandu babwe.

⁹Ketalia okhwa Ahikamu omwichukhulu Shafani abechubila nibo ne babaandu babwe naloma ali, “Mukharia khukholela Bababiloni tawe. Menya mu sibala sino mala mukholele omwami owa Babiloni mala mulamenya busa bulayi.

¹⁰Ne ese ndamenya e Misipa khu mubabila enywe ebweeni we Bababiloni bakhecha niio khuli tawe. Ne enywe, buusia endali, bibiaamo bie siimiyu ne kamafura mala mubikhe bulayi mu biindu. Ne menya mu ngoba chenywe nicho mubukulele.”

¹¹Ne Baisiraeli boosi ba baaba mu Moabu ne ba baba mu Baamoni, ne ba baaba mu Edomu ne mu bibala bibiindi nga baulila bali, omwami owa Babiloni aba alekha ba Isiraeli babarama bamenye mu Yuda mala aba aroboore Ketalia okhwa Ahikamu omwichukhulu Shafani nga omuruki wabwe.

¹²Baisiraeli boosi bakobola khukhwama buli abuundu niio belukhila mala bakobola mu sibala sia Yuda, khu Ketalia e Misipa mala babuusia endali, bibiaamo bibiaba bie siimiyu bikali.

¹³Enyuma wakano, Yoanani okhwa Karea ne babemeelesi boosi be mu lukoongo becha khu Ketalia e Misipa.

¹⁴Bamuboolela bali, “Ewe omanyile oli Baalisi omwami we Baamoni arumire Ishimaeli okhwa Netania khukhwira ku?” Ne Ketalia okhwa Ahikamu se abasuubila tawe.

¹⁵Nio Yoanani okhwa Karea acha e Misipa khu Ketalia alomaloma ne naye mu bwikisi ali, “Lekha ese nje niire Ishimaeli okhwa Netania ne omundu yesi yesi se alamanyakho tawe. Siina sikila akhwire ewe nio Bayaudi boosi bakhwibuusisieo basalanile? Siina sikila babaandu ba Yuda babarama babune?”

¹⁶Ne kakhali Ketalia akobosia Yoanani okhwa Karea ali, “Okhakhola orio tawe, ewe olikho obeela busa Ishimaeli.”