Read lubukusu Yer. 42 Bible Online

Yer. 42 - lubukusu bible

Yer. 42

¹Nio babemeelesi be banamae boosi ne Yoanani okhwa Karea ne Asaria okhwa Hosiaya ne babaandu boosi khukhwamila khu mukeekhe khukhwola khu mukali bacha siimbi,

²mala baboolela omung'oosi Yeremia bali, “Nosiima khukhusaba okhurekeeresie, mala okhusabile Wele Omunyali Owa Bioosi, Wele wowo. Sikila nga wesi ne obona, khwaba bakali, mala luno khwaramire batiiti busa bari.

³Khwako, khusabile nio Wele Omunyali Owa Bioosi, Wele wowo akhwekesie efwe engila niyo khuchila ne bibiindu nibio khukhoyele khukhole.”

⁴Nio omung'oosi Yeremia abakobosia ali, “Namuulile, ndasaba Wele Omunyali Owa Bioosi, Wele wenywe khuloondekhana ne lisaba lienywe, ne liosi liosi nilio Wele Omunyali Owa Bioosi amukobosia enywe, ese ndamuboolela, se ndamukisakho sisiindu siosi siosi tawe.”

⁵Nio baboolela Yeremia bali, “Wele Omunyali Owa Bioosi akhoya abe omuloli owa ng'ali lundi omusuubilwa khwifwe, khwaba ne khukhakhola khuloondekhana ne burume bwewe bwoosi nibwo akhuruma ewe khwifwe tawe.

⁶Bwakhaba ne buli bulayi namwe bubi efwe khulaulila nilio Wele Omunyali Owa Bioosi, Wele wefwe niye khulikho khukhurumakho, nio khunyoole bulayi khwaba ne khuloonda nilio aloma.”

⁷Enyuma we chindaalo ekhumi, Wele Omunyali Owa Bioosi alomaloma ne Yeremia.

⁸Nio Yeremia alanga Yoanani okhwa Kerea ne banamae babemeelesi boosi ba baaba naye ne babaandu boosi khukhwamila khu mukeekhe khukhwola khu mukali.

⁹Aababoolela kamakhuwa kano: Wele Omunyali Owa Bioosi, Wele owa Isiraeli niye enywe mundumirekho ese mbile lisaba lienywe ebweeni wewe aloma ali,

¹⁰“Enywe mwaba ne murama mu sibala sino, ese ndamwombakha ne se ndamulekha tawe. Ndamwimikha ne se ndamwonaka tawe. Sikila ese nisonia khu butinyu nibwo namurereere enywe.

¹¹Mukharia omwami owa Babiloni niye muriire khale oyo tawe, sikila ese ndi ne nanywe khumuonia ne khumureesia khukhwama mu bunyali bwewe.

¹²Ndamukholela enywe siisa, mala omwami owa Babiloni yesi amukholele siisa mala amulekhe muche mu sibala sienywe sisiene.”

¹³Ne kakhali mwaba ne muloma muli, “Efwe se khwenya khwarama mu sibala sino tawe,” mwaba ne mukharia niko Wele Omunyali Owa Bioosi, Wele wenywe aloma tawe,

¹⁴namwe mwaba ne muloma muli khulacha mu sibala sia Misiri niio khukhabona liie, namwe chikhoombi che liie namwe enjala tawe mala mumenye ebweeneyo,

¹⁵aba ulila niko Wele Omunyali Owa Bioosi aloma, ee enywe mumwarama mu Yuda. Wele Omunyali Owa Bioosi, Wele owa Isiraeli aloma ali, “Mwaaba ne mulola e Misiri muche mumenyeyo,

¹⁶aba liie nilio muriire likhamunyoole mu sibala sie Misiri esio, ne enjala niyo muriire elamuloondakho ne kamaani mala emwirireyo.

¹⁷Babaandu boosi baacha e Misiri khumenyayo baleerwa mwiie, mu njala, ne lufu, se balaba nende omundu olarama namwe olaona khukhwama khu busiku nibwo ndabareerera tawe.

¹⁸“Sikila ese Wele Omunyali Owa Bioosi, Wele owa Isiraeli ndoma ndi: Nga naambwa lirima likali, nakhalalila bamenywa ba Yerusalemu, bulayi bwene khaambwe lirima ne khumukhalalila enywe mwaba ne mucha e Misiri. Mulafwaana bubi lukali, muriisie mube nga silaamo lundi be khuchekheelelwa. Se mulibona abuundu ano lundi tawe.”

¹⁹Ee, enywe mumwarama mu Yuda, Wele Omunyali Owa Bioosi amuboolela ali, “Mukhacha e Misiri tawe. Manyila elala ng'ali muli namukaanisie endaalo yino

²⁰mwaukhe mala mweyire mwabeene. Sikila enywe mwanduma ese khu Wele Omunyali Owa Bioosi, Wele wenywe ne muboola muli, ‘Khusabile khu Wele Omunyali Owa Bioosi, Wele wefwe, ne liosi liosi nilio aloma, ewe khuboolele mala khulakhola.’

²¹Ne endaalo yino ese namubooleele ne kakhali se mwariire burume bwa Wele Omunyali Owa Bioosi, Wele wenywe mu buli siindu nisio amboleele muboolele enywe tawe.

²²Khwako luno manya ng'ali muli mukhererwe mwiie ne njala, ne lufu mu sibala nisio mwikoomba khucha mumenyemo esio.”