Read lubukusu Yer. 44 Bible Online

Yer. 44 - lubukusu bible

Yer. 44

¹Wele Omunyali Owa Bioosi aboolela Yeremia burume khu Bayaudi bamenyile mu sibala sia Misiri boosi e Mikitoli ne e Tahipanihesi, ne e Mefisi ne mu sibala sia Paturusi.

²Aloma ali, “Wele Omunyali Owa Bioosi, Wele owa Isiraeli aboola ali, ‘Enywe mwaboone butinyu bwoosi nibwo nareera khu Yerusalemu ne khu ngoba cha Yuda choosi. Khukhwola luno chakwa kamakuunda se aliio omundu ochimenyilemo tawe,

³sikila babaandu bamwo bakhola bumayaanu mala bambambia lirima. Baana chimbosio khu bawele babaandi ne khusaaya bawele nibo bakhamanya namwe nibo enywe mumanyile, namwe nibo bakuuka benywe basaaya tawe.

⁴Ese nachiililila khubarumira bakholi base bang'oosi babamuboolela bali mukhakhola sisiindu sisinyisia nisio nabiila sino tawe.’

⁵Ne kakhali, se barekeeresia namwe baulila tawe. Ne se balekha bumayaanu babwe bwe khuaana chimbosio khu bawele babaandi tawe.

⁶Khwako nakhalala ne khuambila chingoba cha Yuda ne chingila che mu Yerusalemu lirima, ne khuchiambia. Nakhola Yuda ne Yerusalemu chakwa kamakuunda ne chiriisia khukhwola luno.

⁷“Luno Ese Wele Omunyali Owa Bioosi, Wele owa Isiraeli ndeeba ndi, ‘Siina sikila ne mwereerera silaamo sikali sino khu mwabeene, mwenya khubunia babaandu be siseecha, be siikhasi, babaana ne bachweenge, nio akhabao yesi yesi orama mu Yuda ne mu baandu benywe tawe?

⁸Siina sikila enywe ne mumbambia lirima khulwe bikholwa bienywe bie khukhwosia biiunya bulayi khu bawele babaandi mu sibala sia Misiri, niio mwechile khumenya. Mwenya khukhweyira mala mube silaamo ne kumwenya kwe khuchekheelela mu kholo choosi che sibala?

⁹Enywe mwebiliile bumayaanu bwe bakuuka benywe, babaami ba Yuda, ne bakhasi babwe, ne bubwenywe mwabeene ne bumayaanu nibwo bakhasi benywe bakhola mu sibala sia Yuda ne khu ngila cha Yerusalemu?

¹⁰Khukhwola luno mukheboombiakho namwe mwandiakho tawe. Se mwaloonda lilaka liase nilio namuelesia enywe ne bakuuka benywe tawe.’ ”

¹¹“Khwako Wele Omunyali Owa Bioosi, Wele owa Isiraeli aloma ali, ‘Lola ese namufutariire enywe, khumureerera butinyu, babaandu ba Yuda mweesi.

¹²Ndabukula Bayaudi babarama babenya khucha e Misiri bamenyeyo mala boosi balibuna. Balifwiila mu Misiri mwiie, ne njala, khukhwamila khu mutiiti khukhwola khu mukhulu. Ne bakhabe sisiindu sie khuriisia, silaamo nende sie khuchekhelelwa.

¹³Sikila ndaukuuma abo bamenyile mu sibala sia Misiri bulayi bwene nga ne naelesia babaandu ba Yerusalemu liie, enjala ne lufu.

¹⁴Se akhabeo omundu yesi yesi owa Yuda owarama owecha khumenya mu Misiri okhebache namwe aone namwe akobole mu sibala sia Yuda nisio bekoomba khukobolayo bamenyeyo tawe. Baakhakoboleyo baliba batiiti bari babelukha bong'ene.’ ”

¹⁵Nio babaandu be siseecha boosi bamanya bali bakhasi babwe baana biiunya bulayi khu bawele babaandi, ne bakhasi boosi ba baaba ne bemileo, alala ne Baisiraeli ba baamenya ebunaswa owa Misiri ne babaandu bakali bakobosia Yeremia bali,

¹⁶“Efwe khwalobile likhuwa nilio okhuboleele mwisina lia Wele Omunyali Owa Bioosi, se khulakhurekeeresia tawe.

¹⁷Ne kakhali khulakhola buli sisiindu nisio khwechuba khukhola. Khulosia biiunya bulayi khu wele omukhasi, omwami owe likulu ne khumuanila biianwa bie khunywa, bulayi bwene nga khwakholanga, efwe bakuuka befwe ne babaami ne babaana babwe mu ngoba cha Yuda khungila che mu Yerusalemu. Mu biise ebio khwabechanga ne biakhulia bikali ne kimiaandu mala se khwabonakho butinyu tawe.

¹⁸Ne kakhali khukhwama nga khulekha khukhwosia biiunya bulayi khu wele omukhasi, omwami owe likulu ne khuaana biianwa bie khunywa khu niye, khwataambile buli siindu mala liie ne njala biakhwirire.”

¹⁹Ne bakhasi nabo baloma bali, “Nga ne khwoselianga wele omukhasi, omwami owe likulu biiunya bulayi, ne khuaana biianwa bie khunywa, khwafukiililwa ne baseecha befwe. Nio khwamupilanga chikeki ne khurakho sifwaani siewe ne khumuchukhila biianwa bie khunywa.”

²⁰Nio Yeremia areeba babaandu boosi be siseecha nende be siikhasi babamukobosia abo ali,

²¹“Mwibaasia muli Wele Omunyali Owa Bioosi se akhebulila biiunya bulayi nibio enywe ne bakuuka benywe, babaami ne babemeelesi alala ne babaandu mweesi mwoselianga mu ngoba cha Yuda ne Yerusalemu tawe? Se liechakho munganakani chewe tawe?

²²Wele Omunyali Owa Bioosi se anyala khukhwikhaliilikhila bikholwa bienywe bimayaanu lundi bisinyisia nibio mwakhola tawe. Khwako, sibala sienywe sianjuukhwe, mundumo tawe lundi siabeele silaamo mbao omenyilemo tawe.

²³Butinyu buno bwamwichilekho sikila mwaana chimbosio khu bawele babaandi mala mwakhola bubwoni khu Wele Omunyali Owa Bioosi khulwe khuloba kamalaka kewe.”

²⁴Yeremia aboolela babaandu boosi alala ne bakhasi boosi kamakhuwa kano: Ulila likhuwa lia Wele Omunyali Owa Bioosi, enywe babaandu ba Yuda mweesi muli mu sibala sia Misiri.

²⁵Wele Omunyali Owa Bioosi, Wele owa Isiraeli aloma ali, “Enywe ne bakhasi benywe mwalomaloome ne kiminwa kienywe mala mwakholile ne kamakhono kenywe nga mwaloma muli, ‘Ng'ali, khulakhola niko khwasuubisia khuli khulosia biiunya bulayi khu wele omukhasi kwini owe likulu ne khumuanila biianwa bie khunywa.’ Nono khola nga mwasuubisia mu liechuba lienywe.

²⁶Ne kakhali ulila burume bwo Mwami WELE enywe mweesi babaandu ba Yuda mumenyile mu sibala sia Misiri. Lola, ese Wele Omunyali Owa Bioosi nechubile mwisina liase likali ne ndoma ndi, ‘Lisina liase se lilararwakho lundi no mundu yesi yesi owa Yuda, mu sibala sioosi sia Misiri tawe.’ Mbao olaloma ali, ‘Nga Wele Omunyali Owa Bioosi ne amenyile mindali tawe.’

²⁷Lola, ndikho mbaloleelesia khubareerera butinyu, ne kakhali se ndabareerera kamalayi tawe. Babaandu ba Yuda boosi baali mu sibala sia Misiri balabuna khulwe liie ne njala khukhwola nga bawa.

²⁸Ne batiiti baliebacha liie mala barure mu sibala sia Misiri bakobole mu sibala sia Yuda, ne balirama be mu sibala sia Yuda, babecha khu menya mu sibala sia Misiri bakhamanye elomo eya naanu ekharame, eyase namwe eyabwe.”

²⁹Wele Omunyali Owa Bioosi aloma ali, “Sino siliba simanyisio khwinywe, mbo nja khumuelesia siiukuumo ano, nio enywe mumanye muli ng'ali kamakhuwa kase niko ndomile khuloondekhana nanywe kali ka ng'ali.”

³⁰ Lundi Wele Omunyali Owa Bioosi aloma ali, “Khare omwami Farao Nofura, omwami owa Misiri mu bunyali bwe basiku bewe nende khwaabo bayiima khumwiira niye, bulayi bwene nga nara Sedekia, omwami owa Yuda mu bunyali bwa Nebukadinesa, omwami owa Babiloni, owaba omusiku wewe mala owayiimanga khumwiira.”