Read lubukusu Yer. 43 Bible Online

Yer. 43 - lubukusu bible

Yer. 43

¹Nga Yeremia ne amala khuboolela babaandu boosi, kamakhuwa koosi niko Wele Omunyali Owa Bioosi, Wele wabwe aba namurumire khu nibo,

²Asaria okhwa Hosiaya ne Yoanani okhwa Karea ne babaandu be sileka boosi baboolela Yeremia bali, “Ewe olikho oboola bubeeyi. Wele Omunyali Owa Bioosi, Wele wefwe se akhurumire ewe wiche okhuboolele efwe ali khukhacha e Misiri khumenyeyo tawe.

³Ne kakhali Baruku okhwa Neria niye okhurumire ewe oboole kamabi khwifwe, khukhura efwe mu bunyali bwe Bababiloni, bakhwire namwe bakhuaambe bakhuyile mu mbaambe mu Babiloni.”

⁴Nio Yoanani okhwa Karea ne banamae babemeelesi boosi ne babaandu boosi se baria burume bwa Wele Omunyali Owa Bioosi barame mu sibala sia Yuda tawe.

⁵Ne kakhali Yoanani okhwa Karea ne babemeelesi be banamae boosi babukula babaandu babarama mu Yuda boosi ba baba ne bakoboole khumenya mu sibala sia Yuda khukhwama mu kholo choosi nimwo bamulila babayila Misiri.

⁶Abukula bakhaana be babaami, nende buli mundu niye Nebusaratani omunamae we baliindi be luuya lwo mwami aba ne alekhela Ketalia okhwa Ahikamu lundi omwichukhulu Siafani. Nebusaratani aba alekhela Ketalia mung'oosi Yeremia ne Baruku okhwa Neria.

⁷Bacha mu sibala sia Misiri, sikila se baria niko Wele Omunyali Owa Bioosi aloma tawe. Bacha bola e Tahipanihesi.

⁸Ebweeneyo, Wele Omunyali Owa Bioosi aboolela Yeremia ali,

⁹“Bukula kamabaale kamaboofu mu makhono kowo okakukhulile mu sioso sie kamatifari, siili e muliango kwe lichipi lia Farao mu lukoba lwa Tahipanihesi muno. Ne lekha Baisiraeli balala babone nisio olikho okhola.

¹⁰Baboolele oli: Wele Omunyali Owa Bioosi, Wele owa Isiraeli aloma ali, ‘Lola, ese ndarumania mbukule Nebukadinesa omwami owe Babiloni, omukholi wase mala alara endebe yewe eye bubwami khu ngaaki khwe kamabaale niko ngisile kano, mala akhakabimbe ne liiema liewe lie bubwami.

¹¹Nebukadinesa akheche mala ape sibala sia Misiri, lufu lukheere abo babalaamilwa lufu, ne siboe khwaabo babalaamilwa siboe, ne liie khwaabo babalaamwa khukhwirwa mwiie.

¹²Akhabwane kumulilo osie chingaangu che bawele ba Misiri. Akhabukule bawele balala nga baboe ache nabo, mala akhakhole sibala sia Misiri, bulayi bwene nga omwaayi ne angala chinda mu ngubo. Omwami owa Babiloni akharure mu sibala sia Misiri ne bukhili mu muleembe.

¹³Akhaare enjeko eya wele we nyanga eli e Heliopolisi mu sibala sia Misiri, mala osie chingaangu che bawele ba Misiri.’ ”