Read lubukusu Yer. 41 Bible Online

Yer. 41 - lubukusu bible

Yer. 41

¹ Mu mwesi kwa saba kwe kumwiiko okwo, Ishimaeli okhwa Netania omwichukhulu owa Elishama wenju eye bubwami echa ne babaandu ekhumi e Misipa khu Ketalia okhwa Ahikamu Ishimaeli aba mulala khu bemeelesi bo mwami. Nga ne baba ne balia siakhulia alala,

²Ishimaeli ne babaandu ekhumi abo benyokha mala beera Ketalia okhwa Ahikamu omwichukhulu Siafani ne mbalu omwami owa Babiloni aba arobora Ketalia khuba omuruki owa Yuda.

³Ishimaeli lundi eera Bayaudi boosi ba baaba ne Ketalia e Misipa alala ne banamae ba Babiloni ba baaba ebweeneyo.

⁴Endaalo eloondakho, enyuma we khukhwira Ketalia, omundu yesi yesi nakhamanyakho tawe,

⁵babaandu kamakhumi munaane boola khukhwama e Shekemu, ne Silo ne Samaria. Baba babekile bunwanwa ne chingubo chabwe chatabuukhe lundi bekhalakaake, bareera biianwa bie biakhulia ne biiunya bulayi mu Lukaangu lwa Wele Omunyali Owa Bioosi.

⁶Nio Ishimaeli arura enje khukhwama Misipa abakanile, aba alikho alila nga ne arura. Nga ne abakaanila, ababoolela ali, “yiicha mukari mubone Ketalia.”

⁷Nga bengila mu lukoba busa bari, Ishimaeli ne babaandu bewe babeera mala bamwaata kimibili kiabwe mwiloo lie kameechi.

⁸Ne kakhali babao babaandu ekhumi mu nibo ba baboolela Ishimaeli bali, “Nosiima okhakhwira tawe. Efwe khuli ne ngano, eshayiri, kamafura ke chisabibu ne bubuukhi, khwakisile mundaa.” Nio khubeera tawe, mu basiaabwe.

⁹Liloo lie kameechi nilio Ishimaeli amwaatamo kimibili kie babaandu nibo eera liaba libalaayi lukali nilio Omwami Asa owa Yuda aba nayabile nga omwami Baasha owa Isiraeli nga aba ne amwibwaakale. Ishimaeli echusia liloo elio ne bafu.

¹⁰Nio Ishimaeli ara mu siboe bakhaana bo mwami, alala ne babaandu babarama boosi, ba baaba mu Misipa, nibo Nebusaratani omunamae omuliindi aaba ne aara mu buliindi bwa Ketalia okhwa Ahikamu. Ishimaeli ababukula nga baboe mala atuuma nabo lulwakha alola mu sibala sie Baamori.

¹¹Ne nga Yoanani okhwa Karea, ne babemeelesi be banamae boosi ne baulila kamamayaanu koosi niko Ishimaeli aba akholile,

¹²babukula babaandu babwe boosi mala bacha khukhwibwaakala Ishimaeli okhwa Netania. Bamuyila sie tiisi liboofu lili Kibeoni.

¹³Nga baboe nibo Ishimaeli aba nabo boosi ne babona Yoanani ne babemeelesi be banamae, bekhoya.

¹⁴Nio baboe boosi nibo Ishimaeli aba ne abukula khukhwama Misipa, batima bakobola bacha niio Yoanani ali ne babaandu bewe.

¹⁵Ne kakhali Ishimaeli ne babaandu bewe munaane, belukha bebacha khu Yoanani, belukhila mu sibala sia Amoni.

¹⁶Nio Yoanani ne banamae babemeelesi babukula babaandu abo boosi nibo Ishimaeli aba natiilile nga baboe khukhwama Misipa enyuma we khukhwira Ketalia okhwa Ahikamu. Yehonani akobosiayo banamae, ne bakhasi, babaana ne bachili khukhwama Kibeoni.

¹⁷Ne bacha bamenya e Keruti Kimuamu siimbi e Betelehemu, ne benyanga khucha e Misiri,

¹⁸sikila baba bariire Bababiloni, sikila Ishimaeli aba eerire Ketalia, niye Nebukadinesa omwami owa Babiloni aaba ne amiisie nga omuruki we lukoongo lwa Yuda.