Read lubukusu Yer. 46 Bible Online

Yer. 46 - lubukusu bible

Yer. 46

¹Wele Omunyali Owa Bioosi aboolela Omung'oosi Yeremia kamakhuwa khuloondekhana ne chikholo,

² ke khunyoa kaba ke sibala sia Misiri, ne lukali khu banamae bo mwami Neko, omwami owa Misiri, ba baaba a luuchi lwa Efurati e Karikemishi. Nebukadinesa omwami owa Babiloni apane ne banamae abo e Karikemishi mala abaulile, mu mwiiko kwe khane kwe khukhwamiia khwa Yehoyakimu okhwa Yosia nga omwami owa Yuda.

³Banamae ba Misiri baloma bali, “Rekekha chingabo chindiiti ne chimboofu, mala muche mwiie!

⁴Rekekha chifarasi, chiniinekho mala muche! Bukula bubweyaangu bwenywe mala mufware chikofiyo chenywe, akala kamafumo kenywe Fwara nibio mwetecha!

⁵Wele Omunyali Owa Bioosi areeba ali, Siina nisio mbona? Baandu bariire ne khukobola enyuma. Banamae babwe bauliilwe mala beluukhe mu buri se bekhebukha enyuma tawe sikila buri buli buli lubeka!

⁶Be chimbilo se bacha aleeyi tawe, namwe banamae se bebacha tawe, betuyile aluuchi lwa Efurati ebunaswa, mala bakwiile.

⁷Naanu yuno owinyokha nga luluuchi lwa Naili, nga chinjichi nicho kameechi kechula mala kabira enje.

⁸Misiri sienyokhe nga luluuchi lwa Naili, nga chinjichi nicho kameechi kechula Misiri sialoma sili, ndechula mala nichusie sibala, ndonaka chingoba ne khubunia bamenywa bamwo.

⁹Sibula chifarasi chiche, ne kamakaari katime! Ruma banamae bache Banamae ba Esopia ne e Libia basute chingabo ne babaandu ba Lidia, bamanyile bulayi lukali khurumikhira buyiingo.

¹⁰Endaalo eyo eli endaalo yo Mwami WELE we banamae eli endaalo eye khukhwiyacha basiku bewe. Embalu elabalia mala yikure, mala enywe kamafuki kabwe yikure. Sikila Omwami WELE we banamae ali ne embosio mu sibala sie lukoongo sie ebunaswa a luuchi lwa Efurati.

¹¹Ee, enywe baandu ba Misiri cha Kileati mubukule kamalesi, sikila mwarumikhira kamalesi kamakali kataamba bukhala mbao busilikhi khwinywe tawe.

¹²Chikholo chilaulila ke chisoni chenywe ne sibala silechula bililo bienywe sikila omunamae mulala aletuya khu kundi mala boombi balakwa alala.”

¹³ Wele Omunyali Owa Bioosi lundi aboolela omung'oosi Yeremia khuloondekhana ne khukhwicha khwa Nebukadinesa, omwami owa Babiloni khukhwibwaakala sibala sia Misiri. Aloma ali,

¹⁴“Langilila mu Misiri mala olangilile mu lukoba lwa Mikitoli langiliila mu Memufisi ne mu Tahipanihesi, loma oli, ‘Yerekekha khukhweliinda mwabene, sikila liie lilamubunia enywe mweesi.’

¹⁵Siina sikila wele wenywe Apisi ne eluukhe? Siina sikila euunwa yenywe ne ekhemile? Sikila Wele Omunyali Owa Bioosi amupile asi.

¹⁶Banamae benywe betuyile mala bakwile mala babolaane bali, ‘Yinyokha khukobole engo niio babaandu befwe bali, ne mu sibala nisio khusaalwamo, sikila liie lio musiku wefwe.’

¹⁷Laanga Farao omwami owa Misiri muli, ‘Omundu owe luyoka olekhanga biise biewe biwa busa.’ ”

¹⁸Wele Omunyali Owa Bioosi aloma ali, “Ese ndi Wele omenyile mindali, nga sikulu sia Tabori ne sikhila bikulu bibiindi lundi nga sikulu sia Karimeli ne sili angaaki we nyanja, omwibwaakala ali ne kamaani kario.

¹⁹Ee Bamisiri, yerekekha khucha mu mbaambe, ee bamenywa ba Misiri. Sikila lukoba lwa Memufisi lukhanjukhwe lukhabe likuunda likhamenywamo tawe.

²⁰Sibala sia Misiri sili nga ekhaafu eye kamabeele, ne kakhali embuko khukhwama ebunaswa yakilumile.

²¹Bakhaba banamae bali mu Misiri be kumuruungo bali nga chimoosi chikhali ne buyeeti tawe se bema khukhupana tawe, boosi belukha sikila endaalo eye butinyu bwabwe abele yolile siise sie libuna liabwe.

²²Bamisiri belukha ne bachina oli endemu, sikila basiku babwe bengila ne kamaani, mala bebwaakala Misiri ne chiaaywa, nga abo barema kimirongooro.”

²³Wele Omunyali Owa Bioosi aloma ali, “Balarema kumusiru kwa Misiri kukhanyalikhana khuremwa tawe sikila bali bakali lukali khukhila chisike, se babalikha tawe.

²⁴Babaandu be Misiri balaambwa chisoni balaambwa ne babaandu khukhwama ebunaswa.”

²⁵Wele Omunyali Owa Bioosi, Wele owa Isiraeli aloma ali, “Lola ese ndikho ndeera siiukuumo khu Amoni wele owa Tebesi ne khu Farao ne sibala siewe sia Misiri, ne khu bawele basio, ne babaami ne nabo babamusuubila.

²⁶Ndabaana khwaabo bayiima khubeera, ndabakaanisia Nebukadinesa, omwami owa Babiloni ne khu bemeelesi bewe. Enyuma wako, babaandu balamenya lundi mu sibala sia Misiri nga bamenyanga khale.”

²⁷ “Baandu base, mukharia tawe, baandu ba Isiraeli mukharenga tawe, ndamuonia khukhwama mu sibala sie aleeyi esio, khukhwama mu sibala nisio muli baboe. Mukhakobole engo mala mumenye mu muleembe. Mukhabe ne buliindi ne mbao olibariikhirisia tawe.

²⁸Ndecha mala muonie. Ndabunia chikholo choosi nicho namusalanisiamo, ne kakhali se ndamubunia enywe tawe. Ne se ndamulekha ne khamuukumile tawe, ne kakhali ne muukuuma ndabakho ne siisa. Ese Wele Omunyali Owa Bioosi olikho oloma.”